வைரமுத்து மணிவிழா நிகழ்ச்சியில் நடந்தது என்ன

by **மாலதி** Tue Jul 22, 2014 7:21 am

வைரமுத்து மணிவிழா நிகழ்ச்சியில் நடந்தது என்ன
----------------------------------------------------------------------------

வைரமுத்து குறித்த என் பதிவு பற்றி உலகின் பல பாகங்களில் என் நண்பர்கள் போன் செய்து விசாரித்து வருகின்றனர். முதலில் கோபமாக என்னிடம் விசாரித்த நண்பர்கள், பிறகு நடந்தவைகளை நான் விளக்கியவுடன், இது பத்தாது, இன்னும் எழுது என்று ஊக்கமளிக்கின்றனர்.

அன்று என்ன நடந்தது என்று விகடனில் வந்த செய்தியை இங்கே கொடுக்கிறேன்.. நீங்களே முடிவு செய்து கொள்ளுங்கள். மறுபடியும் சொல்லுகிறேன், வைரமுத்துவுக்கு வாழ்வு கொடுத்தவர் பாரதிராஜா என்பதை நினைவில் வைத்துகொள்ளுங்கள்.
வைரமுத்து மணிவிழா நிகழ்ச்சியில் நடந்தது என்ன 10553355_10204112075540068_1836134992545165522_n

வைரமுத்து மணிவிழா நிகழ்ச்சியில் நடந்தது என்ன 10553355_10204112075540068_1836134992545165522_n

முதலில் பேசிய பாரதிராஜா..

இந்த மேடையில் நான் பயப்படாமல் ஒருவனை நான் விமர்சிக்க முடியும் என்றால் அது வைரமுத்துவைத்தான். என்னதான் மிகப்பெரிய இலக்கியவாதியாக இருந்தாலும், சிறந்த எழுத்தாளனாக இருந்தாலும் ஊடகத்தின் மூலமாகத்தான் அவன் வெளிப்பட முடியும். வைரமுத்து என்ற மகா கவிஞன், திரைத்துறைக்கு வராமல் இருந்திருந்தால், அவரது இலக்கியங்கள் அடையாளம் காணப்படாமல் போய் இருக்கும். 'என்னை தங்க கூண்டில் அடைத்து விட்டார்கள்' என்கிறார் வைரமுத்து. தங்க கூண்டில் உன்னை வைத்ததால்தான் உன்னை எல்லோரும் வேடிக்கை பார்த்தார்கள்.

நான் அறிமுகப்படுத்தியவன் என்ற தகுதியை விட, சுயம்புவாக உன்னை நீயே வளர்த்துக்கொண்டாய் அதுதான் உன் தகுதி. விதைத்தவன் யார் என்பது முக்கியமல்ல.விதை வீரீயமாக இருக்கிறதா, நிலம் பண்பட்டிருக்கிறதா என்பதுதான் முக்கியம். இந்த விதை வீரியமுள்ள விதை என்பதால் தான், விருட்சமாக நிற்கிறது.

வைரமுத்து என்னை சந்தித்த நாட்கள் இருக்கிறதே..பெரிய திமிர் அவனுக்கு. என்னிடம் வாய்ப்பு கேட்டு வந்தவன், 'புத்தகத்தை கொடுத்து, என்னை பயன்படுத்த முடிந்தால் பயன்படுத்திக்கொள்ளுங்கள்' என்றான். உன் புத்தகத்தை விமானத்தில் படித்தேன் என்றபோது, உயர்ந்த விஷயத்தை உயர்ந்த இடத்தில் இருந்துதான் படிக்க முடியும் என்றான். எனக்கு அவன் தண்ணி வண்டினு பேர் வைச்சிருக்கான். தண்ணி வண்டி தடுமாறாது. அதே மாதிரி எந்த இடத்திலும் நான் தடுமாறுவதில்லையே. கவிஞர் சரியாகத்தான் சொல்லியிருக்கிறார்.

எனக்கும், அவனுக்கும் கருத்தில் நிறைய வேறுபாடு இருக்கிறது. ஆனால் அது கருத்தில் மட்டும்தான். அவன் கெட்டிக்காரன். எழுத்தில் எவ்வளவு வலிமையாக செயல்படுகிறானோ. அதே போல் செயலிலும் வலிமையாக செயல்படுகிறான். அற்புதமான மூலிகை, மனிதனை தேடிப்போவதில்லை. மூலிகையை தேடித்தான் மனிதர்கள் போவார்கள். நீங்கள் வைரமுத்துவை தேடி வந்திருக்கிறீர்கள்," என பேசி முடித்தார்.

பதிலுக்கு வைரமுத்து பேசும்போது..

புதிய வார்ப்புகள் பார்த்து மிரண்டேன். பாரதிராஜாவை பார்த்து ஒன்று சொன்னேன். 'உங்கள் படத்தில் எல்லாம் மாறி இருக்கிறது. திரைப்பாட்டு மொழியை தவிர. எனக்கு வாய்ப்பு கொடுத்தால் அதை மாற்றிக்காட்டுவேன்' என்றேன்.

உடனே என்னை அழைத்தார். இளையராஜாவிடம் அறிமுகப்படுத்தினார். என்ன இவன் பாட்டு எழுதுவானா? என இளையராஜா கேட்டபோது, 'பாப்போம்டா.. இருடா' என உரிமையோடு பேசினார். அந்த வாடா, போடா உரிமையை வேலையிலும் பயன்படுத்துவதுதான் தப்பு. அறையில் பயன்படுத்துவது அன்பு. வேலையில் பயன்படுத்துவது வம்பு," என வைரமுத்து பேசிக்கொண்டிருக்க,

இடையில் மைக் பிடித்த பாரதிராஜா, "உங்களைப்போல தமிழில் பேச என்னால் முடியாது. நான் பாமரன். எனக்கு தெரிந்த தெரிந்த உண்மையை சொன்னேன். அவ்வளவுதான். வருகிறேன்" என சொல்லி விட்டு அரங்கை விட்டு வெளியேறினார்.

இதுதான் அன்று நடந்தது.. இனி நீங்களே முடிவு செய்துகொள்ளுங்கள்.

கீழே கொடுத்திருக்கும் படத்தை பாருங்கள்.. வைரமுத்து எவ்வளவு கோபமாக ஒரு விரல் நீட்டி பாரதிராஜாவிடம் பேசுகிறார் என்று.