பொய்யாமொழிப்புலவன் வள்ளுவன் சொன்ன குறள் தவறாய்ப் போனதா? குறள் தவறா இல்லை கலைஞர் உரை தவறா?

பொய்யாமொழிப்புலவன் வள்ளுவன் சொன்ன குறள் தவறாய்ப் போனதா?
குறள் தவறா இல்லை கலைஞர் உரை தவறா?

திருக்குறளை தேசிய நூலாக ஆக்க வேண்டும் என்ற கவிஞர் வைரமுத்துவின் போராட்ட சமயத்தில் இப்படி ஒரு கேள்வி.

வள்ளுவன் சொன்ன குறள்கள் பலவற்றில், உவமானங்களை ஆழமாக எடுத்து வைத்திருப்பான். சில சமூகம் சார்ந்ததாகவும்,வேறு சில அறிவு சார்ந்த அல்லது அறிவியல் சார்ந்ததாகவும் இருப்பதைக் காணலாம். இந்த வரிசையில் ஒரு திருக்குறளை ஆய்வு செய்தால்,.........

மயிர்நீப்பின் வாழாக் கவரிமா அன்னார்
உயிர்நீப்பர் மானம் வரின் .

இந்தக் குறள் பலருக்கும் தெரிந்தது தான். இதற்கு பொருள் சொன்னவர்களில் பரிமேலழகர், பாவாணர் போன்றோர் -கவரிமா- என்று குறிப்பிட்டு பொருள் கூறி இருந்த நிலையில்,அய்யா கலைஞர் கருணாநிதி அவர்கள் கவரிமான் எனக் குறிப்பிட்டுள்ளார். இது சரியா என்பது கேள்வி.

முதலில் குறளுக்குப் பொருள் ,
தன் மயிர்த் திரளில் ஒரு மயிர் நீங்கினாலும் உயிர் வாழாத கவரிமா வைப் (னைப்) போல வாழ்பவர்கள் உண்டு. அவர்கள் மானம் போகும் நிலை ஏற்படுமானால் கவரிமா-னைப் போல உயிர் விடுவார்களாம்.

இந்தக் கருத்துக்கு எடுத்துக்காட்டாக இருப்பது, ஆரியப்படை கடந்த நெடுஞ்செழியன், கோவலனைக் கள்வன் என்று சொல்லிக் கொல்வித்ததால்,பொன் தொழில் செய்யும் கொல்லனின் பொய்யுரை கேட்டு, அறநெறி தவறிய,நானோஅரசன்! நானே கள்வன் ,என்று சொல்லி தன் செங்கோல் தவறியதென்று,  உயிர் துறந்த சிலப்பதிகார சம்பவமாகும்.

கலைஞர் தன் உரையில் இப்படிப் பொருள் சொல்கிறார்....................
உடலில் உள்ள உரோமம் நீக்கப்பட்டால் உயிர் வாழாது கவரிமான்
என்பார்கள். அதுபோல் மானம் அழிய நேர்ந்தால் உயர்ந்த மனிதர்கள்
உயிரையே விட்டு விடுவார்கள். (எங்கும் சாதுரியமாகத் தப்பி விடும் அவர், கவ்ரிமான் , கவரிமா சர்ச்சையிலும்  சிக்காது தப்பி விட்டார்.)

இது பாவாணர் உரை.................
மயிர் நீப்பின் வாழாக் கவரிமா அன்னார் - தன் மயிர்த்திரளின் ஒரு மயிர் நீங்கினும் உயிர் வாழாத கவரிமாவை ஒப்பார்; மானம் வரின் உயிர் நீப்பர் - உயிர் நீக்கத்தான் மானம் எய்தும் எல்லை வரின், அதனைத் தாங்காது இறப்பர்.

இது தான் கவரிமா.......


கவரிமான் இப்படி உயிர் விடுவது உண்மையா? மான் இனத்தில் இப்படி உடலில் மயிர் இருப்பதாகத் தெரியவில்லை. அத்துடன் மனிதனின் தலையில் இருக்கும் மயிர் போல், தினமும் உதிர்ந்து முளைக்கும். வீட்டில் வளர்க்கும் நாய்,பூனை போன்ற விலங்குகள் வீட்டில் இருந்தால்,அந்த வீட்டில் மயிர் உதிர்ந்திருப்பதைக் காணலாம். இது போன்றதே மான் இனத்திலும் ஆகும்.

எந்த விலங்கியல் புத்தகத்திலும் இந்தச் செய்தி இல்லை! கவரிமான் என்பதைச் சட எருமை Yak என்று ஆங்கிலத்தில் மொழி பெயர்த்துள்ளனர். கம்பரும் இந்த உவமையைக் கையாள்கிறார்,மானம் நோக்கின் கவரிமா அளைய நீரார், என கம்பராமாயணம், மந்திரப் படலத்தில் சொல்லப்படுகிறது. கம்பர் காலம் வேறு,வள்ளுவன் காலம் வேறு.

ஆனால் கம்பன் சொன்னதும் வள்ளுவன் சொன்னதும் கவரிமா எனும் போது, எப்படி பொருள் கவரிமான் ஆயிற்று?

கவரிமான் எங்கு வசிக்கிறது? முடி விழுந்தால் தற்கொலை செய்து கொள்ளுமா? எப்படி தற்கொலை செய்து கொள்ளும்? இப்படிச் சில கேள்விகள்.

கலைஞரும் வேறு சிலரும், ஏன் நாமும் குழப்பிக் கொண்ட கவரிமான் என்பது தவறானதாகும். கவரிமா என்று வள்ளுவனும்,கம்பனும்,தேவாரமும்,பதிற்று பத்து,புறனானூற்றிலும் கூறப்பட்டது கவரிமா வே தவிர கவரிமான் அல்ல.

நரந்தை நறும்புல் மேய்ந்த கவரி
தண் நிழல் பிணி யோடு வதியும்
வட திசை யதுவே வான் தோய் இமயம்….............என்கிறது புற நானூறு.

இதற்குப் பொருள்..............இமயமலை பகுதியில் , கவரிமா என்ற விலங்கு நரந்தை எனும் புல்லை உண்டு , தன் துணையுடன் ஜாலியாக வாழும் என்பதாகும்.

கவரிமா என்று ஒரு விலங்கு இருக்கிறது. இமயமலைப் பகுதியில் அதாவது குளிர்ப் பிரதேசங்களில் வாழும் இந்த விலங்கு, குளிரில் இருந்து காப்பாற்றிக் கொள்ள இயற்கை கொடுத்த நீண்ட சடை கொண்டது. அதன் முடி நோயினால் உதிர்ந்தாலோ, மனிதர்களால் வெட்டப்பட்டாலோ, குளிரினால் இறந்து விடும்..இதன் மயிரை அகற்றி சீனர்கள் பெண்களுக்கான செயற்கை முடியை-சவரி- (பெண்கள் பாவிக்கும் பொய்முடி,கவரி -சவரி ஆயிற்று.) ஏற்றுமதி செய்தனர்.

வள்ளுவன் சொன்ன இந்தக் கவரிமா என்பது தமிழ் நாட்டு விலங்கு அல்ல. இமயமலையில் வாழும் விலங்கு.
மா என்பது மிருகங்களுக்கு உரிய பொதுவான சொல்.(அரி மா=சிங்கம்)
இந்தியா முழுவதும் இமயம் வரை தமிழர்கள் வாழ்ந்ததால்,சங்க இலக்கியங்கள் இதை சொல்லி இருக்கலாம்.கவரிமா என்பது மான் வகையை சார்ந்தது அல்ல. மாடு வகையை சார்ந்தது.

வள்ளுவன் சொன்ன குறளிலும்  தவறு இல்லை,பெரும்பாலானான உரைகளிலும் தவறு இல்லை.

வள்ளுவன் அறிவியல் ரீதியாக சொன்னதை மாற்றி விட்டனர்.கவரிமா வும் கவரிமானும் ஒன்றல்ல.
கலைஞரும், நாமும்  கவரிமா வை, கவரிமான் என புரிந்து கொண்டதுதான் தவறு..

இதே போல் கடமா (Bos gaurus,gaur,Indian bison ) அல்லது காட்டெருது எனப்படுவது இந்தியக் காடுகளில் காணப்படும் இரட்டைப்படைக் குளம்பிகள் குடும்பத்தைச் சேர்ந்த ஓர் ஆவினம். அக்குடும்ப இனங்களிலேயே மிகப்பெரிய உடலளவைக் கொண்டது கடமா ஆகும். இவ்விலங்கு கடமா, காட்டுப்பசு, காட்டா, மரை, கட்டேணி, காட்டுபோத்து என்று பல பெயர்களில் அறியப்பட்டுள்ளது.
இது கடமா................

ஆமா/ஆமான்(Indian bison, i.e, bos guarus), மரையா/மரையான் (Nilgai), கவரிமா/கவரிமான் (Yak), கலைமா/கலைமான் (black buck), வெளிமா/வெளிமான் (Indian gazelle) என்பது போல கடமா என்றாலும், கடமான் Sambur deer என்றாலும் ஒன்றுதான். இப்படி கவரிமா என்பது கவரிமான் ஆக்கப்பட்டு  இருக்கலாம். ஆனாலும் திருக்குறள் சொல்லாததை நாம் மாற்றிச் சொல்வது நியாயமல்ல.

கலைஞரும், நாமும்  கவரிமா வை, கவரிமான் என புரிந்து கொண்டதுதான் தவறு..

அருமையான் விளக்கம்