'விலைவாசி உயர்வு' விவாதம்: மக்களவையில் தூங்கினாரா ராகுல் காந்தி?

மக்களவையில் இன்று விலைவாசி உயர்வு பிரச்சினை குறித்து கடுமையான விவாதம் நடந்துகொண்டிருந்தபோது, காங்கிரஸ் துணைத் தலைவர் ராகுல் காந்தி தூங்கிக்கொண்டிருந்ததாக சர்ச்சை எழுந்துள்ளது.

இது தொடர்பான லோக்சபா டிவி காட்சிகள் சமூக வலைத்தளங்களில் பலராலும் பகிரப்பட்டு, கடுமையான விமர்சனங்களும், கிண்டல்களும் முன்வைக்கப்பட்டன.

மக்களவையில் ராகுல் காந்தி தூங்கியதாகக் குறிப்பிட்டு, பாஜக செய்தித் தொடர்பாளர் ஷானாவஸ் ஹுசைன் தனது ட்விட்டர் பக்கத்தில், "விலைவாசி உயர்வு பிரச்சினையில் காங்கிரஸ் கடந்த 10 ஆண்டுகளாக தூங்கிக் கொண்டிருந்தது. இன்று, விலைவாசி உயர்வு குறித்த விவாதத்தின்போது, காங்கிரஸின் இளவரசர் தூங்கிக் கொண்டிருந்தார்" என்று ட்வீட்டியிருக்கிறார்.

மேலும், "விலைவாசி உயர்வு, பணவீக்கம் குறித்து காங்கிரஸ் விவாதிக்க விரும்பவில்லை. வெறும் கோஷங்களுக்கு மட்டுமே அந்த வார்த்தைகளை அவர்கள் பயன்படுத்தி வருகிறார்கள். விலைவாசி உயர்வு பிரச்சினையில் ஒருபோதும் காங்கிரஸ் அக்கறைகொள்ளவில்லை. எனவேதான் இந்த விவாதத்தில் ஈடுபாடு காட்டாத ராகுல் காந்தி நாடாளுமன்றத்தில் தூங்கினார்" என்று அவர் சாடியுள்ளார்.

அதேவேளையில், ராகுல் காந்தி தூங்கவில்லை என்று காங்கிரஸ் கட்சி திட்டவட்டமாக மறுப்பு வெளியிட்டுள்ளது. அவர் விவாதத்தைக் கவனித்துக் கொண்டிருந்தார் என்று விளக்கம் அளித்துள்ளது.

இதுபற்றி காங்கிரஸ் தலைவர்களில் ஒருவரான ராஜீவ் சுக்லா கூறும்போது, "விவாதங்களின்போது, சில உறுப்பினர்கள் கண்களை மூடிக்கொண்டு கவனிப்பது உண்டு. ராகுல் அப்படித்தான் செய்திருப்பார். அடல் பிஹாரி வாஜ்பாய்கூட விவாதங்களின்போது கண்களை மூடியபடியே கவனிக்கும் பழக்கம் உள்ளவர்" என்றார்.

"நாடாளுமன்றத்தில் பலரும் கண்களை மூடிக்கொள்வது உண்டு. அதற்கு அவர்கள் தூங்குகிறார்கள் என்பது அர்த்தமல்ல" என்று தேசியவாத காங்கிரஸ் கட்சியின் மூத்த தலைவர் பிரஃபுல் படேல் குறிப்பிட்டுள்ளார்.