50 ஆண்டுகளாக கைதியாக சங்கிலியால் கட்டப்பட்டு பிச்சை எடுத்த யானை விடுதலையான பிறகு வடித்த ஆனந்தக் கண்ணீர்

லக்னோ, ஜூலை 7-

உத்தரப்பிரதேசம் மாநிலத்தில் கடந்த 50 ஆண்டு காலமாக சங்கிலியால் கட்டப்பட்டு சுற்றுலா பயணிகளிடம் பிச்சை எடுத்து, பாகனை பணக்காரனாக்கி விட்டு, பிளாஸ்டிக் கழிவுகளையும், காகிதங்களையும் தின்று பசியாற்றிக் கொண்ட ‘ராஜு’ என்ற யானையை இங்கிலாந்து நாட்டை சேர்ந்த தொண்டு நிறுவனம் விடுவித்துள்ளது.

உத்தரப்பிரதேச வனத்துறையினருடன் இந்த மீட்பு நடவடிக்கையில் இங்கிலாந்து தொண்டு நிறுவனத்தார் முயற்சித்த போது, தனது பிழைப்பில் மண் விழுந்து விடுமே என்ற பயத்தில் அதன் பாகன் அதிகாரிகளிடம் தகராறு செய்ய ஆரம்பித்தார்.

யானையை சத்தமாக அதட்டி, மிரட்டி மீட்க வந்தவர்கள் மீது பாயவிடவும் அவர் முயற்சித்தார். பின்னர் 6 போலீசாருடன் மாலை வேளையில் வந்த 10 தொண்டு நிறுவன அதிகாரிகள் மற்றும் 20 வனத்துறையினர் காலோடு சேர்த்து இறுக கட்டியிருந்த சங்கிலி தழும்பினால் பாதத்தில் புரையோடிப் போன புண்ணுடன், எடுத்து வைக்கும் ஒவ்வொரு அடிக்கு சீழ் கொப்பளித்து, வடிய குற்றுயிராய் கிடந்த ராஜுவை ஒரு வழியாக மீட்டனர்.

காலில் கட்டப்பட்டிருந்த சங்கிலி உடைக்கப்பட்டதும் விடுதலை பெற்று விட்ட மகிழ்ச்சியில் ராஜு வடித்த ஆனந்தக் கண்ணீரை கண்ட அனைவரும் நெகிழ்ந்துப் போயினர்.

பின்னர், மயக்க ஊசி போட்டு, அரை மயக்க நிலையில் இருந்த ராஜுவை ஒரு லாரியில் ஏற்றி, 350 கிலோ மீட்டர் தூரத்தில் உள்ள மதுரா நகரின் யானைகள் சரணாலயத்துக்கு கொண்டு சென்றனர்.

அங்கு ஏற்கனவே பராமரிக்கப்பட்டு வரும் ராஜேஷ், போலா மற்றும் 5 பெண் யானைகள் புது விருந்தினர் ராஜுவை தும்பிக்கையை அசைத்து ஆவலுடன் வரவேற்றன. பின்னர், அதை குளிப்பாட்டி, காலில் உள்ள காயங்களுக்கு மருந்திட்டு, பழங்கள் மற்றும் உணவு வகைகள் வழங்கப்பட்டது.

இருப்பினும், ஒரு கைதியாக விலங்கிடப்பட்டு, காலை முதல் இரவு வரை நின்றபடியே பிச்சை எடுத்து, பிச்சையிட்டவர்களை தும்பிக்கையை தூக்கி ஆசீர்வதித்து, ‘அதிர்ஷ்ட வஸ்து’ என்ற பெயரில் பறித்து, பறித்து விற்கப்பட்டதால் வால் குஞ்சத்தை கூட தொலைத்து விட்டு, சோர்வாக காணப்படும் ராஜு, பழைய பீதியில் இருந்து விடுபட்டு, சராசரி நிலைக்கு திரும்ப சில மாதங்கள் ஆகும் என்று வனத்துறையை சேர்ந்த கால்நடை மருத்துவர்கள் தெரிவித்துள்ளனர்.