இயற்கை சட்டைகள், தேங்காய் ஓடு கிண்ணங்கள், களிமண் டம்ளர்: சென்னை உணவுத் திருவிழாவில் ருசிகரம்!

by **Tamil** Mon Jul 07, 2014 8:01 pm

சென்னை: இயற்கை சட்டைகள், தேங்காய் ஓடு கிண்ணங்கள், களிமண் டம்ளர் என சென்னையில் நடந்த உணவுத் திருவிழாவில் ருசிகர காட்சிகள் இடம் பெற்றிருந்தன.

[You must be registered and logged in to see this image.]

சென்னை அண்ணாநகர் டவர் பார்க்கில் ஜூலை 5ஆம் தேதி இயற்கை உணவு திருவிழா மற்றும் சுற்றுச்சூழலுக்கு பாதிப்பு ஏற்படுத்தாத வீட்டு உபயோகப் பொருட்கள் விற்பனை நிகழ்ச்சி நடைபெற்றது. விழாவில் சென்னையில் இருக்கும் பல இயற்கை அங்காடிகள் பங்கேற்றன. மேள தாளத்தோடு, துடும்பாட்டமும் உணவுத் திருவிழாவை கலகலப்பாக்கியது.

விழாவில் சுற்றுச்சூழலுக்கு பாதிப்பு ஏற்படுத்தாத வகையில் தயாரிக்கப்பட்ட ஆடைகள் மக்களை மிகவும் கவர்ந்தது. இந்த ஆடைகள் இயற்கை முறையில் உற்பத்தி செய்யப்பட்ட பருத்தியால் நெய்யப்பட்டது. இயற்கையாக கிடைக்கும் காய், பழங்கள் மூலம் கிடைக்கும் சாற்றை எடுத்து அதன் நிறங்களை பூசி தயாரிக்கப்பட்டது. இதனால் சுற்றுச்சூழல் பாதிப்போ, சூரிய கதிர்வீச்சோ ஏற்படாது என்று சட்டைகள் குறித்து விளக்கினர்.

[You must be registered and logged in to see this image.]

தாய்வழி உணவகம் சார்பாக பல பாரம்பரிய உணவுகள், மூலிகை சாறுகள், சூப் வகைகள் விற்பனை செய்யப்பட்டது. நாம் வழக்கமாக பயன்படுத்தும் பிளாஸ்டிக்கில் செய்யப்பட்ட குப்பிகளை பயன்படுத்தாமல் தேங்காய் ஓடு கிண்ணங்கள் மற்றும் களிமண் டம்ளர்களில் உணவுகளை பரிமாறினர். மழையையும் பொருட்படுத்தாமல் மக்கள் உணவு வகைகளை ஆர்வத்தோடு ருசித்தனர்.

பண்டைய மரபு விதைகள், வீட்டுத் தோட்டங்களுக்கான இயற்கை உரம், பானை வடிவில் செய்யப்பட்ட சமையல் மற்றும் வீட்டு உபயோகப் பொருட்களும், சுற்றுச்சூழல் விழிப்புணர்வு புத்தகங்களும் விழாவில் இடம்பெற்றன. பலவகையான இயற்கைக் கீரைகளும் விற்பனை செய்யப்பட்டன. இதோடு அந்த கீரைகளின் நன்மைகள் பற்றியும் விளக்கப்பட்டது. ஓஎஃப்எம் (organic farmers market) சார்பாக சிறுதானியங்கள் மற்றும் அவற்றிலிருந்து தயாரிக்கப்பட்ட பொடி வகைகளும் இடம்பெற்றன.

[You must be registered and logged in to see this image.]

பாதுகாப்பான உணவுக்கான அமைப்பின் ஒருங்கிணைப்பாளர் அனந்து இந்த நிகழ்ச்சி குறித்து பேசும்பொழுது, "இயற்கை உணவு முறையின் பக்கம் மக்களின் பார்வை திரும்பத் தொடங்கியிருக்கிறது. இதை மேலும் வீரியமாக கொண்டு சேர்க்க வேண்டும். இதோடு தாங்கள் பயன்படுத்தும் ஒவ்வொரு பொருளின் பின்னணியில் உள்ள அரசியலையும் மக்கள் புரிந்து கொள்ளவேண்டும். அதோடு சுற்றுச்சூழல் பாதிப்புகளை எடுத்துரைத்து, அவற்றை கைவிட்டு சுற்றுச்சூழல் பாதிப்பற்ற பொருட்களை பயன்படுத்த வேண்டும் என்பதை வலியுறுத்தும் விதமாக இந்த நிகழ்ச்சியை ஒருங்கிணைத்திருக்கிறோம்" என்றார்.

ரெ.சு.வெங்கடேஷ் (மாணவ பத்திரிகையாளர்)

படங்கள்: குமரகுருபரன்