கசாப்புக் கடைக்காரனிடம் கொடுக்கப்படும் ஆடும் சிறீலங்கா கையில் ஒப்படைக்கப்பட்ட தமிழர்களும்

கசாப்புக் கடைக்காரனிடம் கொடுக்கப்படும் ஆடும் சிறீலங்கா கையில் ஒப்படைக்கப்பட்ட தமிழர்களும்
அல்-ஹைடா பயங்கரவாத அமைப்புடன் தொடர்புகளைக் கொண்டிருப்பதாகக் கூறப்படும் சிறீலங்காவினைச் சேர்ந்த ஒருவர் அண்மையில் மலேசியத் தலைநகர் கோலாலம்பூரின் அருகே வைத்துக் கைது செய்யப்பட்டார். விசாரணையின்போது இவர் பாகிஸ்தான் உள்ளகப் புலனாய்வு அமைப்புடன் இணைந்து பணியாற்றிய மொஹமது ஹ§சைனி என்று மலேசியக் காவல்துறையினர் கண்டறிந்தனர்.
கடந்த ஏப்ரல் மாதம் பாகிஸ்தான் உளவு அமைப்புடன் தொடர்புபட்டவர் எனக் குற்றம்சாட்டப்பட்டு, சென்னையில் வைத்து இன்னொரு சிறீலங்காவின் பிரசையான ஷாகிர் உசைன் கைது செய்யப்பட்ட நிலையில் இவர் கைதாகியிருந்தார். இந்த இருவரும் இணைந்தே பணியாற்றியதாகவும், இருவருக்கும் தொடர்புகள் இருப்பதாகவும், ஹ§சைனியின் நெருங்கிய உதவியாளர்தான் ஷாகிர் உசைன் எனவும் விசாரணையின் போது மேலும் தெரியவந்தது.
சென்னை மற்றும் பெங்களூரிலுள்ள அமெரிக்கா மற்றும் இஸ்ரேலிய தூதரகங்கள் மீதான தாக்குதலுக்கு உதவும்படி தனக்கு அறிவுறுத்தப்பட்டதாக விசாரணையின்போது ஹ§சைனி மலேசியக் காவல்துறையினரிடம் தெரிவித்துள்ளார். இதனையே சென்னையில் கைது செய்யப்பட்டவரும் விசாரணையின்போது கூறியிருந்தார். அத்துடன், பாகிஸ்தான உளவு நிறுவனம், மாலைத்தீவிலிருந்து சென்னை மற்றும் பெங்களூருக்கு இருவரை அனுப்ப திட்டமிட்டது எனவும் அவர்களுக்கு தேவையான பயண ஆவணங்கள் மற்றும் மறைவிடங்களை ஏற்பாடு செய்யும் பொறுப்பு தன்னிடம் ஒப்படைக்கப்பட்டிருந்ததாகவும் ஹ§சைனி மலேசியக் காவல்துறையினரிடம் கூறியுள்ளார்.
கடந்த டிசெம்பர் மாதம் முதல் ஹ§சைனியின் செயற்பாடுகளை தீவிரமாக கண்காணித்து வந்த மலேசிய சிறப்புக் காவல்துறைப் பிரிவினர், ஹ§சைனியின் திட்டம் தொடர்பில் இந்திய மத்திய புலனாய்வு பிரிவினருக்கு தகவல்களை வழங்கியிருந்துள்ளனர். இந்நிலையிலேயே சென்னையிலும் சில நாட்களின் பின் மலேசியாவிலும் இந்தக் கைதுகள் இடம்பெற்றுள்ளன. மலேசியாவில் கைது செய்யப்பட்டவரை இந்தியாவிற்கு அனுப்பிவைக்குமாறு கோரிக்கை விடப்பட்டுவருகின்றது. ஹ§சைனியை விரைவாக இந்தியா கொண்டுவருவதற்கான நடவடிக்கைகளை ஆரம்பிக்கும்படி இந்திய புலனாய்வு துறையிடம் தமிழ்நாடு காவல்துறையினர் வலியுறுத்தி வருகின்றனர். ஆனால், பல்வேறு சட்டக்காரணங்களால் ஹ§சைனியை ஒப்படைப்பதற்கு மலேசியா காலம் தாழ்த்தி வருகின்றது.
ஆனால், இதே மலேசியாதான் கசாப்புக் கடைக்காரன் கையில் ஆட்டைப் பிடித்துக் கொடுத்ததுபோல, அப்பாவித் தமிழர்கள் மூவரைப் பிடித்து சிறீலங்காவின் கைகளில் பலிக்கடாக்களாக ஒப்படைத்திருக்கின்றது. இலங்கையில் தமிழர்களை அடக்கியடுக்கிவிட்ட திமிருடன் இருக்கும் சிங்களப் பேரினவாதம், புலம்பெயர்ந்த தமிழர்களை ஒடுக்கமுடியாமற் திணறிவருகின்றது. அவர்களை ஒடுக்குவதற்காக அண்மையில் புலம்பெயர் அமைப்புக்கள் சிலவற்றுக்கும், தனிப்பட்ட நபர்களுக்கும் தடை உத்தரவைக் கொண்டுவந்தது. ஆனால், சிறீலங்காவிற்கு ஆதரவு வழங்குகின்ற அவுஸ்திரேலியா உட்பட கனடா, பிரித்தானியா போன்ற நாடுகள், எந்தவொரு ஆதாரங்களும் இல்லாத இந்தக் குற்றச்சாட்டை ஏற்றுக்கொள்ள மறுத்து, இதற்கு வெளிப்படையாகத் தமது எதிர்ப்பைத் தெரிவித்தன. ஆனால், சிறீலங்காவிற்கு உதவ முன்னிற்கின்ற நாடுகள் இவர்களைக் கைது செய்து கொடுக்க முன்வந்தன. இதில் இந்தியா முன்னணியாக நடவடிக்கை எடுத்து அவர்களை ஒப்படைக்கத் தயாராக இருந்த நிலையில், தற்போது மலேசியா மூன்று தமிழர்களைக் கைது செய்து சிறீலங்கா இனப்படுகொலையாளிகளின் கைகளில் ஒப்படைத்துள்ளது.
அகதிகள் தொடர்பாக சர்வதேச ரீதியாக உள்ள சட்டங்களையும் மதிக்காமல், கைது செய்யப்பட்டவர்கள் தங்களுக்கான நீதியைத் தேடுவதற்கு கால அவகாசமும் வழங்காமல் கொடுங்கோலர்களின் கைகளில் அவர்களை அவசர அவசரமாக ஒப்படைத்துள்ளது. ஏன் என்று கேட்பதற்கு, தமிழர்களுக்கென்றொரு நாடோ அல்லது தமிழர்களுக்கென்றொரு பலம்மிக்க அமைப்போ இல்லை என்பதால், தமிழர்கள் விடயத்தில் தான்தோன்றித்தனமாக சில நாடுகள் செயற்படத் தொடங்கிவிட்டனவோ என்ற அச்சமே, மலேசியாவின் நடவடிக்கை தமிழர்கள் மத்தியில் ஏற்படுத்தியுள்ளது.
முள்ளிவாய்க்கால் இன அழிப்புப் பேரழிவில் இருந்து தப்பிய மக்கள் இன்று பல்வேறு நாடுகளிலும் அரசியல் தஞ்சம் கோரியிருக்கின்றார்கள். அவர்களின் தஞ்சக்கோரிக்கையை பல நாடுகள் ஏற்றுக்கொண்டு அவர்களுக்கு அடைக்கலம் கொடுத்திருக்கின்றது. ஆனால், தஞ்சம்கோரியவர்களை மலேசிய அரசு கைது செய்து கொலையாளிகளின் கையில் ஒப்படைத்துள்ளமையானது சர்வதேச அகதிகளுக்கான சட்டத்தையும், சர்வதேச மனித உரிமை விதிகளையும் முற்றாக மீறிய செயலாகும். அத்துடன், ஓர் இனஅழிப்புக்குத் துணைபோகும் செயலாகவுமே இதனைப் பார்க்கமுடியும். பயங்கரவாத நடவடிக்கையில் ஈடுபட்டதாகக் குற்றஞ்சாட்டப்படும் ஒருவரை ஒப்படைக்க ஆயிரம் சட்டக் காரணங்களைக் கூறும் மலேசியா, பாதிக்கப்பட்ட தமிழர்களை ஒரு கொலைகார அரசின் கைகளில் ஒப்படைப்பதற்கு எந்தவொரு சர்வதேச சட்டவிதிகளையும் பொருட்படுத்தவில்லை.
“பல்லாயிரக்கணக்கான தமிழர்களைக் கொன்று குவித்துவிட்டு, வெளிநாடுகளில் தஞ்சமடைந்துள்ள தமிழர்களையும் தேடிப்பிடித்து உயிரை எடுக்க துடிக்கும் சிறீலங்கா இனவெறி அரசுக்கு மலேசியக் காவல்துறை வேலை செய்கின்றதா?” எனக் கேள்வி எழுப்பியுள்ள மலேசியாவின் பினாங்கு மாகாண துணை முதல்வர் பேராசிரியர் ராமசாமி, “தமிழீழ விடுதலைப்புலிகள் அமைப்பு முற்றாக தோற்கடிப்பட்டுவிட்டதாகக் கூறி சிறீலங்கா அரசாங்கம் வெற்றிவிழாவே கொண்டாடிவிட்ட நிலையில், விடுதலைப் புலிகள் இயக்கத்துக்கு புத்துயிர் கொடுக்க விளைகிறார்கள் என்று கூறி மூன்று தமிழர்களை மலேசியக் காவல்துறை கைது செய்துள்ளது முற்றிலும் வேடிக்கையான ஒன்றாகும்” என்று கண்டனம் தெரிவித்துள்ளார்.
“கைதான மூவரில் இருவருக்கு ஏற்கனவே அகதி அந்தஸ்து வழங்கப்பட்டிருந்தது என்றும் ஒருவர் அரசிடம் தஞ்சம் கேட்டிருந்தார். ஆனால் அப்படிப்பட்டவர்களை இலங்கைக்கு அனுப்பியது தவறானது. இது ஐ.நா.சபையினுடைய விதிமுறைக்கும் எதிரானது. இலங்கையில் அவர்களுக்கு கடுமையான பாதிப்புகள் ஏற்படும் நிலையிலும் அவர்களை அனுப்பி இருப்பது தவறான நடைமுறை’ என்று ஐ.நா. அகதிகள் அமைப்பின் நிர்வாகி யந்தி இஸ்மாயில் கூறியிருக்கின்றார்.
மூவரை மலேசியா நாடு கடத்தியிருப்பதையிட்டு கவலையடைந்திருக்கும் ஐ.நா. உயர்ஸ்தானிகராலயம் (யூ.என்.எச்.சி.ஆர்), இப்போது அவர்கள் பாரதூரமான பாதிப்பான நெருக்கடி நிலையில் இருப்பதாகவும் எச்சரித்திருக்கிறது. அவர்களின் பாதுகாப்பு உறுதிப்படுத்தப்பட வேண்டும் என்று ஐக்கிய நாடுகளின் அகதிகள் பேரவை தமது அறிக்கை ஒன்றில் தெரிவித்துள்ளது.
ஆனால், இவர்களுக்காக கவலைப்படுவதற்கும் சர்வதேச சட்டவிதிகளை மீறிய மலேசியா தொடர்ந்து மேற்கொண்டுவரும் இவ்வாறான நடவடிக்கையை எதிர்காலத்தில் என்றாலும் தடுத்து நிறுத்துவதற்கும் யாரும் ஆக்கபூர்வமான நடவடிக்கைகளை எடுக்கத்துணியவில்லை. இவ்வாறான நடவடிக்கைகளை வேடிக்கை பார்த்துக்கொண்டிருப்பது, மேலும் பலரைச் சிங்களப் பேரினவாதக் கரங்களில் ஒப்படைக்கும் துணிவை ஏனைய நாடுகளுக்கும் கொடுத்துவிடக்கூடும். இலங்கையில் இன்னமும் தமிழர்கள் காணாமல்போய்க்கொண்டும், மர்மமான முறையில் சாவைத் தழுவிக்கொண்டிருக்கும் நிலையில், கொலைக் கரங்களில் ஒப்படைக்கப்படும் இவ்வாறானவர்களை தடுக்க யார் முன்வரப்போகின்றார்களோ?
ஆசிரியர் தலையங்கம்
நன்றி: ஈழமுரசு

கொடுமை...எப்போ மாறும் ஏக்கம்