தோல்விக்கு ஐ.பி.எல்., 'பார்ட்டி' காரணம் : சாக்கு சொல்கிறார் தோனி

செயின்ட்
லூசியா : உலக கோப்பை தொடரில் இந்திய அணி சந்தித்த படுதோல்விக்கு,
ஐ.பி.எல்., 'பார்ட்டிகள்' தான் காரணம் என, கேப்டன் தோனி தெரிவித்துள்ளார்.


வெஸ்ட் இண்டீசில் நடக்கும் மூன்றாவது
'டுவென்டி-20' உலக கோப்பை தொடரில், இந்திய அணி பரிதாபமாக வெளியேறியது.
இலங்கைக்கு எதிரான முக்கிய 'சூப்பர்-8' போட்டியில் இந்திய அணி முதல் 10
ஓவரில் ஒரு விக்கெட்டுக்கு 90 ரன்கள் எடுத்தது. பின் அடுத்த 10 ஓவரில்
பேட்டிங்கில் சொதப்பி, 20 ஓவரில் 5 விக்கெட்டுக்கு 163 ரன்கள் மட்டும்
எடுத்தது.பின் இலங்கை அணிக்கு கேப்டன் சங்ககரா, மாத்யூஸ் தலா 46 ரன்கள்
அடித்து கைகொடுத்தனர். கடைசி பந்தில் கபுகேதரா 'சூப்பர்' சிக்சர் அடிக்க,
20 ஓவரில் 5 விக்கெட்டுக்கு 167 ரன்கள் எடுத்து வெற்றிபெற்றது.
இதையடுத்து, 'சூப்பர்-8' சுற்றில் ஒரு வெற்றிகூட பெறாமல், 'ஹாட்ரிக்'
தோல்வியுடன் இந்தியா வெளியேறியது.

இதுகுறித்து தோனி கூறியது:ஐ.பி.எல்.,
காரணமாகத்தான் உலக கோப்பை தொடருக்கு தயாராக முடியவில்லை எனக் கூறவில்லை.
இத்தொடர், நமது பயிற்சிக்கு பெரும் உதவியாக இருந்தது. இதன் மூலமாகத்தான்
ரெய்னா, ரோகித் சர்மா, ஜடேஜா, பிரக்யான் ஓஜா, அமித் மிஸ்ரா போன்ற வீரர்கள்
உருவாகினர். ஆனால் அதிக போட்டிகளில் விளையாட வேண்டிய நிலையில் வீரர்கள்
தங்கள் உடல்நலத்துக்கு முக்கியத்துவம் கொடுத்திருக்க வேண்டும். ஐ.பி.எல்.,
போட்டிகளுக்கு பின் நடந்த 'இரவு பார்ட்டிகள்' மற்றும் அடிக்கடி பயணம்
செய்தது போன்றவைகள்வீரர்களுக்கு கவனச்சிதறலை ஏற்படுத்திவிட்டது.

நல்ல இலக்கு: இலங்கைக்கு
எதிராக 163 ரன்கள் என்பது நல்ல இலக்கு தான், இருப்பினும் 180க்கும்
அதிகமாக இருந்திருந்தால் நன்றாகயிருந்திருக்கும். தவிர, சேவக், ஜாகிர்
கான் மற்றும் பிரவீண் குமார் போன்ற வீரர்கள் இல்லாததும் இழப்பு தான்.
ஆனால் வீரர்கள் முழுத்திறமையை வெளிப்படுத்தி விளையாடவில்லை என்பது தான்
உண்மை. இது ஏன் எனத்தெரியவில்லை. இருப்பினும் இந்தியா தான் சிறந்த
'டுவென்டி-20' அணி என்பதில் சந்தேகமில்லை.

அணியின் பிரச்னை: 'ஷார்ட்
பிட்ச்' பவுலிங் தான் இந்திய அணிக்கு பெரும் பிரச்னை என்கிறார்கள். இந்த
கருத்தை அவ்வளவு எளிதாக விட்டுவிட முடியாது. தொடர்ந்து 140-150 கி.மீ.,
வேகத்தில் பவுலிங் செய்யும் வீரர்கள் நம்மிடம் இல்லை என்பது தான் உண்மை.
ஏனெனில் இந்திய மைதானங்களும் வேகத்துக்கு ஒத்துழைக் காது. ஆனால் தரமான
சுழற் பந்து வீச்சாளர்கள் உள்ளனர்.

தேசமே பெரிது: பொதுவாக மற்ற
அனைத்தையும் விட தேசம் தான் பெரிது. இதைத்தான் எப்போதும் உயர்வாக
எண்ணுவோம். எங்களால் முடிந்தவரைக்கும் ஒவ்வொருமுறையும் சிறப்பாக விளையாட
முயற்சிப் போம். ஆனால் எப்போதும் தொடர்ந்து வெற்றிபெற முடியாது.

இது சகஜம்: தோல்வி குறித்து
பல்வேறு விமர்சனங்கள் எழுகின்றன. இதுகுறித்து எனக்கு கவலையில்லை. ஏனெனில்
இந்திய அணிக்காக விளையாடும் போதெல்லாம் எப்போதும் ஒருவித நெருக்கடி
இருக்கத்தான் செய்யும். இதெல்லாம் விளையாட்டில் ஒருபகுதிதான். இவ்வாறு
தோனி கூறினார்.

மீண்டும் சொதப்பல் :
ஐ.சி.சி., நடத்தும் சர்வதேச தொடர்களில் இந்தியா தொடர்ந்து சொதப்புகிறது.
கடந்த 2007 உலக கோப்பை (50 ஓவர்) தொடரில் முதல் சுற்றுடன் திரும்பியது.
பின் 2009 'டுவென்டி-20' உலக கோப்பை தொடரிலும் மோசமான தோல்வியை பதிவு
செய்தது. பின் நடந்த சாம்பியன்ஸ் லீக் (மினி உலக கோப்பை) தொடரில் லீக்
சுற்றுடன் திரும்பியது. தற்போது இரண்டாவது முறையாக 'டுவென்டி-20'
தொடரில்'சூப்பர்-8'சுற்றுடன் வெளியேறியுள்ளது. வரும் 2011ல் உலக கோப்பை
(50 ஓவர்) தொடர் நடக்க இன்னும் 10 மாதங்களே உள்ள நிலையில் இந்திய
கிரிக்கெட் போர்டு விழித்துக் கொள்ள வேண்டும். மோடியுடன் வீண் அரசியல்
செய்வதை தவிர்த்து, திறமை வாய்ந்த இளம் வீரர்களை விரைவில் கண்டறிய
வேண்டும்.

தேசம் முக்கியமல்ல :
மூன்றாவது ஐ.பி.எல்., தொடரில் பஞ்சாப்புக்கு எதிரான போட்டியில் வெற்றி
பெற்ற தோனி கூறுகையில்,'' ஐ.பி.எல்., அணி உரிமையாளர்கள் ஏராளமான பணத்தை
இதில் முதலீடு செய்துள்ளனர். அவர்களுக்காக ஏதாவது செய்ய வேண்டும்.
குறைந்தது அரையிறுதி வரையிலாவது அணியை கொண்டு வரவேண்டும். அப்போதுதான்
அவர்களுக்கு மகிழ்ச்சி,'' என்றார். ஆனால் தேசத்தின் மானம் காக்கும் உலக
கோப்பை தொடரில், கோடிக்கணக்கான ரசிகர்களை ஏமாற்றி விட்டார்.

தவறான தேர்வு : ஐ.பி.எல்.,
தொடரில் சாதித்த 'ஆல் ரவுண்டர்' இர்பான் பதான், அதிக விக்கெட் கைப்பற்றிய
பிரக்யான் ஓஜா, அமித் மிஸ்ரா, மனிஷ் பாண்டே புறக்கணிக்கப் பட்டனர். மாறாக
பீல்டிங், பவுலிங் மற்றும் பேட்டிங்கில் தொடர்ந்து சொதப்பும் ரவிந்திர
ஜடேஜா அடுத்தடுத்து வாய்ப்பு பெற்றார். ஜாகிர் கான் காயத்துடன்
பங்கேற்றார். அவ்வப்போது பேட்டிங் ஆர்டரை மாற்றியதும் தோல்விக்கு
காரணமாகிவிட்டது.

வரலாறு தெரியாதா? :கடந்த
1983 உலக கோப்பை, 2007 உலக கோப்பைபைனல்களில் 'டாஸ்' வென்று முதலில்
பேட்டிங் செய்த இந்திய அணி கோப்பை வென்றுள்ளது. ஆனால், 2003 உலக கோப்பை
பைனலில் 'டாஸ்' வென்றும், பீல்டிங் தேர்வு செய்ததால் மோசமாக தோற்றோம்.
இந்த வரலாறு தெரியாத தோனி, 'சூப்பர்-8' சுற்றின் இரண்டு போட்டிகளிலும்,
பீல்டிங் தேர்வு செய்து பெரும் தவறு செய்தார்.

பவுலிங் ஏமாற்றம் : இந்திய
அணியின் பவுலிங்கில் ஆஷிஸ் நெஹ்ரா மட்டும் அதிகபட்சமாக 10 விக்கெட்
வீழ்த்தியுள்ளார். இவரை அடுத்து யூசுப் பதான் 4, தவிர, பிரவீண் குமார்,
ஜாகிர் கான், வினய் குமார் (ஒரு போட்டி), ரவிந்திர ஜடேஜா, யுவராஜ் ஆகியோர்
தலா 2 விக்கெட் கைப்பற்றியுள்ளனர். இதில் ஆச்சர்யப்படத்தக்க விஷயம்
என்னவென்றால், முன்னணி சுழல் பந்து வீச்சாளர் ஹர்பஜன், 5 போட்டியில் ஒரு
விக்கெட் கூட வீழ்த்தாது பெரும் அதிர்ச்சி.

கேப்டன் தான் பொறுப்பு :
'டுவென்டி-20' உலககோப்பையில், இந்திய அணியின் வீழ்ச்சிக்கு, கேப்டன்
தோனியின் தவறான யுக்திகளே காரணம் என்று முன்னாள் வீரர்கள்
குற்றம்சாட்டியுள்ளனர்.

இவர்களது கருத்து:

ரவி சாஸ்திரி: இந்திய
அணியின்படுதோல்விக்கு கேப்டன் தோனி, எந்தக்காரணம் கூறினாலும் அது
ஏற்புடையது அல்ல. ஒரு கேப்டனாக மிகவும் மோசமான செயல்பாடுகளை வெளிப்படுத்தி
உள்ளார் தோனி. பிடிவாதத்துடன் தோனி எடுத்த முடிவுகள் தான் தோல்விக்கு
வழிவகுத்துள்ளன. .

அசாருதின்: உலககோப்பை
தோல்விக்கு, இந்திய வீரர்களின் மட்டமான செயல்பாடுகள் தான் காரணம்.
ஐ.பி.எல்., தொடரின் போது, இரவு முழுவதும் 'பார்ட்டிகளில்' கலந்து கொள்வது
வரவேற்கத்தக்கது அல்ல. 'பார்ட்டிகளில்' கலந்து கொள்வதை வீரர்கள்
தவிர்த்து, போட்டிகளில் கவனம் செலுத்த முயற்சிக்க வேண்டும்.

மதன் லால்: உலககோப்பை
தோல்விக்கு, தோனி கூறும் காரணங்கள் சிறு பிள்ளைத்தனமாக உள்ளன. அவர்
இவ்வாறு கூறுவார் என நான் சற்றும் எதிர்பார்க்க வில்லை.

கிர்மானி: மூன்றாவது
'டுவென்டி-20' உலககோப்பை தொடரில், இந்திய வீரர்கள் பொறுப்பின்றியும்,
நம்பிக்கை இன்றியும் விளையாடினர். இது தான் தோல்விக்கு காரணம். அணியின்
வெற்றிக்காக பாராட்டுக்களை பெற்றுக் கொள்ளும் கேப்டன் தோனி, தோல்விக்கும்
பொறுப்பேற்றாக வேண்டும்.

வெங்சர்க்கார்: ஐ.பி.எல்.,
தொடரில் ஓய்வின்றி விளையாடிய வீரர்கள், உலககோப்பையில் மிகவும் சோர்வுடன்
காணப்பட்டனர். மனதளவிலும், உடலளவிலும் அவர்களுக்கு பலன் இல்லை.