தெரிந்து கொள்ளலாம் வாங்க. உலகின் அதிசயங்களும் ஆச்சரியங்களும் - 22

தெரிந்து கொள்ளலாம் வாங்க. உலகின் அதிசயங்களும் ஆச்சரியங்களும் - 22



மச்சு பிக்ச்சு (Machu Picchu) என்பது, கடல் மட்டத்தில் இருந்து 2,400 மீட்டர் உயரத்தில் அமைந்திருக்கும் இன்கா பேரரசு (inca Empire )  காலத்தைய வரலாற்றுச் சிறப்பு மிக்க ஒரு பழைய நகரம் ஆகும். பெரு நாட்டில் உருபாம்பா பள்ளத்தாக்கின்(Urubamba River) மேலுள்ள மலைத் தொடரில் கஸ்கோ நகரில் இருந்து 80 கிமீ வடமேற்கே காணப்படும் மச்சு பிக்ச்சு , Pachacutec Inca Yupanqui (1438–71), Tupac Inca Yupanqui (1472–93) என்ற இரு இங்காக்கள் காலத்தில் கட்டப்பட்டது. பொதுவாக -இன்காக்களின் தொலைந்த நகரம்- என அழைக்கப்பட்டு வந்த மச்சு பிக்ச்சு, இன்கா பேரரசின் வரலாற்றுச் சின்னமாகக் கருதப்படுகிறது.



மச்சி பிக்ச்சு நகரம் 1450 ஆம் ஆண்டளவில் இன்கா பேரரசின் ஆட்சி உச்சத்தில் இருந்தபோது அமைக்கப்பட்டது. 100 ஆண்டுகளின் பின்னர் 1572 ஆம் ஆண்டில் எசுப்பானியர்களின் (Spain) ஆக்கிரமப்பைத் தொடர்ந்து இந்நகரம் கைவிடப்பட்டதாகக் கூறப்படுகிறது.

எசுப்பானிய ஆக்கிரமிப்பாளர்கள் வருவதற்கு முன்னரேயே இந்நகரத்தின் மக்கள் இங்கு பரவிய பெரியம்மை நோய் காரணமாக அழிக்கப்பட்டிருக்கலாம் என்ற கருத்தும் உண்டு. பிக்ச்சோ என்ற பெயருள்ள ஒரு நகரைப் பற்றி எசுப்பானியர்கள் அறிந்திருந்தார்கள் என்றாலும், அவர்கள் அந்நகருக்கு சென்றார்கள் என்பது குறித்து எவ்வித ஆதாரங்களும் கிடைக்கவில்லை. ஆக்கிரமிப்பாளர்கள் வேறு இடங்களில் உள்ள புராதன கற்பாறைகளை அழித்திருக்கலாம் என்றாலும், மச்சு பிக்ச்சுவில் உள்ளவற்றை அவர்கள் தொடவில்லை என்றே சொல்லப்படுகிறது.காரணம் அழிவுகள் காலத்தால் அழிந்த தடயங்களே அதிகமாக இருக்கிறது.

இப்படியாக ஏதோ ஒரு காரணத்தால் கைவிடப்பட்ட நிலையில் இருந்து, பல நூற்றாண்டுகளாக மறக்கப்பட்டிருந்த இந்த நகரத்தை, 1911 இல் அமெரிக்க வரலாற்றியலாளர் ஹிராம் பிங்கம் என்பவர் மீளக் கண்டுபிடித்தார். அதன் பின்னர் இது ஒரு சுற்றுலாப் பயணிகளின் ஒரு முக்கிய இடமாக மாற்றப்பட்டது. இந்நகரம் 1867ம் ஆண்டிலேயே ஜெர்மனியின் ஆகுஸ்டோ பேர்ன்ஸ் என்னும் பெரும் வர்த்தகரால் கண்டுபிடிக்கப்பட்டு,பின்னர் கைவிடப்பட்டதாக அண்மையில் எடுக்கப்பட்ட ஆய்வுகளில் இருந்து தெரிய வருகிறது.

1981 ஆம் ஆண்டில் இது பெருவின் அரசால் வரலாற்றுச் சின்னமாக அறிவிக்கப்பட்டு, 1983ம் ஆண்டில் யுனெஸ்கோ அமைப்பினால் உலக பாரம்பரியக் களமாக அறிவிக்கப்பட்டது. அத்துடன் 2007ஆம் ஆண்டில் இது புதிய ஏழு உலக அதிசயங்களுள் ஒன்றாகவும் அறிவிக்கப்பட்டது.



மச்சு பிக்ச்சு, இன்கா காலத்தைய கட்டிடக் கலைக்கு சான்றாக அமைந்துள்ளது எனச் சொல்லலாம். உலர் கற்களைக் கொண்டு கட்டப்பட்டதும், பளபளபாக்கப்பட்ட சுவர்களைக் கொண்டுள்ளதாகவும் இருக்கும் இங்கு, இன்டிகுவாட்டானா என்ற சூரியனுக்குக் கட்டப்பட்ட ஒரு கோயில்(Virgins of the Sun ) முக்கிய பகுதியாக கருதப்படுகிறது. Inti Watana என்பது,  சூரியக் கடிகாரம் மற்றும் வானியல் கடிகாரம்/காலண்டர் மூலம் அவர்கள் அன்றைய காலக் கணிப்பை கண்டறிய, ஒரு கல் (Bingham -Quechua மொழியில்),  சூரியனை நோக்கி வைக்கப்பட்டுள்ளது. இதை வைத்து கோடை,குளிர் காலத்தைக் கண்டறிந்தார்கள்.(inti – சூரியன்,watana- நோக்கி கட்டப்பட்ட)



இதைவிட சூரியனைப் பார்ப்பதற்காக, சூரியனை நோக்கி சிறிய தண்ணீர் கண்ணாடியும் அமைக்கப்பட்டுள்ளது.இதே போல் அன்றைய மக்கள் இயற்கை முறைகளைப் பாவித்து, பல அறிவியல் செயற்பாடுகளை உருவாக்கிப் பயன்படுத்திக் கொண்டனர் .

20ம் நூற்றாண்டின் ஆரம்பத்தில் இதனைக் கண்டுபிடித்த ஹிராம் பிங்கம் தன்னுடன் எடுத்துச் சென்ற பல வரலாற்று முக்கியத்துவம் வாய்ந்த பொருட்களை இந்நகருக்கு மீளக் கொண்டு வர பெரு அரசுக்கும் யேல் பல்கலைக்கழகத்துக்கும் இடையில் 2007ம் ஆண்டில் ஒப்பந்தம் ஏற்படுத்தப்பட்டது. ஆண்டுதோறும் பெருமளவு உல்லாசப் பயணிகள் இங்கு முற்றுகை இடுவதும் இக்களத்தின் பாதுகாப்புக்கு அச்சுறுத்தலாக உள்ளது என்று சொல்லப்படுகிறது .

நம் முன்னோர்கள் இயற்கை யுடன் ஒன்றி வாழ்ந்து உள்ளனர்