சனிப்பெயற்சி என்றால் என்ன?

வெறும் கண்ணால் பார்த்தால் தெரிகின்ற புதன், வெள்ளி, செவ்வாய், வியாழன், சனி ஆகிய ஐந்து கிரகங்களும் வானில் மேற்கிலிருந்து கிழக்கு நோக்கிச் செல்லும். இவற்றில் சனி கிரகம் தான் மிக மெதுவாக நகருகிறது என்று ஆதி நாட்களில் கண்டறிந்தார்கள். ஆகவே சனி கிரகத்துக்கு சனைச்சர (சம்ஸ்கிருத சொல்) - மெதுவாகச் செல்கின்ற(து)வன் . பின்னர் சுருக்கமாக சனி என்று அழைக்கப்படலாயிற்று.ஆனாலும் நாம் அதை திட்டும் சொல்லாகவே பயன்படுத்துகிறோம்.களப்பிரயர் காலத்தில் பல தமிழ் நூல்கள்,வடக்கிற்கு கடத்தப்பட்டு, வடசொற்கள் கொடுக்கப்பட்டு, அவர்களால் உருவானதாகவே உரிமை கொண்டாடப்பட்டது. இவற்றில் கிரகங்கள் பற்றியவை,கர்நாடக சங்கீதம்,பரதநாட்டியம் போன்றவையும் சிலவாகும்.

சனிக் கிரகம் சூரியனை ஒரு தடவை சுற்றி முடிக்க 29.5 ஆண்டுகள் ஆகின்றன. அதனால் ஒவ்வொரு ராசியிலும் இரண்டரை ஆண்டுகள் இருக்கும். பின்னர் நட்சந்திரகளுக்காக மேலும் நான்காகப் பிரித்து, பலன் சொல்கிறார்கள்.கெப்ளர் (Kepler) என்ற ஜெர்மன் வானவியல் நிபுணர் கண்டறிந்து கூறிய விதிகளின்படி, ஒரு கிரகம் எந்த அளவுக்கு சூரியனிலிருந்து மிக அப்பால் உள்ளதோ, அந்த அளவுக்கு அது தனது சுற்றுப் பாதையில் மெதுவாகச் செல்லும். சூரிய மண்டலத்தில் சனி கிரகம் வியாழனுக்கு அப்பால் ஆறாவது வட்டத்தில் அமைந்துள்ளது. இதனால் தான் மிகவும் மெதுவாக சுற்றுகிறது.



நாம் காணும் வானில் சூரியனும் சந்திரனும் செல்கின்ற பாதையில் தான் கிரகங்களும் நகர்ந்து செல்கின்றன. இப்பாதைக்கு வான் வீதி (zodiac) என்று பெயர். அடையாளம் காண்பதற்கு வசதியாக இருக்க வேண்டும் என்பதற்காக அந்த நாளிலேயே வானவியலார் இதை 12 ராசிகளாகப் பிரித்தனர். இந்த ராசிகள் நட்சத்திரங்கள் அடங்கியவை. இந்த ராசிகளின் எல்லைகள் நாமாக கற்பனையாக ஏற்படுத்திக் கொண்டவை. கிரகங்கள் நகர்ந்து செல்லும் போது இயல்பாக இடம் மாறிக் கொண்டிருக்கும். ஒரு கிரகம் சிம்ம ராசியில் இருப்பதாக வைத்துக் கொண்டால் அக்கிரகத்துக்குப் பின்னால் பல கோடி கிலோ மீட்டருக்கு அப்பால் சிம்ம ராசி நட்சத்திரங்கள் இருக்கும்.

அந்த வகையில் வானில் துலா ராசி எனப்படும் பகுதி வழியே இதுவரை நகர்ந்து கொண்டிருந்த சனி கிரகம், நவெம்பர் 2 ,2014 இல் விருச்சிக ராசியின் கற்பனையான எல்லையில் இருந்து நகரும்.இந்த திகதி கணிப்பு கணிப்பவர்களுக்கு ஏற்ப சிறிது மாறுபடுகிறது. இதுவே சனிப் பெயர்ச்சி ஆகும். இதிலிருந்து எந்த கிரகமும் ஒரு ராசியில் ஒரே இடத்தில் நிலையாக இருப்பது கிடையாது என்பதைப் புரிந்து கொண்டிருக்கலாம்.