எழுத்தாளர்களைப் பார்த்து சாதாரண மக்கள் கேட்க விரும்பும் கேள்விகள் :

by **mmani** Sat May 10, 2014 7:56 pm

எழுத்தாளர்களைப் பார்த்து சாதாரண மக்கள் கேட்க விரும்பும் கேள்விகள் :

1. அதென்ன உங்களுக்கு மட்டுமே அறிவு பொங்கி வழிவதாக ஒரு நினைப்பு ? நீங்கள் மட்டும்தான் சோறு தின்கிறீர்களா ? நாங்கள் என்ன வைக்கோல் தின்கிறோமா ?
2. என்றாவது நீங்கள் ‘உண்டு’ என்றதை ‘இல்லை’ என்றும், ‘இல்லை’ என்றதை ‘உண்டு’ என்றும் மாற்றி எழுதாமல் இருந்திருக்கிறீர்களா ?
3. மகத்தான உண்மைகளை மட்டுமே எழுதுகிறோம் என்கிறீர்களே, உங்களுக்குள்ளேயே இன்னொருவர் அதற்கு மாறானதை எழுதுகிறாரே, அப்படியானால் உங்களில் யார் உண்மையின் பக்கம் ? அல்லது உண்மைக்கு நீங்கள் இருதரப்பினரும் வெகு தொலைவில் இருக்கிறீர்களா ?
4. நாடு முழுவதும் சுற்றிப் பார்த்து கோடானுகோடி மக்கள் முகங்களைத் தரிசித்து எழுதுவதாகச் சொல்கிறீர்களே, அப்படியானால் இந்தியன் ரயில்வேயில் எஞ்சின் டிரைவராகப் பணியாற்றுகிறவர் உங்களை விட உயர்ந்தவர் என்று ஏற்றுக்கொள்வீர்களா ?
5. படிப்பதில்லை, படிப்பதில்லை என்று மக்களைக் குறை சொல்கிறீர்களே, சென்னைப் புத்தகக் கண்காட்சியில் கடைவிரிக்கப்பட்டிருந்த லட்சக்கணக்கான புத்தகங்களில் நீங்கள் எத்தனை புத்தகங்களைக் கரைத்துக் குடித்து முடித்திருக்கிறீர்கள் ?
6. அவ்வளவு ஏன், வருடத்திற்கு நீங்கள் எத்தனை ரூபாய்க்குப் புத்தகங்கள் வாங்குகிறீர்கள் ? அல்லது உங்கள் வருவாயில் புத்தகங்களுக்குச் செலவிடும் தொகை எத்தனை விழுக்காடு ?
7. நீங்கள் எழுதுவதற்காகவும் வாழ்வதற்காகவும் என்னென்ன சமரங்களைச் செய்துகொண்டீர்கள் என்று வெளிப்படையாகச் சொல்ல முடியுமா ?
8. தகவல் அறியும் உரிமைச் சட்டத்தைப் பயன்படுத்தி, பத்து ரூபாய் கோர்ட் ஸ்டாம்ப் ஒட்டி, நான்கு கேள்வி வாக்கியங்கள் எழுதி அனுப்பி இதுவரை எத்தனை உண்மைகளை வெளிக்கொணர்ந்து மக்களுக்குத் தெரிவித்திருக்கிறீர்கள் ?
9. உங்கள் ஆயுதமான மொழியை நீங்கள் நூறு விழுக்காடு பிழையே இல்லாமல் எழுதிக்கொண்டிருக்கிறீர்கள் என்று உங்களால் உறுதியாகக் கூற முடியுமா ?
10. எல்லாச் சீரழிவும் நிகழ்ந்துகொண்டிருக்கும் இந்தக் காலத்தில் குறைந்தபட்சம் நீங்களாவது பத்தரை மாற்றுத் தங்கமாக இருந்திருந்தால் நிலைமை எவ்வளவு நன்றாக இருந்திருக்கும் ?