மறந்து போனதா தேசியக் கொடி வர்ணம்?

by **logu** Tue May 11, 2010 4:39 am

ஊட்டி
: ஊட்டியின் நுழைவுவாயிலில் உள்ள காந்தி சிலையின் கீழ் வரையப்பட்ட தேசியக்
கொடியில், காவி நிறத்துக்கு பதில் சிவப்பு வர்ணம் பூசப்பட்டிருந்தது;
இதைக் கண்டித்து இந்து முன்னணியினர் உண்ணாவிரதத்தில் ஈடுபட்டனர்.

ஊட்டிக்கு வருபவர்களை வரவேற்க, சேரிங்கிராஸ்
பகுதியில் மகாத்மா காந்தி சிலை உள்ளது. நகரின் முக்கிய நிகழ்வுகள்,
இங்கிருந்து தான் துவங்கப்படும். சிறப்பு வாய்ந்த இப்பகுதியில், சில
நாட்களுக்கு முன் தேசியக் கொடி வரையப்பட்டது; இதில், காவி நிறத்துக்கு
பதில், அபாயத்தை உணர்த்தும் சிவப்பு வர்ணம் பூசப்பட்டிருந்தது. தேசியக்
கொடி வரையப்பட்டு பல நாட்கள் கடந்தும், அதிகாரிகள் யாரும் கண்டுகொள்ளாத
நிலையில், நேற்று காலை, இப்பகுதிக்கு சென்ற இந்து முன்னணி அமைப்பாளர்
செல்வகுமார், போலீசார் மற்றும் நகராட்சி அதிகாரிகளுக்கு புகார்
தெரிவித்துள்ளார். நேரம் கடந்தும் அதிகாரிகள் யாரும் வராததால்,
அதிருப்தியடைந்த இவரும், அமைப்பினர் சிலரும், சேரிங்கிராஸ் பகுதியில்
திடீர் உண்ணாவிரதத்தில் ஈடுபட்டனர்; இதைக் கண்ட புலனாய்வு போலீசார்,
போலீஸ் உயரதிகாரிகள் மற்றும் நகராட்சி அலுவலருக்கு தகவல்
தெரிவித்தனர்.நகராட்சியின் சுகாதார அலுவலர்கள் இப்பகுதிக்கு சென்று,
உண்ணாவிரதத்தில் ஈடுபட்டவர்களிடம், நடந்த தவறுக்கு வருத்தம் தெரிவித்தனர்.
இருப்பினும், சிவப்பு நிறத்துக்கு பதில் காவி நிறத்தை வரையாமல்,
முழுவதையும் அகற்றி விட்டனர்; காந்தி சிலையையும் சுத்தமாக்கினர்.

கோவை, நீலகிரி மாவட்ட இந்து முன்னணி அமைப்பாளர் செல்வகுமார் கூறுகையில்,
''ஊட்டி சேரிங்கிராஸ் வழியாக, மாவட்ட கலெக்டர், எஸ்.பி., டி.எஸ்.பி., என
போலீசார், உயரதிகாரிகள் பலர் சென்று வரும் நிலையில், வர்ணம் குறித்து
யாரும் கண்டுகொள்ளவில்லை. ஒவ்வொரு விழாவுக்கும் காந்தி சிலைக்கு மாலை
அணிவிக்கின்றனர். கொடியின் நிறம் மாறியுள்ளது, தேசிய அவமானம் என்பது கூட
யாருக்கும் தெரியாமல் போனது வேதனையளிக்கிறது. அபாய எச்சரிக்கை விடுக்கும்
சிவப்பு நிறத்தை, தேசியக் கொடி வர்ணத்துக்கு பயன்படுத்தியுள்ளது, சுதந்திர
உணர்வாளர்களை புண்படுத்தியுள்ளது. நானும் சிலரும் உண்ணாவிரதம் இருந்த போது
தான், நகராட்சி அதிகாரிகள் வந்து அகற்றினர்,'' என்றார். இவர்களின்
உண்ணாவிரதத்தால், இப்பகுதியில் பரபரப்பு ஏற்பட்டது.