ஜெனீவாவில் இருந்து திரும்பிய பின்னர் அனந்திக்கு அச்சுறுத்தல்?

by **piraba** Fri Mar 28, 2014 9:12 am

ஜெனீவாவில் நடைபெற்ற மனித உரிமை பேரவையில் உரையாற்றிவிட்டுச் சென்றதன் பின்னர் வடமாகாண சபை உறுப்பினர் அனந்தி சசிதரனுக்கு அச்சுறுத்தல் ஏற்பட்டுள்ளதாக அறியவந்துள்ளது.

வழமையாக அவரது வடமாகாணசபைக் கூட்டங்கள் மற்றும் சந்திப்புக்களுக்குச் சென்றுவர போக்குவரத்திற்கு உதவிய முச்சக்கரவண்டிச் சாரதி, ஜெனீவாவில் இருந்து திரும்பியதன் பின்னர், தனக்கு ஆபத்து எனக்கூறி போக்குவரத்தில் ஈடுபட மறுத்துள்ளார். அத்துடன், அவரது வீட்டில் உதவியாகப் பணியாற்றிய பெண் ஒருவரும் தனக்கு விடுமுறை தேவையெனக் கூறி வெளியேறியுள்ளதாக அறியவருகின்றது.

இதுகுறித்து அனந்தியுடன் தொடர்புகொள்ள முனைந்தபோதும் தொடர்புகளை ஏற்படுத்த முடியவில்லை. எனினும் அயலவர்களின் தகவலின்படி தற்போது அவரும் அவரது பிள்ளைகளும் பாதுகாப்புக் காரணங்களுக்காக வேறு வீடுகளில் தங்கியிருப்பதாகத் தெரியவருகின்றது. ஏற்கனவே தேர்தலில் போது அவரது இல்லத்தின் மீது தாக்குதல் நடத்தப்பட்டது குறிப்பிடத்தக்கது.

இதேவேளை, வடமாகாணத்தில் அதிகூடிய விருப்பு வாக்ககளைப் பெற்று வெற்றி பெற்ற அனந்தி சசிதரனுக்கு, கூட்டமைப்பினர் குறைந்த பட்ச பாதுகாப்பான போக்குவரத்து வசதிகளைக்கூடச் செய்துகொடுக்கவில்லை எனவும், திட்டமிட்ட ரீதியில் அவரைப் புறக்கணிக்க முயன்றுவருவதாகவும் வடமாகாண மக்கள் குற்றம்சாட்டி வருவது குறிப்பிடத்தக்கது.

அத்துடன், கடந்த வாரம் கொழும்பு சென்று இறங்கிய அனந்தி சசிதரனை கூட்டமைப்பினர் இருவர் வந்து பாதுகாப்பாக அழைத்துச் சென்றனர். எனினும், சர்வதேச நாடொன்றின் அழுத்தம் காரணமாகவே அவரை வந்து அழைத்துச் சென்றதாகத் தற்போது தெரியவருகின்றது.