ஐதராபாத் நகரை தாக்க பயங்கரவாதிகள் திட்டம் : போலீஸ் உஷார்

by **Tamil** Wed May 05, 2010 9:32 pm

ஐதராபாத்:
ஐதராபாத்தில் தகவல் தொடர்பு அலுவலகங்கள் மற்றும் சர்வதேச ஆடிட்டிங்
அலுவலகங்களை குறிவைத்து தகர்க்கும் சதியில் ஈடுபட்ட அல்-குவைதா தொடர்புள்ள
பயங்கரவாதி கைது பரபரப்பை ஏற்படுத்தியிருக்கிறது.இந்தியாவின் பல நகரங்களை
பயங்கரவாதிகள் தாக்கும் அபாயம் உள்ளதாக அமெரிக்க புலனாய்வு அமைப்புகள்
தொடர்ந்து உஷார்படுத்தி வந்தன. இந்த எச்சரிக்கையை தொடர்ந்து கனடா மற்றும்
ஆஸ்திரேலிய நாடுகளும் தங்கள் நாட்டு மக்கள் இந்திய பயணம் மேற்கொள்வதை
தவிர்க்கும் படி எச்சரித்தன.

இந்தியாவுக்கு போக வேண்டிய அவசியம் ஏற்பட்டால்
சந்தை பகுதிகளில் எச்சரிக்கையோடு இருக்கும் படி
அறிவுறுத்தப்பட்டது.அமெரிக்காவின் எச்சரிக்கை காரணமாக டில்லியில்
பாதுகாப்பு கெடுபிடிகள் உள்ளன. பெங்களூரு கிரிக்கெட் ஸ்டேடியத்தில் கடந்த
மாதம் குண்டு வைத்த பயங்கரவாதிகள் அண்டை மாநிலங்களில் ஊடுருவியுள்ளதாக
புலனாய்வு அமைப்புகள் தெரிவித்துள்ளன.குறிப்பாக ஆந்திர தலைநகர்
ஐதராபாத்தில் பயங்கரவாதிகள் ஊடுருவியுள்ளதாக தேசிய புலனாய்வு அமைப்புகள்
எச்சரித்திருந்தன. இதையடுத்து, போலீசார் தொடர் கண்காணிப்பு பணியில்
ஈடுபட்டு வந்தனர்.

ஐதராபாத்தில் 151 ஏக்கர் பரப்பளவில்
அமைந்துள்ள தகவல் தொழில்நுட்ப அலுவலகங்கள் நிறைந்த, 'ஹைடெக் சிட்டி'யை
தகர்க்க பயங்கரவாதிகள் திட்டமிட்டுள்ளனர் என்ற ஆதாரப்பூர்வ தகவலையடுத்து
ஆந்திர அரசு உஷார் படுத்தப்பட்டது.இதையடுத்து, ஹைடெக் அலுவலகங்களும்,
'டிலாய்டி டச் தோமாட்சு' என்ற சர்வதேச ஆடிட்டிங் நிறுவனம் அமைந்துள்ள
பகுதியில் ரகசிய கேமராக்கள் மூலம் 24 மணி நேர கண்காணிப்பு பணிகள் முடுக்கி
விடப்பட்டன.இந்நிலையில் நேற்று முன்தினம், டிலாய்டி டச் தோமாட்சு
நிறுவனத்தில் டாக்சி டிரைவராக வேலை பார்த்த முகமது ஜியா உல் ஹக் என்ற
இளைஞரை போலீசார் கைது செய்தனர்.

இவனிடம் விசாரணை நடத்தியதில் இவன் பெயர் ஜியா
உல் ஹக் என்றும் லஷ்கர்-இ-தொய்பா அமைப்பிடம் பயங்கரவாத பயிற்சி பெற்றவன்
என்பதும் தெரிந்தது.கடந்த 1995ம் ஆண்டு சவுதி அரேபியாவில், அல்-குவைதா
அமைப்பில் சேர்ந்த ஹக், பாகிஸ்தானின் துறைமுக நகரமான கராச்சியிலும்
பாகிஸ்தான் ஆக்கிரமிப்பு காஷ்மீரில் உள்ள முசாபராபாத்திலும் ஆயுத பயிற்சி
பெற்றுள்ளான். அதுமட்டுமல்லாது வெடிகுண்டுகளை வெடிக்க செய்வதிலும்
கைதேர்ந்தவன் என்பது தெரியவந்துள்ளது.கடந்த 2006ல் ஐதராபாத் ஓடியன்
தியேட்டரில் நடந்த குண்டு வெடிப்பு சம்பவத்திலும் இவனுக்கு பங்கு
உண்டு.ஐதராபாத்தில் சில நிறுவனங்களில் இவன் ஏற்கனவே டிரைவர் வேலை பார்த்து
பல பகுதிகளை நோட்டமிட்டு வந்துள்ளான்.

டிலாய்டி டச் தோமாட்சு நிறுவனத்தை தகர்க்கும்
நோக்குடன் இந்நிறுவனத்தில் அவன் டாக்சி டிரைவராக வேலைக்கு சேர்ந்துள்ளது
கண்டுபிடிக்கப்பட்டுள்ளது.இவனிடம் வரைபடங்கள் உள்ளனவா, இவனது பின்னணி என்ன
என்ற விசாரணை தீவிரமாகியிருக்கிறது. இவன் திட்டம்
நிறைவேற்றப்பட்டிருந்தால், உயிர்ச்சேதம் மற்றும் பொருட்சேதம் அதிகம்
ஏற்படும் வகையில் குண்டுவெடிப்பு அரங்கேறியிருக்கும் என்று போலீஸ்
தரப்பில் தெரிவிக்கப்பட்டது. sourse:dinamalar