ஆஸி. மானுஸ் தடுப்பு முகாமில் இலங்கை இராணுவத் தளபதி: அதிர்ச்சித் தகவல் - மனித உரிமை சட்டத்தரணிகள் கண்டனம்

by **ஜனனி** Mon Feb 24, 2014 5:55 am

மானுஸ் தீவுகளில் உள்ள தடுப்பு நிலையத்தின் நடவடிக்கை முகாமையாளராக இலங்கையின் முன்னாள் இராணுவ அதிகாரியை நியமிக்கும் முடிவை மனித உரிமை மற்றும் தஞ்சம் கோரும் சட்டத்தரணிகள் கண்டித்துள்ளனர்.
தினேஷ் பெரேரா என்ற இந்த அதிகாரி G4S என்ற பாதுகாப்பு நிறுவனத்தில் பணியாற்றி வருவதாக அவுஸ்திரேலியாவின் ஏ.பி.சி ஊடகம் உறுதிப்படுத்தியுள்ளது.

பெரேரா, மானுஸ் தீவில் இயங்கும் G4S நிறுவனத்தின் பதில் நடவடிக்கை முகாமையாளராக பணியாற்றி வருவதாக அவுஸ்திரேலிய குடிவரவு அமைச்சின் பேச்சாளர் ஒருவர் தெரிவித்தார்.

G4S மற்றும் தடுப்பு நிலையத்திற்கு சேவைகளை வழங்கி வரும் பணியாளர்கள் அனைவரும் தேவையான விதிமுறைகள் தொடர்பாக ஆராய்ந்த பின்னரே அந்த பணிகளில் நியமிக்கப்பட்டுள்ளனர்.

நற்குணம், நன்னடத்தை போன்ற விடயங்கள் தொடர்பில் அவுஸ்திரேலிய சமஷ்டி பொலிஸாரின் அனுமதி பெறப்பட்டுள்ளதுடன் அவர்களுக்கு தேவையான பயிற்சிகளும் வழங்கப்பட்டுள்ளதாக அந்த பேச்சாளர் குறிப்பிட்டார்.

தினேஷ் பெரேராவின் நியமனம் குறித்து அவரை பணியில் அமர்த்திய நிறுவனத்திடமே கேள்வி எழுப்ப வேண்டும் எனவும் அவர் கூறியுள்ளார்.

அதேவேளை இது குறித்து கருத்து வெளியிட்டுள்ள சட்டம் மற்றும் மனித உரிமை சட்டங்கள் தொடர்பான ஆராய்ச்சி நிலையத்தின் பணிப்பாளர் எமிலி அவ்ஹி, தினேஷ் பெரேரா அந்த பணியில் இருந்து நிக்கப்பட வேண்டும் என தெரிவித்துள்ளார்.

நலன்புரி மற்றும் நல்வாழ்வுக்கு பொறுப்பாக இலங்கை இராணுவத்துடன் தொடர்புடையவர்கள் நியமிக்கப்படுவது பொருத்தமற்றதுடன் அது தமிழர்கள் உட்பட தஞ்சம் கோருவேரை முற்றாக பாதிக்கும்.

அத்துடன் இது இலங்கையில் இருந்து வெளியேறிய தமிழர்கள் குற்றம் சுமத்திய இராணுவத்தினரிடம் அவர்களை ஒப்படைக்க பாரிய சந்தர்ப்பமாக அமைந்து விடும்.

ஒரு மனிதனின் நடவடிக்கைகளை பற்றி அல்ல அவுஸ்திரேலியா தன்னிடம் தஞ்சம் கோரி தனது கட்டுப்பாட்டில் உள்ளவர்களின் நலனில் அக்கறை காட்ட வேண்டும் என்றும் எமிலி குறிப்பிட்டார்.
இலங்கை போன்ற ஒரு நாட்டின் அகதிகள் இருக்கும் இடத்தில் முன்னாள் இராணுவ அதிகாரியை இருப்பது தஞ்சம் கோரி தப்பி வந்தவர்கள் ஆபத்துக்களை ஏற்படுத்துவதுடன் உணர்வுகளிலும் பாதிப்புகளை ஏற்படுத்தும் என சுட்டிக்காட்டப்பட்டுள்ளது.

மானுஸ் தடுப்பு முகாமில் தடுத்து வைக்கப்பட்டுள்ள 1300 பேரில் சுமார் 300 இலங்கை தமிழ் புகலிட கோரிக்கையாளர்கள் உள்ளதாக தெரிவிக்கப்படுகிறது.

இலங்கை அரசாங்கத்திற்கும், தமிழ் பிரிவினைவாத புலிகள் இயக்கத்திற்கும் இடையில் இரண்டு தசாப்தங்களுக்கு மேலாக நடைபெற்று வந்த கடுமையான உள்நாட்டு போர் 2009 ஆம் ஆண்டு முடிவுக்கு வந்தது.

எனினும் அங்கிருந்து புகலிடம் கோரி பலர் அவுஸ்திரேலியாவுக்கு சென்றனர். அவர்களை அவுஸ்திரேலிய அரசாங்கம் அருகில் உள்ள தீவுகளில் இருக்கும் தடுப்பு நிலையங்களில் தங்க வைத்துள்ளது.