பொய் வழக்கு காரணமாக , அழகான சிறு குடும்பம் தற்கொலை செய்து கொண்டது ?

by **மாலதி** Mon Feb 24, 2014 7:39 am

இந்த சிறுமியை பாருங்கள் என்ன பாவம் செய்தால் இவளும் சாக ?

(காவல்துறையில் கண்ணியம் வேண்டும் ,காவல் நிலையம் வரும் நேர்மை யாலர்களிர்க்கு, அவர்களின் உண்மைக்கு , உரிமைக்கு உத்திரவாதம் அளிக்க வேண்டும் - பகிருங்கள் இந்த செய்தியை )

காரில் இருந்தபடி கியாஸ் சிலிண்டரை திறந்து விட்டு, காரை வெடிக்கச் செய்து ஒரே குடும்பத்தைச் சேர்ந்த 3 பேர் தற்கொலை செய்து கொண்டனர்.

அதற்க்கான காரணம் என்று கிடைத்த கடிதத்தின் விவரங்கள் இங்கே :

பரிபூரணம் என்ற கண்ணன் காண்டிராக்ட்ராக இருந்து வந்தார். வட்டிக்கு பணம் கொடுத்து வாங்குவது, நிலம் வாங்கி விற்பனை செய்வது உள்ளிட்ட தொழில்களும் செய்து வந்தார். அவருடைய மகள் சுமதி பாளையங்கோட்டையில் உள்ள ஒரு பள்ளிக்கூடத்தில் 9-ம் வகுப்பு படித்து வந்தார்.

கண்ணனிடம் ஏராளமானவர்கள் வட்டிக்கு பணம் வாங்கி இருந்தனர். இதேபோல் நிலம் வாங்கி விற்றதில் கண்ணன், ஏராளமானவர்களுக்கு பணம் கொடுக்க வேண்டியதும் இருந்தது. ஏரலைச் சேர்ந்த 3 பேர் கண்ணனிடம், வட்டிக்கு பணம் வாங்கி இருந்தனர். அந்த பணத்தை கண்ணன் பலமுறை கேட்டார். ஆனால் அவர்கள் கொடுக்க மறுத்தனர். மாறாக கந்துவட்டி வசூலிப்பதாக கண்ணன் மீது ஏரல் போலீசில் புகார் செய்தனர்.

அதன் பேரில், கண்ணனை விசாரணைக்காக போலீசார் ஏரலுக்கு அழைத்தனர். நம்மிடம் பணம் வாங்கிக்கொண்டு, நம்மை போலீசில் புகார் செய்து விட்டார்களே என்று கண்ணன் மனம் வருந்தினார். குடும்ப கவுரவம் பாதிக்கப்படுவதாக கருதி தற்கொலை செய்து கொள்ளும் விபரீத முடிவுக்கு வந்தார்.

நேற்று மதியம் வீட்டில் மனைவி, குழந்தைகளுடன் மதிய உணவை சாப்பிட்டார். பிறகு மனைவி, குழந்தையை அழைத்துக்கொண்டு காரில் புறப்பட்டார். அதற்கு முன்பாக வீட்டில் இருந்த கியாஸ் சிலிண்டரை எடுத்து காரில் வைத்துக் கொண்டார்.

காரை, தனது வீட்டில் இருந்து சிறிது தூரத்தில் உள்ள அரியகுளம் காட்டுப்பகுதிக்கு ஓட்டிச் சென்றார். அங்கு யாரும் இல்லாத இடத்தில் காரை நிறுத்தினார். கார் கண்ணாடி கதவை அனைத்தும் மூடினார். பிறகு வீட்டில் இருந்து எடுத்துச் சென்ற கியாஸ் சிலிண்டரை திறந்து விட்டார். கியாஸ் கார் முழுவதும் நிரம்பிய நிலையில் மனைவி, குழந்தைகளுடன் சாக துணிந்த கண்ணன், மனதை கல்லாக்கிக் கொண்டு தீக்குச்சியை பற்ற வைத்து இருக்கிறார். கண் இமைக்கும் நேரத்துக்குள் கார் வெடித்து சிதறியது. காருக்குள் இருந்த கண்ணன் உள்பட 3 பேரும் உடல் சிதறி பலியானார்கள்.

விசாரணையில் மேற்கண்ட தகவல்கள் தெரியவந்தன.

உறவினர்கள் கதறல்

இறந்து கிடந்தவர்களின் உடல்களை கண்டு, கண்ணனின் தாய் கதறி அழுதது பரிதாபமாக இருந்தது.