காதலர் தினத்தில் இரத்த தானம்! யாழ். ஏழாலை இளைஞர்களின் முன்மாதிரிச் செயற்பாடு.

by **மாலதி** Tue Feb 18, 2014 8:00 am

யாழ்.ஏழாலை தெற்கு ஜொனியன்ஸ் விளையாட்டுக்கழக இளைஞர்கள் கடந்த 14 ஆம் திகதி வெள்ளிக்கிழமை உலகளாவிய ரீதியில் அனுஸ்டிக்கப்பட்ட காதலர் தினத்தை முன்னிட்டு இரத்ததானம் செய்து ஏனைய இளைஞர்களுக்குச் சிறந்ததொரு முன்மாதிரியை வெளிப்படுத்தியுள்ளனர்.

மேற்படி இரத்த தான முகாம் காதலர் தினத்தன்று காலை 09மணி முதல் பிற்பகல் 02 மணி வரை ஏழாலை ராஜ்குமார் கடையடிக்கு அண்மையிலள்ள வர்த்தக நிலையத்தில் நடைபெற்றது.

இதில்,தெல்லிப்பழை ஆதார வைத்தியசாலையின் இரத்த வங்கிப் பிரிவினர் நேரில் சென்று குருதியைப் பெற்றுக் கொண்டனர்.

இவ் இரத்த தான முகாமில் 24 ஆவது தடவையாக இரத்த தானம் வழங்கிய விளையாட்டுக்கழக அங்கத்தவரான பா.தினேஸ்குமார் (வயது-30) கருத்துத் தெரிவிக்கையில்,

நான் எனது 17 ஆவது வயதில் யூனியன் கல்லூரியிpல் யு|டு படிக்கும் போதிருந்து இரத்ததானம் வழங்கி வருகிறேன்.இரத்ததானம் தானங்களில் சிறந்த தானம் என்பதாலும், புற்று நோய் போன்ற கொடிய நோய்களுக்கு ஆட்பட்டவர்கள் இரத்தமின்றி உயிரிழக்கக் கூடாது என்பதற்காகவும் சமூக சேவை மனப்பான்மையோடு இரத்ததானம் வழங்குவதில் மன நிறைவடைகிறேன்.

இரத்தம் கொடுப்பதால் உடலுக்கு எந்தவிதத் தீங்குமில்லை. பக்க விளைவுகளுமில்லை. எனவே எந்தவொரு அச்சமுமின்றி இரத்தானம் வழங்க எம்மவர்கள் முன்வர வேண்டும் என்றார்.

இதன் போது 19 ஆவது தடவையாக இரத்ததானம் வழங்கிய விளையாட்டுக்கழக அங்கத்தவரான நா.ரொபின்சன்(வயது-28) கருத்துத் தெரிவிக்கையில்,

நான் ஒரு மின்சார சபை ஊழியராகக் கடமையாற்றுகிறேன். ஒவ்வொரு 04 மாதத்திற்கு ஒரு தடவையும் இரத்தானம் வழங்குகிறேன். இரத்தம் கொடுக்கும் போதெல்லாம் ஒரு உயிரைக் காப்பாற்றப் போகிறேன் என்ற எண்ணம் என்னுள் எழுகிறது. இந்த எண்ணம் எனக்குள் ஒரு வித நெகிழ்வைத் தருகிறது என்றார்.

இந் நிகழ்வில் 11 ஆவது தடவையாக இரத்த தானம் வழங்கிய ஜெ.லியோலக்சன்(வயது-22)கருத்துத் தெரிவிக்கையில்,

இரத்த தானம் செய்யும் போது எமது உடலிலிருந்து இழக்கும் இரத்தம் பின்னர் தானாகவே சுரக்கும். “நாம் வாழும் போது இன்னொரு உயிரையும் வாழ வைத்தோம்” என்ற ஒரு உணர்வு எம்முள் உருவாவதற்கு இரத்தானம் நல்லதொரு வாய்ப்பாக அமைகிறது என்றார்.

இம் முகாமில் முதன் முதலாகக் கலந்து கொண்டு இரத்ததானம் வழங்கிய எ.சசிகரன் (வயது-17) கருத்துத் தெரிவிக்கையில்,

நான் கொக்குவில் இந்துக்கல்லூரியிpல் கல்வி கற்று வருகிறேன்.குடும்பத்தில் நானும் எனது அண்ணாமார்களான இருவரும் இன்றைய இரத்தான முகாமில் கலந்து கொண்டு இரத்தம் வழங்கினோம்.

எனது அண்ணாமார்களான எ.தினேஸ்காந்(வயது-20), எ.குணாளன்(வயது-18) ஆகிய மூவரும் இணைந்து இரத்தம் வழங்கினோம். எனது அண்ணாமார்கள் முன்னரும் இரத்ததானம் வழங்கியுள்ளனர். எனவே அவர்களைப் பின்பற்றி இன்றைய நல்ல நாளில் இரத்த தானம் செய்வதில் மகிழ்ச்சியடைகிறேன் என்றார்.

இம் முகாமில் முதன் முதலாகக் கலந்து கொண்டு இரத்தானம் வழங்கிய இன்னொருவரான ச.ஹரிராமசங்கர்(வயது-17) கருத்துத் தெரிவிக்கையில்,

சமூக நோக்கான பார்வையில் நானாக முன்வந்து இரத்ததானம் செய்வதில் மகிழ்ச்சியடைகிறேன்.இந்த அனுபவம் எனக்குப் புதிதாய் அமைந்தது என்றார்.

காதலர் தினத்தன்று குறித்த இளைஞர்கள் முன்வந்து இரத்தானம் வழங்கியமை ஏனையவர்களுக்கு மிகச் சிறந்த முன்னுதாரணமெனப் பாராட்டியுள்ள தெல்லிப்பழை ஆதார வைத்தியசாலையின் இரத்த வங்கிப் பொறுப்பதிகாரி ப.பிரதீபன் சுமார் 30 பேர் வரையான இளைஞர்களும், ஊர் மக்கள் சிலரும் ஆர்வமுடன் கலந்து கொண்டு உயிர் காக்கும் உன்னத பணிக்கு ஒத்துழைப்பு வழங்கியதாகவும் தெரிவித்தார்.

இதேவேளை காதலர் தினத்தன்று குடாநாட்டிலுள்ள சில பிரதேச இளைஞர்கள் குடித்து விட்டுக் கும்மாளமடித்து சமூக விரோதச் செயற்பாடுகளில் ஈடுபட்டதைச் சுட்டிக்காட்டியுள்ள ஊர்ப் பெரியவர்கள் உட்படப் பலரும் குறித்த தினத்தன்று முன்மாதிரியாகச் செயற்பட்ட குறித்த விளையாட்டுக்கழக வீரர்களை மனம் திறந்து பாராட்டியுள்ளனர்.

அநாகரிகங்களுக்கு மத்தியில் ஒரு முன் மாதிரியான செயற்பாட்டை முன்னெடுத்த குறித்த விளையாட்டுக்கழக இளைஞர்களை நாமும் மனம் திறந்து வாழ்த்துவோம்.நாளைய விடியல் நமக்கானது.