ஆம் ஆத்மி வெளியிட்ட கனிமொழி உரையாடல் பதிவு: விசாரணை நடத்த சி.பி.ஐ. உத்தரவு..

by **logu** Wed Feb 05, 2014 2:23 pm

புதுடெல்லி, பிப். 5–
2 ஜி ஸ்பெக்ட்ரம் ஊழல் புகார் தொடர்பாக முன்னாள் மத்திய மந்திரி ஆர்.ராசா, கனிமொழி எம்.பி. உள்பட 17 பேர் மீது டெல்லி சி.பி.ஐ. கோர்ட்டில் விசாரணை நடந்து வருகிறது.
இந்த நிலையில் ஆம் ஆத்மி கட்சி சார்பில் நேற்று நடந்த பத்திரிகையாளர் சந்திப்பில் அந்த கட்சியின் மூத்த தலைவரும் பிரபல வக்கீலுமான பிரசாந்த் பூஷன் பேட்டியளித்தார். அப்போது 2 ஜி ஸ்பெக்ட்ரம் ஊழல் தொடர்பான சி.டி.யை வெளியிட்டார்.
அதில் கனிமொழி எம்.பி., கலைஞர் டி.வி முன்னாள் தலைமை செயல் அதிகாரி சரத், தி.மு.க. தலைவர் கருணாநிதி உதவியாளர் சண்முகநாதன், கடந்த தி.மு.க. ஆட்சியில் உளவுத்துறை கூடுதல் டி.ஜி.பி.யாக இருந்த ஜாபர் சேட் ஆகியோர் இடையே நடைபெற்ற தொலைபேசி உரையாடல்கள் இருப்பதாக தெரிவித்தார். அதில் 4 உரையாடல் பதிவுகள் இருந்தன.
கலைஞர் டி.வி.க்கு ஸ்பெக்ட்ரம் மூலம் கிடைத்த பணம் வேறு நபர்கள் மூலம் கடனாக பெறப்பட்டது போன்று தெரிவிக்க என்ன ஏற்பாடுகள் செய்யப்பட்டுள்ளது என்பது போன்றவற்றை ஜாபர்சேட் தி.மு.க. தலைவர் கருணாநிதியின் உதவியாளர் சண்முகநாதனிடம் விளக்கிச் சொல்வது போன்ற ஒரு உரையாடல் பதிவு உள்ளது.
மற்றொரு பதிவில் கனிமொழி எம்.பி.யிடம் பேசும் ஜாபர்சேட், கலைஞர் டி.வி.க்கு கைமாறிய பணம் கடனாக பெறப்பட்டது என்பது போன்று மாற்ற நடவடிக்கை எடுக்கப்பட்டுள்ளது. இந்த பணத்துக்கும், கனிமொழிக்கும் சந்பந்தம் இல்லை என தி.மு.க. தலைவர் கருணாநிதி அறிக்கை வெளியிட்டுள்ளார் என்று குறிப்பிடுவது போன்ற உரையாடல் இடம் பெற்றுள்ளது.
இதுபோல் கலைஞர் டி.வி. முன்னாள் தலைமை செயல் அதிகாரி சரத்துடன் ஜாபர்சேட் பேசும்போது பிரச்சினையை மூடி மறைக்க எந்தவிதமான ஏற்பாடு செய்யப்பட்டுள்ளது என்பது பற்றி விவாதிப்பது போன்ற உரையாடல் இடம் பெற்றுள்ளது.
மற்றொரு பதிவில் ராஜாத்தி அம்மாளும், டாடா நிறுவன தொழில் ஆலோசகர் நீராராடியாவும் பேசியது போன்ற உரையாடல் உள்ளது.
இந்த சி.டி.யை வெளியிட்ட பிரசாந்த் பூஷன், ‘‘இந்த உரையாடல்கள் மூலம் முறைகேடாக பணபரிமாற்றம் நடந்து இருக்கிறது. 2 ஜி வழக்கில் இருந்து தி.மு.க. தலைவர்களை காப்பாற்ற முயற்சி நடந்து இருக்கிறது. இந்த விவரங்கள் தி.மு.க. தலைவர் கருணாநிதிக்கும் தெரிந்து இருக்கிறது. எனவே அவரிடமும் விசாரணை நடத்த வேண்டும்.
இதுகுறித்து சுதந்திரமான விசாரணை நடத்த வேண்டும். ஊழலை மூடி மறைக்க நடந்த சதியை கண்டுபிடிக்க வேண்டும். சி.டி.யில் இடம் பெற்றிருந்த உரையாடல்கள் பழையனவாக இருந்தாலும் அவற்றை கூடுதலான புதிய ஆதாரங்களாக கருதி உரிய விசாரணைக்கு உத்தரவிட சுப்ரீம் கோர்ட்டில் மனு தாக்கல் செய்து வற்புறுத்துவேன்’’ என்றார்.
2 ஜி ஸ்பெக்ட்ரம் வழக்கில் நேற்று வெளியிடப்பட்ட சி.டி மீண்டும் புயலை கிளப்பியுள்ளது. ஆனால் இந்த குற்றச்சாட்டுகள் மற்றும் சி.டி. ஆதாரங்கள் பொய்யானவை என்று தி.மு.க. தலைவர் கருணாநிதி மறுத்துள்ளார்.
அந்த சி.டி. வெளிவந்த விதம் மற்றும் 3 ஆண்டுகள் கழித்து வெளிவந்துள்ள காலகட்டத்தை பார்க்கும்போது, விஷமிகள் சிலர் அரசியல் உள்நோக்கத்துடன் போலியான உரையாடல்களை பதிவு செய்துள்ளனர். கலைஞர் தொலைக்காட்சிக்கு களங்கம் கற்பிக்கும் நோக்கத்துடன் இதை செய்திருக்கலாம் என்ற சந்தேகம் எழுகிறது. ஏனென்றால் இதுபோல பல சம்பவங்கள் நடந்துள்ளன என்று கலைஞர் தொலைக்காட்சி நிர்வாகம் தெரிவித்துள்ளது.
இந்த நிலையில் 2ஜி ஸ்பெக்ட்ரம் தொடர்பாக ஊடகங்களில் வெளியான செய்திகள் அடிப்படையில் கிடைத்துள்ள ஆதாரங்கள் உண்மையானவையா என்பது குறித்து விசாரிக்க சி.பி.ஐ. தலைமையகம் உத்தரவிட்டுள்ளது.
இதுகுறித்து சி.பி.ஐ. உயர் அதிகாரி ஒருவர் கூறும்போது, ‘ஊடகங்களில் வந்த செய்திகளைப் பார்த்தோம். வெளியிடப்பட்டுள்ள ஒலி நாடாக்களின் உண்மை தன்மை குறித்து ஆராய உத்தரவிடப்பட்டுள்ளது. இந்த விவரங்கள் பற்றி சட்டப்படி விசாரணை நடத்தப்படும்’ என்றார்.