பயங்கரவாதி கசாப்பிற்கு மரண தண்டனை கிடைக்குமா?

மும்பை
: மும்பைத் தாக்குதல் வழக்கில் இன்று தீர்ப்பு வழங்கப்படுகிறது. இந்த
வழக்கின் குற்றவாளி அஜ்மல் கசாப் மற்றும் அவனுக்கு உதவிய இரண்டு இந்திய
சதிகாரர்களின் தலைவிதி என்ன என்பது, இன்று தெரியும். அவர்கள் குற்றவாளி என
தீர்ப்பில் கூறப்பட்டால் அவர்களுக்கு மரண தண்டனை விதிக்கப்படலாம். இந்தத்
தீர்ப்பு முடிவு நாடு முழுவதும் பரபரப்பாக எதிர்பார்க்கப்படுகிறது.

கடந்த 2008 நவம்பர் 26ம் தேதி, மும்பையில்
பயங்கரவாதிகள் 10 பேர் தாக்குதல் நடத்தினர். இச்சம்பவத்தில்,
வெளிநாட்டவர்கள் 25 பேர் உட்பட 166 பேர் பலியாயினர்; 304 பேர்
காயமடைந்தனர். அதே நேரத்தில், அதிரடிப்படையினர் நடத்திய தாக்குதலில்
பயங்கரவாதிகள் ஒன்பது பேர் கொல்லப்பட்டனர். அஜ்மல் கசாப் என்ற பயங்கரவாதி
மட்டும் கைதானான். இவன், பாகிஸ்தானின் பரித்கோட்டைச் சேர்ந்தவன்.
தாக்குதலுக்கு காரணமான லஷ்கர் -இ- தொய்பா பயங்கரவாத அமைப்பிற்கு,
தாக்குதல் நடத்த வேண்டிய இடங்களின் வரைபடத்தை தயாரித்து கொடுத்தது உட்பட
பல உதவிகளைச் செய்த இந்தியாவைச் சேர்ந்த பாஹீம் அன்சாரி மற்றும் சபாபுதீன்
அகமது என்ற இருவரும் கைதாகினர்.

இவர்கள் மூன்று பேருக்கும் எதிரான மும்பை
தாக்குதல் வழக்கு, மும்பை ஆர்தர் ரோடு சிறையில் அமைக்கப்பட்ட சிறப்பு
கோர்ட்டில் நடந்து வந்தது.658 பேர் சாட்சியம்: கடந்த ஆண்டு மே மாதம் 8ம்
தேதி துவங்கிய வழக்கு விசாரணை, மற்ற பயங்கரவாத வழக்குகளை விட வேகமாக
நடந்தது. இதில், 658 பேர் சாட்சியம் அளித்தனர். மொத்தம் 271 வேலை
நாட்களில் 3,192க்கும் மேற்பட்ட பக்கங்களில் சாட்சியங்கள் பதிவு
செய்யப்பட்டன. சிறப்பு கோர்ட் நீதிபதி தகிலியானி முன், சாட்சியம்
அளித்தவர்களில் 30 பேர், கசாப் தான் தங்களை சுட்டான் என கூறினர்.இந்த
வழக்கில் அரசு தரப்பில் ஆஜரான வக்கீல் உஜ்வல் நிகாம், விசாரணையின் போது
பறிமுதல் செய்யப்பட்ட 1,015 பொருட்களை கோர்ட்டில் சமர்ப்பித்தார்.
வழக்கிற்கு ஆதரவாக 1,691 ஆவணங்களையும் பதிவு செய்தார்.

'மும்பையில் லஷ்கர் -இ- தொய்பா பயங்கரவாதிகள்
நடத்திய இந்த தாக்குதலில், பாகிஸ்தான் ராணுவத்திற்கும் தொடர்பு உண்டு' என
குற்றம் சாட்டினார்.மேலும், இந்திய சட்ட வரலாற்றில் இதுவரை இல்லாத
வகையில், அமெரிக்காவின் பெடரல் புலனாய்வு நிறுவன அதிகாரிகளும், இந்த
வழக்கில் சாட்சியம் அளித்தனர். தொழில்நுட்ப ரீதியான சில விஷயங்கள்
குறித்து விளக்கம் அளித்தனர். மேலும், சி.எஸ்.டி., ரயில் நிலையம், டைம்ஸ்
ஆப் இந்தியா கட்டடம், தாஜ், ஓபராய் ஓட்டல்களில் பயங்கரவாதிகள் தாக்குதல்
நடத்திய போது, அங்குள்ள கண்காணிப்பு கேமராக்களில் பதிவான காட்சிகளும்
சாட்சியங்களாக பதிவு செய்யப்பட்டன. இது தவிர, கசாப் தொடர்பான வேறு சில
படங்களும் தாக்கல் செய்யப்பட்டன. ஆனால், 'அந்தப் புகைப்படங்களில் இருப்பது
நானில்லை' என கசாப் கூறினான்.

மும்பை ஆர்தர் ரோடு சிறையில், விசேஷமாக
உருவாக்கப்பட்ட குண்டு துளைக்காத மற்றும் வெடிகுண்டால் சேதமடையாத அறையில்
அடைக்கப்பட்டிருந்த கசாப், ஒவ்வொரு நாளும் சிறை வளாகத்தில் உள்ள
கோர்ட்டிற்கு அழைத்து வரப்படும் போது, 10 முதல் 12 போலீசார் பாதுகாவலுடன்
அழைத்து வரப்பட்டான். ஆனால், வழக்கு விசாரணை நடைபெற்றுக் கொண்டிருக்கும்
போது, தான் கூறியவற்றை எல்லாம் மறுத்தான். தான் அப்பாவி என்றும், சிறுவன்
என்றும் கூறி வழக்கை திசை திருப்ப முற்பட்டான். கசாப்பிற்கு எதிராக
பிப்ரவரி 5ல், 11 ஆயிரம் பக்கம் குற்றப் பத்திரிகை தாக்கல்
செய்யப்பட்டது.இந்த வழக்கில், கசாப்பிற்கு ஆதரவாக மூன்று வக்கீல்கள்
ஆஜராயினர். முதலில் அஞ்சலி வாக்மேரே என்பவர் ஆஜரானார். இறுதியாக
கே.பி.பவார் என்பவர் ஆஜரானார். 'தன் கட்சிக்காரர் அஜ்மல் கசாப் அப்பாவி
என்றும், பயங்கரவாதிகள் தாக்குதல் நடத்துவதற்கு சில நாட்களுக்கு முன்னரே,
சவுபாதி பகுதியில் இருந்து போலீசார் அவரை பிடித்துச் சென்றனர்' என்றும்
கூறினார்.பயங்கரவாத தாக்குதல் வழக்குகளில், மிக வேகமாக நடைபெற்ற இந்த
வழக்கின் விசாரணை மார்ச் 31ம் தேதி முடிவுக்கு வந்தது. இன்று தீர்ப்பு
வழங்கப்படுகிறது. நீதிபதி தகிலியானி, தீர்ப்பை வழங்குகிறார். நாடே
எதிர்பார்க்கும் பரபரப்பான வழக்கில், குற்றம் சாட்டப்பட்ட மூன்று பேரும்
குற்றவாளிகள் என அறிவிக்கப்பட்டால், அவர்களுக்கு மரண தண்டனை
விதிக்கப்படலாம்.

கசாப்பிற்கு ஆபரேஷன் :
மும்பை: மும்பை தாக்குதல் பயங்கரவாதி கசாப், வயிற்று உபாதையால்
அவதிப்பட்டு வருவதால், அவனுக்கு ஆபரேஷன் செய்யப்படலாம் என
எதிர்பார்க்கப்படுகிறது. அனேகமாக தீர்ப்பு வெளியான பின், ஆபரேஷன்
நடக்கும்.இது தொடர்பாக போலீஸ் அதிகாரி ஒருவர் கூறுகையில், ''கசாப்பினால்,
ஒரே நேரத்தில் முழுமையாக சாப்பிட முடியவில்லை. அவ்வப்போது கொஞ்சம்
கொஞ்சமாக சாப்பிட்டு வருகிறான். குறைவாக சாப்பிட்டாலும், நிறைய வாந்தி
எடுக்கிறான். அதனால், கசாப்பிற்கு ஆபரேஷன் நடக்கலாம். இருந்தாலும்,
எப்போது நடைபெறும் என்பதை தெரிவிக்க முடியாது,'' என்றார்.