வசதிகளற்று வாடும் மட்டு. கித்துள்வௌ மக்கள்: யோகேஸ்வரன் எம்.பி நேரடியாக சென்று பார்வை

by **piraba** Thu Jan 23, 2014 7:00 am

செங்கலடி கித்துள்வௌ குளிர்ந்த சோலை கிராமத்தில் வீடு வசதி உட்பட்ட அடிப்படை வசதிகள் இன்றி வாழும் மக்களை மட்டக்களப்பு மாவட்ட இந்து இளைஞர் பேரவை தலைவரும், தமிழ் தேசிய கூட்டமைப்பின் பாராளுமன்ற உறுப்பினருமான சீனித்தம்பி யோகேஸ்வரன் நேற்றுமுன்தினம் நேரடியாக சென்று பார்வையிட்டார்.

அண்மையில் அன்றாட இருப்பிடத்திற்கு கஷ்டப்பட்டுக் கொண்டிருக்கும் கிராமமாக ஊடகங்களில் வெளிவந்த மட்டக்களப்பு மாவட்டத்தின் செங்கலடி பிரதேசத்தின் கித்துள்வௌ என்னும் கிராமத்திற்கு சென்று அங்குள்ள மக்களை பாராளுமன்ற உறுப்பினர் சந்தித்தார்.

இங்கு 17 குடும்பங்கள் அன்றாட இருப்பிடத்துக்கும், வசதியற்ற நிலையில் வாழ்கின்றனர். கடந்த காலத்தில் நடைபெற்ற யுத்த சூழலின் படுவான்கரை எனப்படும் இப்பிரதேச பகுதி முற்றாக பாதிக்கப்பட்டன. இப்பகுதி மக்கள் 2006ம் ஆண்டு இறுதி தொடக்கம் 2007ம் ஆண்டு முற்பகுதி வரை இடம்பெயர்ந்து பின் மீள்குடியேற்றப்பட்டனர்.

ஆனால் இவர்களுக்கு அரசாங்கம் வீடு, குடிநீர் உட்பட்ட அடிப்படை வசதிகளை மேற்கொள்ள தவறிவிட்டது. இன்றும் இம்மக்கள் பல கஷ்டங்களுக்கு மத்தியில் வாழ்ந்து கொண்டிருகின்றனர்.

கித்துள்வௌ என்னும் கிராமத்தின் வடிச்சல் பகுதியில் உள்ள ஐந்து குடும்பங்களின் நிலைகளையும் நேரடியாக சென்று பாராளுமன்ற உறுப்பினர் பார்வையிட்டதுடன், அப்பகுதி பாடசாலைக்கும் சென்று கல்வி உபகரணங்களை வழங்கி வைத்தார்.

இங்கு வசிக்கும் ஐந்து குடும்பங்களுக்கு லண்டன் சிவனருள் இல்லம் வீடு வழங்க திட்டமிட்டுள்ளதாகவும் பாராளுமன்ற உறுப்பினர் கருத்து தெரிவித்துள்ளார். இக்கிராம மக்களின், பாடசாலை மாணவர்களின் குறைபாடுகள் என்பவற்றை நேரடியாக மக்களை சந்தித்து கேட்டறிந்த பாராளுமன்ற உறுப்பினர் சில குறைபாடுகளை நிவர்த்தி செய்ய உடன் நடவடிக்கை எடுப்பதாகவும் மக்களிடம் தெரிவித்துள்ளார்.

வெள்ளத்தால் உடைந்துள்ள மாவடியோடை பாலத்தை பார்வையிட்டார் யோகேஸ்வரன் எம்.பி

மட்டக்களப்பு செங்கலடி பிரதேச செயலாளர் பிரிவில் உடைக்கப்பட்ட மாவடியோடை பாலத்தை பாராளுமன்ற உறுப்பினர் சீ. யோகேஸ்வரன் கடந்த திங்கட்கிழமை நேரடியாக சென்று பார்வையிட்டதுடன், பாதிப்பை எதிர்கொள்ளும் கமத்தொழிலாளர், கால்நடை வளர்ப்பாளர்களையும் சந்தித்துள்ளார்.

இப்பாலம் உடனடியாக விரைவாக திருத்தப்பட வேண்டியுள்ளதால் மட்டக்களப்பு மாவட்ட அரசாங்க அதிபர் உட்பட உரிய அமைச்சர்கள், அதிகாரிகளை சந்தித்து நடவடிக்கைக்கு விரைவுபடுத்துவதாக தெரிவித்துள்ளார்.

ஒவ்வொரு வருடமும் மார்கழி, தை மாதம் அளவில் உடைந்து விடுகின்றது. இதனால் இப்பாலத்தின் ஊடாக பயணம் செய்வோர் மிகவும் பாதிக்கப்படுகின்றனர்.

தற்போது தற்காலிக ஏற்பாடாக பாலத்தை புனரமைப்பதுடன், நிரந்தரமாக தரமான முறையில் பாலத்தை புனரமைக்க நடவடிக்கை எடுக்க வேண்டும் என மக்கள் பாராளுமன்ற உறுப்பினரிடம் வேண்டுகோள் விடுத்துள்ளனர்.