Against New Zealand in the first ODI: India defeat-நியூசிலாந்திற்கு எதிரான முதல் ஒருநாள் போட்டியில் இந்தியா தோல்வி

by **Tamil** Sun Jan 19, 2014 6:26 pm

நியூசிலாந்திற்கு எதிரான முதல் ஒருநாள் போட்டியில் இந்தியா தோல்வி

நியூசிலாந்திற்கு எதிரான முதல் ஒருநாள் போட்டியில் இந்தியா தோல்வி

இந்தியா– நியூசிலாந்து அணிகள் மோதும் முதல் ஒருநாள் கிரிக்கெட் போட்டி இந்திய நேரப்படி இன்று காலை 6.30 மணிக்கு தொடங்கியது. இந்திய அணி கேப்டன் டோனி ‘டாஸ்’ வென்று நியூசிலாந்தை முதலில் விளையாட அழைத்தார். இரு அணி வீரர்கள் விவரம்:–
இந்தியா: டோனி (கேப்டன்), ஷிகார் தவான், ரோகித்சர்மா, வீராட் கோலி, ரெய்னா, ரகானே, ரவிந்திர ஜடேஜா, அஸ்வின், புவனேஸ்வர்குமார், இஷாந்த்சர்மா, முகமது ஷமி.
நியூசிலாந்து: மேக்குல்லம் (கேப்டன்), குப்தில், ரைடர், வில்லியம்சன், ரோஸ் டெய்லர், ஆண்டர்சன் கோரி, லுகே ரோஞ்சி, நாதன் மேக்குல்லம், சவுத்தி, மிலின், மெக்லகன்.
முகமது ஷமி தனது அபாரமான பந்து வீச்சால் நியூசிலாந்து தொடக்க ஜோடியை எளிதில் சரித்தார். ரைடர் (18), குப்தில் (8) ஆகியோரது விக்கெட்டை அவர் கைப்பற்றினார். 7.4 ஓவரில் 32 ரன் எடுப்பதற்குள் நியூசிலாந்து 2 விக்கெட்டை இழந்தது.
3–வது விக்கெட்டான வில்லியம்சன்– முன்னாள் கேப்டன் டெய்லர் ஜோடி பொறுப்புடன் விளையாடியது. இருவரும் இந்திய பந்துவீச்சை விளாசி தள்ளி ரன் சேர்த்தனர். இருவரும் அரைசதம் அடித்தனர்.
ரவிந்திர ஜடேஜா இந்த ஜோடியை பிரித்தார். வில்லியம்சன் விக்கெட்டை அவர் கைப்பற்றினார். 88 பந்தில் 7 பவுண்டரியுடன் அவர் 71 ரன்கள் எடுத்தார். அவர் ஆட்டம் இழந்தபோது நியூசிலாந்து அணியின் ஸ்கோர் 153 ஆக இருந்தது. 3–வது விக்கெட் ஜோடி 121 ரன் எடுத்தது.
வில்லியம்சன் ஆட்டம் இழந்த சிறிது நேரத்தில் டெய்லர் ஆட்டம் இழந்தார். அவர் 55 ரன்னில் முகமதுஷமி பந்தில் வெளியேறினார். அப்போது ஸ்கோர் 171 ரன் ஆக இருந்தது.
5–வது விக்கெட்டான கேப்டன் மேக்குல்லம்– கோரி ஆண்டர்சன் ஜோடியும் சிறப்பாக விளையாடியது. இதனால் 40–வது ஓவரில் அந்த அணி 200 ரன்னை தொட்டது.
ஸ்கோர் 213 ஆக இருந்த போது மேக்குல்லம் ஆட்டம் இழந்தார். அவரது விக்கெட்டை புவனேஸ்வர்குமார் கைப்பற்றினார். அவர் 25 பந்தில் 4 பவுண்டரியுடன் 30 ரன் எடுத்தார்.
மறுமுனையில் இருந்த கோரி ஆண்டர்சன் அதிரடியாக விளையாடினார். இதேபோல விக்கெட் கீப்பர் லுகே ரோஞ்சியும் அதிரடியாக ஆடினார். ஜடேஜா வீசிய 45–வது ஓவரில் அவர் 2 சிக்சர், ஒரு பவுண்டரி அடித்தார். அந்த ஓவரில் மொத்தம் 20 ரன் எடுக்கப்பட்டது. அவர் 30 ரன்னில் (18 பந்து) அவுட் ஆனார்.
நியூசிலாந்து அணி நிர்ணயிக்கப்பட்ட 50 ஓவரில் 7 விக்கெட் இழப்புக்கு 292 ரன் குவித்தது. ஆண்டர்சன் 40 பந்தில் 3 பவுண்டரி, 4 சிக்சருடன் 68 ரன் எடுத்து ஆட்டம் இழக்காமல் இருந்தார். முகமது ஷமி 4 விக்கெட் கைப்பற்றினார்.
293 ரன்கள் எடுத்தால் வெற்றி என்ற சற்றே கடினமான இலக்குடன் தொடக்க ஆட்டக்காரர்களாக ரோகித் சர்மா , ஷிகார் தவான் களமிறங்கினர்.
தொடக்கம் முதலே இந்தியாவிற்கு பெருத்த அடி விழுந்தது.ரோகித் சர்மா 3 ரன்கள் எடுத்த நிலையில் அவுட் ஆனார். அடுத்து களமிறங்கிய வீராட் கோலி சற்று நிதானமான ஆட்டத்தை கடை பிடித்தார்.இருவரும் இணைந்து இந்திய அணியின் ஸ்கோரை கணிசமாக உயர்த்தினர்.இந்த நிலையில் 32 ரன்கள் எடுத்து இருந்த ஷிகார் தவான் ஆண்டர்சன் பந்து வீச்சில் அவுட் ஆனார்.அடுத்து களமிறங்கிய ரஹானே,ரெய்னா சொற்ப ரன்களில் ஆட்டமிழந்தனர். அடுத்து களமிறங்கிய இந்திய அணியின் கேப்டன் தோனி வழக்கம் போல நிதானமான ஆட்டத்தை கடைபிடித்தார்.
அதிரடியாக ஆடிய கோலி 58 பந்துகளில் அரை சதம் அடித்தார்.அரை சதம் அடித்த கோலி நியூசிலாந்தின் பந்து வீச்சை சிதறடித்தார்.கோலியை வெளியேற்ற முடியாமல் நியூசிலாந்து பவுலர்கள் திணறினர்.அதிரடியாக ஆடிய வீராட் கோலி 93 பந்துகளில் சதம் அடித்தார்.கோலி 96 ரன்கள் இருந்த போது கொடுத்த கேட்ச் வாய்ப்பை ரய்டர் தவற விட்டார்.
எப்படியும் இந்தியா வெற்றி அடைந்து விடும் என்ற நிலையில் இருந்த போது தோனி 40 ரன்களில் ஆட்டமிழந்தார்.அடுத்து ஆடிய ஜடேஜா வழக்கம் போல சொற்ப ரன்களில் நடையைக் கட்டினார்.இந்தியா தனது வெற்றி வாய்ப்பை இழந்து கொண்டிருந்த சமயத்தில் கோலி ஆட்டமிழந்து வெற்றி வாய்ப்பை இன்னும் கடினமாக்கி விட்டார்.அதிரடியாக ஆடிய கோலி மெக்லனகன் பந்து வீச்சில் ரய்டரிம் கேட்ச் ஆகி வெளியேறினார்.
அடுத்து களமிறங்கிய வீரர்கள் சொற்ப ரன்களில் வெளியேறினர். இறுதியாக இந்திய அணி 268 ரன்களில் ஆல்-அவுட் ஆனது.24 ரன்கள் வித்தியாசத்தில் நியூசிலாந்து அணி வெற்றி பெற்றது.
இந்த வெற்றியின் மூலம் 5 போட்டிகள் கொண்ட ஒருநாள் தொடரில் நியூசிலாந்து அணி 1-0 என்ற கணக்கில் முன்னிலை பெற்றது.இரண்டாவது ஒருநாள் போட்டி வருகிற 22 ந்தேதி ஹாமில்டன்னில் நடைபெறுகிறது.

Against New Zealand in the first ODI: India defeat