ஜெனீவா போருக்கு தயாராகி வருவதாக இலங்கை அரசாங்கம் தெரிவிப்பு !

by **மாலதி** Sun Dec 22, 2013 7:53 am

அமெரிக்கா, கனடா போன்ற நாடுகளின் உதவியுடன் பிரித்தானியாவினால், எதிர்வரும் மார்ச் மாதம் 22 ஆம் திகதி ஜெனிவா மனித உரிமை ஆணைக்குழுவில் முன்வைக்க தீர்மானித்துள்ள போர்க்குற்றங்கள் அடங்கிய யோசனைக்கு எதிராக போரிட திட்டங்களை வகுத்து வருவதாக இலங்கை அரசாங்கம் தெரிவித்துள்ளது.
இலங்கைக்கு எதிரான யோசனைக்கு ஆதரவு வழங்கும் நாடுகளில் எவ்விதமான மதச் சுதந்திரத்தை வழங்காமை, பாரதூரமான மனித உரிமை மீறல்கள், போர்க்குற்றங்களை செய்தமை தொடர்பில் தகவல்களை வெளியிட இலங்கை தீர்மானித்துள்ளது.

இது குறித்து கருத்து வெளியிட்டுள்ள அரசாங்கத்தின் உயர் மட்டத் தரப்பு, இதுவரை நாங்கள் வாய்களை மூடிக் கொண்டிருந்தோம். இலங்கைக்கு எதிரான யோசனையை கொண்டு வரும் நாடுகளின் உண்மை நிலைமையை மாநாட்டில் வெளியிடுவோம் என தெரிவித்தது.

இலங்கைக்கு எதிரான யோசனையை கொண்டு வரும் ஜெனிவாவுக்கான பிரித்தானிய தூதுவர் அங்குள்ள மேற்குலக நாடுகளின் தூதுவர்களுடன் இரகசியமான பேச்சுவார்த்தைகளை நடத்தியுள்ளார்.

இதனை தவிர பிரித்தானிய தமிழர் பேரவை மற்றும் உலக தமிழர் பேரவை ஆகியவற்றின் அருட் தந்தை இம்மானுவேல் மற்றும் சுரேந்திரன் ஆகியோர் உண்மைக்கு புறம்பான தகவல்கள் அடங்கிய அறிக்கை ஒன்றை பிரித்தானிய அரசிடம் அளித்திருப்பதாக ஞாயிறு திவயின தெரிவித்துள்ளது.

இலங்கைக்கு எதிரான இந்த யோசனையை முன்வைக்க போவதாக பொதுநலவாய அமைப்பின் விவகாரங்களுக்கான அமைச்சர் ஹியுகோ ஸ்விங் பிரித்தானிய நாடாளுமன்றத்தில் தெரிவித்துள்ளார்.

இதனிடையே பிரித்தானியா , கனடா போன்ற நாடுகளில் உள்ள இலங்கைக்கு ஆதரவான தரப்பினர் அந்நாடுகள் மேற்கொண்ட மனித உரிமை மீறல்கள் பற்றிய தகவல்களை இலங்கை அரசுக்கு வழங்கியிருப்பதாக திவயின குறிப்பிட்டுள்ளது.

தனது யோசனைக்கு ஆதரவு வழங்குமாறு பிரித்தானியா, இந்திய அரசிடம் கோரிக்கை விடுத்திருந்தது.

எனினும் வன்னி இராணுவ நடவடிக்கைகளுக்கு விமானங்கள், விமான எதிர்ப்பு ஆயுதங்கள், ரோடார் மற்றும் ஏனைய உதிரிபாகங்களை இந்தியாவே இலங்கைக்கு வழங்கியிருப்பதால், இந்தியா பிரித்தானியாவின் கோரிக்கைக்கு மறுப்பு தெரிவித்துள்ளது என்றும் ஞாயிறு திவயின குறிப்பிட்டுள்ளது.