பாராளுமன்ற தேர்தல்: பா.ஜ.க கூட்டணியில் எந்தெந்த கட்சிகள் இடம் பெறும்? - தமிழருவி மணியன் பேட்டி

by **mmani** Tue Dec 17, 2013 7:16 am

சென்னை, டிச.17-
பாராளுமன்ற தேர்தல்: பா.ஜ.க கூட்டணியில் எந்தெந்த கட்சிகள் இடம் பெறும்? - தமிழருவி மணியன் பேட்டி 575f58b2-49f8-4641-a196-f5b8ff693a78_S_secvpf

காந்திய மக்கள் இயக்கத்தின் தலைவர் தமிழருவி மணியன் சென்னையில் நேற்று நிருபர்களுக்கு பேட்டியளித்தார். அப்போது அவர் கூறியதாவது:-

தமிழகத்தில் தி.மு.க., அ.தி.மு.க. ஆகிய 2 திராவிட கட்சிகளுக்கு மாற்றாகவும், மத்தியில் காங்கிரஸ் கட்சிக்கு மாற்றாகவும் நடைபெற உள்ள பாராளுமன்ற தேர்தலில் பா.ஜ.க. தலைமையில் மாற்று அணி அமைய வேண்டும்.

நரேந்திர மோடி அலையால் தமிழகத்தில் வெறும் 3 சதவீதமாக இருந்த பா.ஜ.க. வாக்கு எண்ணிக்கை தற்போது 10 சதவீதமாக உயர்ந்து உள்ளது. மது விலக்கு கொள்கையால் ம.தி.மு.க.வின் வாக்கு எண்ணிக்கை 8 சதவீதமாக உயர்ந்து உள்ளது. பா.ம.க.வு.க்கும், தே.மு.தி.க.வுக்கும் 8 சதவீத வாக்கு எண்ணிக்கை உள்ளது. இந்த கட்சிகள் ஒன்று சேர்ந்தாலே 30 சதவீத வாக்குகளை பெற்று விட முடியும்.

பா.ஜ.க. தலைமையில் மாற்று அணியை அமைப்பது தொடர்பாக ம.தி.மு.க. பொதுச்செயலாளர் வைகோவை சந்தித்து பேசினேன். அதையடுத்து அவர் டெல்லியில் ராஜ்நாத் சிங்கை சந்தித்து பேசியதில் பா.ஜ.க., ம.தி.மு.க. இடையே சுமுகமான கூட்டணி உருவானது.

பா.ம.க. நிறுவனர் டாக்டர் ராமதாசை தைலாபுரத்தில் உள்ள அவருடைய இல்லத்தில் தனிமையில் சந்தித்து பேசினேன். அப்போது டாக்டர் ராமதாசிடம், பா.ஜ.க. தலைமையிலான கூட்டணியில் நீங்கள் இடம் பெற வேண்டும் என்று கேட்டேன். அதற்கு டாக்டர் ராமதாஸ் பாராளுமன்ற தேர்தலில் தனித்து நிற்க போகிறோம். அதில் எந்த மாற்றமும் இல்லை என்று கூறிவிட்டார். எனினும் நரேந்திர மோடி பிரதமர் ஆவதை பா.ம.க. ஆதரிக்கும் என்றும் தெரிவித்தார்.

விஜயகாந்தை 2 முறை சந்தித்து பா.ஜ.க. தலைமையிலான கூட்டணியில் தே.மு.தி.க. வர வேண்டும் என்று கேட்டேன். அதற்கு அவர் தொண்டர்களின் கருத்தை கேட்டு ஜனவரியில் பொதுக்கூட்டம் நடத்தி தனது ஆதரவு யாருக்கு என்பதை தெரிவிப்பேன் என்று கூறிவிட்டார்.

நடந்து முடிந்த 5 மாநில சட்டபேரவை தேர்தல் முடிவுகளை அடுத்து பா.ஜ.க. தலைமையிலான தேசிய ஜனநாயக கூட்டணியில் ம.தி.மு.க., பா.ம.க., தே.மு.தி.க., ஆகிய கட்சிகள் வரக்கூடிய காலம் கனிந்து இருக்கிறது. பாராளுமன்ற தேர்தலில் பா.ஜ.க., பா.ம.க., ம.தி.மு.க., கூட்டணி அமையும் என்று நம்புகிறேன். தே.மு.தி.க. விலகி சென்று விட கூடாது என்ற அச்சமும் எனக்கு இருக்கிறது. பா.ஜ.க. கூட்டணியில் தமிழகத்தின் முக்கிய தலித் கட்சி ஒன்றை இணைப்பதற்கான முயற்சிகள் நடந்து வருகிறது.

ஊழல், நிர்வாகத் திறமையின்மை போன்ற காரணங்களினால் வட மாநிலங்களில் காங்கிரஸ் கட்சிக்கு எதிர்ப்பு அலை வீசுகிறது. பாராளுமன்ற தேர்தலில் இந்த அலை சுனாமி அலையாக மாறும். காங்கிரஸ் கட்சியிடமிருந்து மக்களை பாதுகாக்கவே பா.ஜ.க. தலைமையில் மாற்று அணி அமைய வேண்டும் என்று விரும்புகிறேன். நான் நரேந்திர மோடிக்கோ, எவருக்கும் ஆதரவாளன் கிடையாது.

காந்திய மக்கள் இயக்கத்தின் அரசியல் விழிப்புணர்வு மாநாடு ஜனவரி 26-ந்தேதி திண்டுக்கல்லில் நடக்கிறது. காந்தி நினைவு தினமான ஜனவரி 30-ந்தேதி மது விலக்குக்கு ஆதரவாக சென்னையில் காந்திய மக்கள் இயக்கம் சார்பில் கண்டன ஆர்ப்பாட்டம் நடைபெறும்.

மார்ச் 1-ந்தேதி காந்திய மக்கள் இயக்கத்தின் சார்பில் நடத்தப்பட்டு வரும் ரவுத்திரம் மாத இதழின் ஆண்டு விழா சென்னை பாரிமுனையில் உள்ள ராஜா அண்ணாமலை மன்றத்தில் நடக்கிறது. பிப்ரவரி 9-ந்தேதி மதுரையில் காந்திய மக்கள் இயக்கத்தின் செயற்குழு-பொதுக்குழு கூடுகிறது.

இவ்வாறு தமிழருவி மணியன் கூறினார்.