ரூ.2 கோடி செலவில் மகாபலிபுரம் அருகே கலங்கரை விளக்கம்: ஜி.கே.வாசன் திறந்து வைத்தார்

கிழக்கு கடற்கரை சாலையில், மகாபலிபுரம் அருகே கடப்பாக்கம் கிராமம் உள்ளது. இங்கு ரூ.2 கோடி செலவில் மத்திய கப்பல் துறை அமைச்சகம் மூலம் புதிதாக கலங்கரை விளக்கம் கட்டப்பட்டுள்ளது. இதன் உயரம் 30 மீட்டர். 17 கடல் மைல் தூரத்துக்கு இந்த கலங்கரை விளக்கத்தின் ஒளி தெரியும் வகையில் இது அமைக்கப்பட்டுள்ளது. பகலிலும், இந்த கலங்கரை விளக்கத்தின் வர்ணம் ஒளிரும். மரக்காணம்– கடப்பாக்கத்துக்கு இடையே 20 கடல் மைல் சுற்றளவு தூரத்துக்கு இதன் ஒளி வீச்சு இருக்கும்.

இந்த கலங்கரைவிளக்கம் சூரிய சக்தி மூலம் செயல்படுகிறது. இங்கு சூரிய ஒளி மின்சாரத்தை 3 நாட்கள் சேமிக்கும் வசதி உள்ளது. அவசர தேவைக்கு டீசல் ஜெனரேட்டரும் தயார் நிலையில் வைக்கப்பட்டு இருக்கிறது. மின் இணைப்பும் உள்ளது.

கடப்பாக்கத்தில் அமைந்துள்ள இது இந்தியாவின் 186–வது கலங்கரை விளக்கமாகும். பொது மக்களும் இதை பார்க்கலாம்.இந்த புதிய கலங்கரை விளக்கத்தின் திறப்பு விழா இன்று காலை நடந்தது.

மத்திய கப்பல்துறை மந்திரி ஜி.கே. வாசன் தலைமை தாங்கி திறந்து வைத்தார். அப்போது அவர் பேசியதாவது:–

மீனவர்களின் எண்ணங்களை நிறைவேற்றும் வகையில், அவர்களுக்கு உதவிடும் வகையிலும் காங்கிரஸ் தலைமையிலான ஐக்கிய முற்போக்கு கூட்டணி அரசு செயல்பட்டு வருகிறது. புதுச்சேரி–மகாபலிபுரம் இடையே 50 கடல் மைல் பகுதி உள்ளது. இதில், சில பகுதிகள் கலங்கரை விளக்கு வெளிச்சம் படாத பகுதியாக இருந்தது.

எனவே, அதிக உயரம் கொண்ட கலங்கரை விளக்கமாக இதுஅமைக்கப்பட்டுள்ளது. இந்திய கடல் எல்லையில் கப்பல்களின் பாதுகாப்பான பயணத்துக்கும், மீனவர்களின் பாதுகாப்புக்கும் இது பயன் அளிக்கும்.

நாட்டின் பாதுகாப்பு, கண்காணிப்பு கட்டமைப்புகள் இதன் மூலம் வலுப்பெறும். 10 துறைமுக பகுதிகளில் வி.பி.எஸ். வசதிகள் விரிவுபடுத்தப்படும். கப்பல்கள் பாதுகாப்புக்கு மிதவைகள், மீனவர்கள் பாதுகாப்புக்கு நவீன உபகரணங்கள் விரைவில் வழங்கப்படும்.

இந்தியா முழுவதும் 18 கலங்கரை விளக்கங்கள் தேர்வு செய்யப்பட்டு சுற்றுலா பயணிகளுக்கு திறந்து விடப்படும். மெரினா கலங்கரை விளக்கத்தை தொடர்ந்து வருகிற ஜனவரி மாதம் முதல் மகாபலிபுரம் கலங்கரை விளக்கமும், அதன்பிறகு கன்னியகுமரி, முட்டம், ராமேஸ்வரம் கலங்கரை விளக்கங்களும் பொது மக்கள் பார்வைக்காக திறக்கப்படும். செய்யூரில் சிறுதுறைமுகம் அமைக்க விஸ்வநாதன் எம்.பி. கோரிக்கை விடுத்தார். மாநில அரசு அனுமதி அளித்தால் பரிசீலிக்கப்படும்.

இவ்வாறு அவர் கூறினார்.

நிகழ்ச்சிக்கு விஸ்வநாதன் எம்.பி. முன்னிலை வகித்தார். மத்திய கப்பல் துறை அமைச்சக செயலர் விஸ்வபதி திரிவேதி, கலங்கரை விளக்கங்கள் துறை தலைமை இயக்குனர் சூரஜ், சென்னை துறைமுக பொறுப்பு தலைவர் ஆதித்ய மித்ரா, எண்ணூர் துறைமுக சேர்மன் பாஸ்கராச்சார், தமிழ்நாடு மண்டல கலங்கரை விளக்க இயக்குனர் ராமதாஸ்.

காஞ்சீபுரம் மாவட்ட காங்கிரஸ் தலைவர்கள் சக்கரபாணி ரெட்டியார், முன்னாள் பாராளுமன்ற தொகுதி தலைவர் மலையூர் புருசோத்தமன், மங்களூர் துறைமுக டிரஸ்டி வில்லிவாக்கம் சுரேஷ் மற்றும் காங்கிரஸ் நிர்வாகிகள் நெடுஞ்செழியன், சைதை ரவி, செங்கல்பட்டு முரளி, திலீப் குமார், காந்தி கலை, ரிங்கு பாஸ்கர், பழனி, ஆதிகேசவன் உள்பட ஏராளமானோர் கலந்து கொண்டனர்.