முல்லைத்தீவு மாவட்டத்தில் உடல் அவயவங்களை இழந்து சுமார் 7 ஆயிரத்து 500 பேர் மாற்றுத் திறனாளிகள்

by **அருள்** Sun Nov 10, 2013 7:02 am

சிறிலங்கா படையினர் போர் விதிமுறைகளை மீறி வன்னியில் மேற்கொண்ட தாக்குதல்கள் காரணமாக முல்லைத்தீவு மாவட்டத்தில் சுமார் 7 ஆயிரத்து 500 பேர் உடல் அவயவங்களை இழந்துள்ளதாக முல்லைத்தீவு மாவட்ட மாற்றுத் திறனாளிகள் சங்கம் தெரிவித்துள்ளது.
முல்லைத்தீவு மாவட்டத்தில் உடல் அவயவங்களை இழந்து சுமார் 7 ஆயிரத்து 500 பேர் மாற்றுத் திறனாளிகள் 1395127_664249863615013_583573793_n

முல்லைத்தீவு மாவட்டத்தில் உடல் அவயவங்களை இழந்து சுமார் 7 ஆயிரத்து 500 பேர் மாற்றுத் திறனாளிகள் 1395127_664249863615013_583573793_n

முல்லைத்தீவு மாவட்டத்தில் சுமார் 11 ஆயிரம் பேர் வரையில் மாற்றுத் திறனாளிகளாக, அங்கவீனர்களாக உள்ளனர். இதில் 7 ஆயிரத்து 500 பேர் வரையில் கடந்த 2008-2099 ஆம் ஆண்டுகளில் இடம்பெற்ற யுத்தத்தால் பாதிக்கப்பட்டவர்களாவர். ஏனையவர்கள் பிறப்பு, நோய்களின் பாதிப்பு மற்றும் விபத்துக்கள் காரணமாகப் பாதிக்கப்பட்டுள்ளனர் என்றும் தெரிவிக்கப்பட்டது.

சிறிலங்கா படையினர் புலிகளை இலக்குவைப்பதற்கு பதிலாக மக்களை இலக்குவைத்தே தாக்குதல்களை நடத்தினர். பெருந்தொகையான மக்கள் கொல்லப்பட்டால் மக்கள் புலிகளை எதிர்ப்பார்கள். இதன் பின்னர் புலிகளை இலகுவாக வெற்றிகொள்ள முடியும் என்ற கபடத்தனமான நோக்கத்துடனேயே படையினர் மக்கள் மீது இரசாயன ஆயுதங்கள், கொத்துக் குண்டுகள் மூலம் ஈவிரக்கமற்ற தாக்குதல்களை நடத்தினர். இதனாலேயே லட்சக்கணக்கான மக்கள் கொல்லப்பட்டதுடன் ஏராளமானோர் படுகாயமடைந்து உடல் அவயவங்களை இழந்ததாக முல்லைத்தீவு மாவட்டத்தைச் சேர்ந்த பல பொதுமக்கள் தெரிவித்தனர். இறுதி யுத்தத்தில் முள்ளிவாய்க்கால் வரை சென்று பெரும் பாதிப்பை எதிர்கொண்ட மக்களே இவ்வாறு தெரிவித்தனர்.

இதேவேளை தமது மாவட்டத்திலுள்ள மாற்றுத் திறனாளிகள் தொடர்பாக முல்லைத்தீவு மாவட்ட மாற்றுத் திறனாளிகள் சங்கத் தலைவர் மேலும் கருத்துத் தெரிவிக்கும் போது குறித்த மாற்றுத் திறனாளிகள் அடிப்படை வசதிகள் மற்றும் வாழ்வாதார உதவிகள் இல்லாத நிலையில் வாழ்ந்து வருகின்றனர்.

இவர்களுக்கு பல்வேறு வகையான உதவிகள் தேவையாக உள்ளன. தற்போது மாதாந்த நிவாரணம் ஒன்றினை வழங்குமாறு எமது சங்கத்தினூடாக முல்லைத்தீவு மாவட்ட அரச அதிபரிடம் கோரிக்கை விடுத்துள்ளோம்.
இதனைவிட இவர்கள் நிலைத்து வாழக்கூடிய வாழ்வாதார உதவிகளையும் கோரியுள்ளோம்.

மாந்தை கிழக்குப் பிரதேச செயலக பிரிவில் உள்ள மாற்றுத் திறனாளிகள், தமக்கு இந்தப் பகுதியில் கால்நடைப் பண்ணை மற்றும் பால் பதனிடும் நிலையம் ஆகியவற்றை அமைத்து வழங்குமாறு கோரிக்கை விடுத்துள்ளனர். இவற்றை வழங்கும் போது அவர்களின் வாழ்வாதாரம் வளர்ச்சியடையும் என்று தெரிவித்தார்.