காமன்வெல்த் மாநாட்டில் இங்கிலாந்து பிரதமர் பங்கேற்பு: தமிழர்களின் எதிர்ப்பை புறக்கணித்தார்...

by **மாலதி** Fri Nov 08, 2013 9:36 pm

லண்டன், நவ 8–

இலங்கை தலைநகர் கொழும்புவில் வருகிற 15 முதல் 17–ந்தேதி வரை காமன்வெல்த் மாநாடு நடைபெறுகிறது. அதில் இங்கிலாந்து பிரதமர் பங்கேற்க கூடாது என அங்கு வாழும் தமிழர்கள் எதிர்ப்பு தெரிவித்து வருகின்றனர். ஆர்ப்பாட்டங்களும், போராட்டங்களும் நடத்தப்பட்டு வருகின்றன. இறுதி கட்ட போரின் போது இலங்கை தமிழர்களை கொன்று குவித்த ராஜபக்சே அரசை கண்டித்து இம் முடிவை மேற் கொள்ளும்படி வலியுறுத்துகின்றனர். அதை தொடர்ந்து போராட்டத்தில் ஈடுபட்டுள்ள தமிழ் அமைப்புகளை சந்திக்க அழைப்பு விடுத்தார். அதில் உலக தமிழர் பேரவை, இங்கிலாந்து தமிழர் பேரவை ஆகிய 2 அமைப்புகள் மட்டுமே கலந்து கொண்டன.

இவர்களில் எதிர்க் கட்சியான லேபர் கட்சி யின் சென் கந்தையா, பி.டி.எப். உறுப்பினர்கள் அடங்குவர். அப்போது காமன்வெல்த் மாநாட்டில் பங்கேற்க இலங்கை செல்ல வேண்டாம் என அவர்கள் கோரிக்கை விடுத்தனர். ஆனால் அதை பிரதமர் டேவிட் கேமரூன் நிராகரித்தார். மேலும், தான் இலங்கை செல்வதில் எவ்வித மாற்றமும் இல்லை என திட்டவட்டமாக தெரிவித்தார்.

மேலும் தானும் (கேமரூன்) வெளியுறவு மந்திரி வில்லியம் ஹேக்கும் இலங்கை அதிபர் ராஜபக்சே தலைமையிலான அரசு மீது சுமத்தப்பட்டுள்ள கொலைகள் மற்றும் சித்ரவதை குற்றச்சாட்டுக்கள் குறித்து காமன்வெல்த் மாநாட்டின் மூலம் தாக்கங்களை கொண்டு வர இருக்கிறோம். ஆனால் காமன்வெல்த் மாநாட்டை புறக்கணிப்பதால் இலங்கை மீதான அழுத்தங்களை கொடுக்க முடியாது. இலங்கையின் போர்க் குற்றச் செயல்கள் குறித்து வலியுறுத்த முடியாது. எனவே, ராஜதந்திர முறையில் இப்பிரச்சினையை அணுக வேண்டியுள்ளது. என்றும் கேமரூன் குறிப்பிட்டார்.

அதை தொடர்ந்து பிரதமர் டேவிட் கேமரூன் இறுதிகட்ட போரில் பாதித்த யாழ்ப்பாணம், முள்ளிவாய்க்கால் பகுதிக்கு செல்ல வேண்டும். யாழ்ப்பாணம் நூல் நிலையத்தை பார்வையிட வேண்டும் மற்றும் போரின் போது காணாமல் போனவர்களின் உறவினர்களை சந்திக்க வேண்டும் என்பன போன்ற கோரிக்கைகளை விடுத்தனர்