குமுதம் நிர்வாக இயக்குனர் கைதாகி ஜாமீனில் விடுதலை

சென்னை:பல
கோடி மோசடி புகாரில், குமுதம் நிர்வாக இயக்குனர் வரதராஜன் கைது
செய்யப்பட்டு, ஜாமீனில் விடுவிக்கப்பட்டார்.குமுதம் பப்ளிகேஷன்ஸ்
நிறுவனத்தின் நிர்வாக இயக்குனர் வரதராஜன். இவர் மீது, குமுதம் வார இதழின்
கவுரவ ஆசிரியர் ஜவஹர் பழனியப்பன் போலீசில் புகார் அளித்தார். அதில், 'ஆறு
லட்சம் ரூபாய் சம்பளத்தை 10 லட்சம் ரூபாயாக திருத்தி, பல கோடி ரூபாய்
அளவுக்கு வரதராஜன் மோசடி செய்துள்ளார்' என, கூறப்பட்டுள்ளது.

இதையடுத்து, வரதராஜன் மீது இந்திய தண்டனைச்
சட்டம் பிரிவு 420, 465, 468,471 ன் கீழ் வழக்கு பதிவு செய்த மத்திய
குற்றப்பிரிவு போலீசார், இன்ஸ்பெக்டர் மதியழகன் தலைமையில் நேற்று மாலை
குமுதம் அலுவலகத்திற்கு சென்று அவரை கைது செய்தனர்.ரகசிய இடத்திற்கு
கொண்டு சென்று அவரிடம் விசாரணை நடத்தினர். அதன்பின், மூன்று மணி
நேரத்திற்கும் மேலாக வாகனத்திலேயே அலைக்கழித்த போலீசார், இரவு 8 மணி
அளவில் குற்றப்பிரிவு அலுவலகத்திற்கு கொண்டு வந்தனர். அங்கிருந்து இரவு 10
மணியளவில் கூடுதல் முதன்மை மாஜிஸ்திரேட் கிள்ளிவளவன் வீட்டிற்கு கொண்டு
சென்று அவரது முன்னிலையில் ஆஜர்படுத்தினர்.

போலீஸ் தரப்பில் அரசு உதவி வக்கீல் ஜின்னா
ஆஜரானார். மனுதாரர் தரப்பில் ரவிக்குமார் உள்ளிட்ட வக்கீல்கள் ஆஜராயினர்.
உடன் வரும் 7ம் தேதி வரை, வரதராஜனை நீதிமன்ற காவலில் வைக்கும்படி
மாஜிஸ்திரேட் உத்தரவிட்டார். அப்போது வரதராஜன் தரப்பில் ஆஜரான வக்கீல்கள்,
அவரை ஜாமீனில் விடுவிக்க வேண்டும் எனக்கோரி, மனு அளித்தனர். அதை ஏற்றுக்
கொண்ட மாஜிஸ்திரேட், 10 ஆயிரம் ரூபாய் ரொக்க ஜாமீனில் வரதராஜனை
விடுவித்ததுடன், ஒவ்வொரு திங்களன்றும் விசாரணை அதிகாரி முன் ஆஜராக
வேண்டும் என, உத்தரவிட்டார்.வரதராஜன் விடுவிக்கப்பட்டதும், மாலை மலர்
நிர்வாக இயக்குனர் பாலசுப்பிரமணிய ஆதித்தன், விகடன் வெளியீட்டாளர்
சீனிவாசன் ஆகியோர் நேரில் சந்தித்து நடந்த விபரங்களை கேட்டறிந்தனர்.