அனைத்து மத்திய சிறைகளிலும் ரகசிய கேமரா பொருத்தி அகன்ற திரையில் கண்காணிப்பு: தமிழக அரசு முடிவு

by **அருள்** Sun Oct 13, 2013 7:26 am

சென்னை, அக்.13-
அனைத்து மத்திய சிறைகளிலும் ரகசிய கேமரா பொருத்தி அகன்ற திரையில் கண்காணிப்பு: தமிழக அரசு முடிவு B8cfd748-91e2-4e5d-adc3-515251d18899_S_secvpf

அனைத்து மத்திய சிறைகளிலும் ரகசிய கேமரா பொருத்தி அகன்ற திரையில் கண்காணிப்பு: தமிழக அரசு முடிவு B8cfd748-91e2-4e5d-adc3-515251d18899_S_secvpf

குற்றவாளிகளை கண்டுபிடித்து கைது செய்வது மட்டுமல்ல, அவர்களை அடைக்கும் சிறைகளிலும் குற்றங்கள் நடப்பதை கண்டுபிடித்து கட்டுப்படுத்தும் அவசியம் ஏற்பட்டுள்ளது. சிறையில் அடைக்கப்படும் குற்றவாளிகள் சிலர், அங்குள்ள சூழ்நிலைக்கு ஏற்ப குற்றச்செயலில் ஈடுபடுவது தொடர்கதையாக உள்ளது. சிறைக்குள் உச்சபட்சமாக கொலைகளும் நடந்துள்ளன.

சிறைதான் என்றாலும், கைதிகள் விரும்பும் பீடி, சிகரெட், கஞ்சா போன்ற புகை வஸ்துகளின் புழக்கம் இல்லாமல் இல்லை. கைதியை ஜெயிலில் பார்க்க வரும் போதும், கோர்ட்டில் ஆஜராவதற்காக வரும் போதும் உறவினர்கள், நண்பர்கள் மூலமாக இவை கைமாற்றப்படும். லஞ்சம் வாங்கும் சில சிறை ஊழியர்கள் மூலமாகவும் இவை சிறை அறைகளுக்குள் நேரடியாகக் கொடுக்கப்படுகின்றன. இப்படிப்பட்ட ஒரு சிறை ஊழியரை லஞ்ச ஒழிப்பு போலீசார், சில ஆண்டுகளுக்கு முன்பு கைது செய்த சம்பவமும் நடந்துள்ளது.

இந்த சூழ்நிலையில் கடந்த 10 ஆண்டுகளில் சிறைகளுக்குள் செல்போனின் நடமாட்டமும் அதிகரித்தபடி உள்ளது. சிறைக்குள் செல்போன் உள்ளிட்ட எலக்ட்ரானிக் சாதனங்கள் தடை செய்யப்பட்டுள்ளன. ஆனால் இவற்றை வைத்துக்கொண்டு வெளிநபர்களுடன் பேசி, குற்றச்செயல்களில் ஈடுபடுவது நடைபெற்று வந்தது.

சில சிறைக்கைதியின் வெளித்தொடர்பை அறிந்துகொள்வதற்காக சிறை ஊழியர்களே செல்போன் கொடுத்து உதவிய சம்பவங்களும் உண்டு. பின்னர் அந்த செல்போனை சோதித்து, அந்த கைதி யாராருடன் தொடர்பு கொண்டார் என்பதை அறிந்து, அவர்கள் செய்ய இருந்த குற்றத்தை தடுத்துள்ளனர். கைதிகள் சிலர் ரகசியமாக செல்போன்களை மறைத்து வைத்து பேசுவதும் உண்டு. குறிப்பிட்ட நேரத்தில் மட்டும் அதை பயன்படுத்திவிட்டு பின்னர் ‘சுவிட்ச் ஆப்’ செய்துவிடுவார்கள்.

சிறையில் தடை செய்யப்பட்ட பொருட்கள் தாராளமாக புழங்குவதாக புகார்கள் வரத்தொடங்கியதும், இதற்கு முற்றுப்புள்ளி வைக்க அரசு முடிவு செய்தது. அதனடிப்படையில் தமிழகத்தில் உள்ள சில மத்திய சிறைகள் வளாகத்தில் முக்கியமான இடங்களில் ரகசிய கேமராக்கள் வைக்கப்பட்டன. ஆனாலும் சிறையை முழுமையாக கேமராக்குள் அடக்க முடியவில்லை என்ற குறை இருந்தது.

இந்தக் குறையைப் போக்குவதற்காக கைதிகள் நடமாடும் அத்தனை முக்கிய பகுதிகளிலும் பதிவு வசதி கொண்ட ரகசிய காமிராக்களை பொருத்த அரசு முடிவு செய்துள்ளது. இதுகுறித்து சிறைத்துறை உயர் அதிகாரி ஒருவர் கூறியதாவது:-

பெண்களுக்கான சிறப்பு சிறை, சிறார்கள் இல்லம் உட்பட அனைத்து சிறைகளிலும் 60 ரகசிய கேமராக்களை பொருத்த அரசு முன்வந்துள்ளது. பதிவு வசதி கொண்ட கேமராக்களை சிறையின் பிரதான வாயில்கள், அனுமதி பெறும் வாயில்கள், கைதிகளுடன் உறவினர்கள் பேசும் அறை, பாதுகாப்பு பகுதிகள், சிறை கோபுரங்கள் ஆகிய இடங்களில் பொருத்துவோம்.

அனைத்து கேமராக்களும் சிறையின் உள்ளே நடப்பது என்ன என்பதை, 24 மணிநேரமும் கண்காணித்தபடி இருக்கும். அந்த ரகசிய கேமராக்கள் அனைத்தும் 40 இன்ச் அளவு அகன்ற எல்.இ.டி. ஒளித்திரையுடன் இணைக்கப்பட்டு இருக்கும். எனவே சிறையின் மூலையில் நடக்கும் சம்பவத்தை கூட, இந்த திரை மூலம் சிறை அதிகாரிகள் தொடர்ந்து கண்காணிக்க முடியும். இதனால் குற்றச்செயல்களை உடனுக்குடன் தடுப்பதோடு, குற்றத்துக்கான நடவடிக்கை எடுக்கவும் ஆதாரம் கிடைக்கும்.

இந்த திட்டத்துக்காக அரசு ரூ.2 கோடி செலவிட உள்ளது. செல்போன் பயன்படுத்தும் குற்றம் சமீபமாக மிகவும் அதிகரித்து விட்டது. அதிகாரிகள் சோதனையிட்டு அவ்வப்போது செல்போன்களை கைப்பற்றுகின்றனர். இந்த நவீன கேமராக்களால் இந்த குற்றத்தை தடுக்க முடியும்.

சிறையில் தற்போது தொலைபேசி வசதிகள் இருந்தாலும், அதை கைதிகள் பெருமளவில் பயன்படுத்துவதில்லை. ஏனென்றால், அந்த போன் அருகே ஆட்கள் இருப்பார்கள். எனவே தனிப்பட்ட விவகாரங்களை அதில் பேச முடியாது.

மேலும், சில கைதிகளை கோர்ட்டுகளில் முன்நிறுத்துவதற்கு அதிகாரிகள் தினமும் ரிஸ்க் எடுக்க வேண்டியதுள்ளது. கைதிகள் தப்பி ஓடுவது, கைதிகளை கோர்ட்டுகளுக்குள்ளே அல்லது வெளியே கொலை செய்யும் முயற்சிகள் போன்ற பெரிய சவால்களை ஒவ்வொரு நாளும் அதிகாரிகள் சந்திக்க வேண்டியதுள்ளது.

இதற்கும் முற்றுப்புள்ளி வைப்பதற்காக தமிழகத்தில் உள்ள 17 சிறைகளிலும் 306 விசாரணை கோர்ட்டுகளிலும் 'வீடியோ கான்பரன்சிங்' தொழில்நுட்பத்தை புகுத்த அரசு முடிவு செய்துள்ளது. இதன் மூலம் கைதிகளை அழைத்துச்சென்று, மீண்டும் கொண்டு வரும் போக்குவரத்துச் செலவு மிஞ்சும்.

இவ்வாறு அவர் தெரிவித்தார்.