தியாகுவுக்கு ஆதரவாக இடிந்தரை பெண்கள் உண்ணாவிரதம்!

by **Tamil** Sun Oct 06, 2013 7:19 pm

நெல்லை: இலங்கையில் காமன்வெல்த் மாநாடு நடத்தக்கூடாது என வலியுறுத்தி சென்னையில் உண்ணாவிரதம் இருந்து வரும் தியாகுவுக்கு ஆதரவாக இடிந்தகரை பெண்களும் இன்று உண்ணாவிரதத்தில் ஈடுபட்டனர்.

தியாகுவுக்கு ஆதரவாக இடிந்தரை பெண்கள் உண்ணாவிரதம்! Idinthakarai01

கூடங்குளம் அணுஉலைக்கு எதிரான இடிந்தகரை மக்கள் போராட்டத்தின் 782வது நாளான இன்று, இலங்கையில் காமன்வெல்த் மாநாடு நடத்தக் கூடாது என்பதற்காகவும், இந்தியா காமன்வெல்த் மாநாட்டுக்கு செல்லக்கூடாது என்பதற்காகவும் சென்னையில் உண்ணாவிரத போராட்டம் நடத்தும் தியாகுக்கு ஆதரவாக, இடிந்தகரை பெண்களும் உண்ணாவிரதம் இருந்து தங்கள் எதிர்ப்பை இந்திய அரசுக்கும், இலங்கைக்கும் தெரிவித்தனர்.

தியாகுவுக்கு ஆதரவாக இடிந்தரை பெண்கள் உண்ணாவிரதம்! Idinthakarai02

அதோடு, இன்று தங்கள் கிராமத்துக்குள் கள்ளத்தனமாக விற்றுவந்த மதுபானங்களை

கைப்பற்றி பெண்களே அழித்தனர். இதன் மதிப்பு ரூ.10 ஆயிரத்திற்கும் அதிகமாக இருக்கும். இதுகுறித்து போராட்டத்தில் ஈடுபட்ட பெண்களிடம் கேட்டபோது, ''அரசு எங்கள் மீது தொடர்ச்சியாக பல வழக்குகளை போட்டு முடக்க எண்ணுகிறது. இரண்டு நாட்களுக்கு முன்னர்கூட ஒரு நாட்டுக் குண்டு இங்கு வெடித்தது. அதை போராட்டம் நடத்தும் நாங்கள் தான் போட்டோம் என்ற விதத்தில் செய்தியை காவல்துறை பரப்புகிறது.

இடிந்தகரையில் குண்டு இருக்கிறது என்று சொல்வதும், நாட்டுக்குண்டுகளை கைப்பற்றியதாக காவல்துறை அறிவிப்பதும், முழுக்க முழுக்க அவர்கள் தங்கள் ஆட்களை வைத்தும் செய்யும் செயல்கள், அரசே பரப்பும் வதந்திகள். குண்டுகள் மட்டுமல்ல எங்கள் கிராமத்தில் மதுபானம் கூட இருக்கக்கூடாது என்றுதான் அதனை நாங்கள் அழிக்கிறோம். ஆனால் அரசு எங்களை குண்டு தயாரிக்கிறவர்கள் என்கிறது. அணுஉலைக்கு எதிரான போராட்டத்தை முடிவுக்கு கொண்டு வருவதற்கு அரசு செய்யும் பல சதிகளில் இதுவும் ஒன்று' என்றனர்.

மகா.தமிழ்ப் பிரபாகரன்
news.vikatan.