10 மாதமாக ஒரே உடையுடன் ஈரான் சிறையில் வாடிய தமிழக மீனவர்கள்

by **மாலதி** Thu Sep 19, 2013 12:26 pm

சென்னை:""போதிய உணவு, குடிநீர் இல்லாமல், பத்து மாதங்களாக, ஒரே உடையை அணிந்து கொண்டு, சொந்த ஊருக்கு திரும்ப வழி கிடைக்காதா என ஏங்கியபடி, பயங்கரமான கொடுமைகளை அனுபவித்து வந்தோம். எங்களை மீட்க உதவிய, தமிழக முதல்வருக்கு, நன்றிக்கடன் பட்டுள்ளோம்,'' என, ஈரான் சிறையில் இருந்து மீட்கப்பட்ட, 16 மீனவர்கள் கண்ணீர் மல்க தெரிவித்தனர்.
10 மாதமாக ஒரே உடையுடன் ஈரான் சிறையில் வாடிய தமிழக மீனவர்கள் Tamil_News_large_806936

10 மாதமாக ஒரே உடையுடன் ஈரான் சிறையில் வாடிய தமிழக மீனவர்கள் Tamil_News_large_806936

ராமநாதபுரம் மாவட்டம், காரன்காடு கிராமத்தை சேர்ந்த ஜெகராஜ், முள்ளிமுனை கிராமத்தை சேர்ந்த மாயாண்டி, முத்துதர்மா; மோர்பண்ணை கிராமத்தை சேர்ந்த ராஜ கருப்பையா, சாகிப்; திருபாலைக்குடி கிராமத்தை சேர்ந்த காளியப்பன், காளி கண்ணதாசன், மாயகிருஷ்ணன், உமாசெல்வம்.கடலாடியை சேர்ந்த கிறிஸ்டின் ராஜ்; கன்னியாகுமரி மாவட்டம், ஆரோக்கியபுரத்தை சேர்ந்த மைக்கேல் ஆண்டனி, ஆண்டனி சுரேஷ், ஆரோக்கிய கெவின்ராஜ்; குளச்சலை சேர்ந்த ஜெயசீலன், அன்ஜைரோ; நாகப்பட்டினம் மாவட்டம், பழையாறை சேர்ந்த விமல்ராஜ், ஆகியோர், சவுதி அரேபியாவில் உள்ள, தனியார் மீன்பிடி நிறுவனத்தில், குத்தகை அடிப்படையில், மீனவர்களாக வேலை செய்து வந்தனர். ஈரான் கடல் எல்லைக்குள் புகுந்த இவர்கள் கைது செய்யப்பட்டு, 10 மாதமாக அங்குள்ள சிறையில் அடைக்கப்பட்டிருந்தனர். கடந்த, 16ம் தேதி, விடுவிக்கப்பட்டனர். நேற்று முதல்வரை சந்தித்து, நன்றி தெரிவித்தனர்.

கொடுமை:

முதல்வரை சந்தித்த மீனவர்கள், சிறையில் அனுபவித்த கொடுமைகளை, கண்ணீர் மல்க தெரிவித்தனர். அவர்கள் கூறியதாவது:கிறிஸ்டின்ராஜ்: சிறையில், தினமும் காலை ஒரு பேரிச்சம்பழம், ஒரு ரொட்டி கொடுத்தனர். ரொட்டியை சாப்பிட முடியாது. மதியம் சிறிதளவு சாதம், ஒரு ஸ்பூன் குழம்பு கொடுப்பர். அதுவும் சாப்பிடும் நிலையில் இருக்காது. இரவு ஒரு ரொட்டி தருவர். எதையும் சாப்பிட முடியாது. உயிர் வாழ வேண்டும் என்பதற்காக, அவற்றை சாப்பிட்டோம். சிறை பிடிக்கப்பட்டதில் இருந்து, ஒரே துணியுடன் இருந்தோம். மாற்றுத்துணி தரவில்லை. சென்னை வரும் வரை, அதே துணியுடன் வந்தோம். இங்கு அதிகாரிகள் பேன்ட், சட்டை கொடுத்தனர்.சிறையில், குளித்துவிட்டு, ஈரத் துணியை அணிந்து கொள்வோம். அந்தத் துணி காய வேண்டும் என்பதற்காக, சிறிது நேரம் சிறைக்குள் நடப்போம். அனைவரும் ஒரே அறையில் தங்கி இருந்தோம்.குடிக்க தண்ணீர் தருவதில்லை. கழிவறையில் உள்ள குழாயில் வரும் தண்ணீரை, கையில் பிடித்து குடிப்போம். வெளியில் சொல்ல முடியாத கொடுமைகளை அனுபவித்தோம். நாளடைவில், குடும்பத்தினரை சந்திக்காமலே, இறந்து விடுவோமோ என்ற பயம் ஏற்பட்டது.அப்போது எங்களுடன் இருந்த கைதிகள், "குடும்பத்தினரிடம் பேச வேண்டும் என வலியுறுத்தி, உண்ணாவிரதம் இருங்கள்' என்றனர். அதை ஏற்று, ஒரு நாள் உண்ணாவிரதம் இருந்தோம். அதிகாரிகள் வந்தனர்; விவரம் தெரிவித்தோம்; ஆனால், நடவடிக்கை எடுக்கவில்லை.

அதன்பின் ஈரான் நாட்டை சேர்ந்த கைதி ஒருவர் உதவியோடு, இரண்டு நிமிடம் மட்டும், குடும்பத்தினரிடம் பேச அனுமதி பெற்று பேசினோம்.அப்போது, முதல்வர் எங்கள் குடும்பத்திற்கு, ஒரு லட்சம் ரூபாய் வழங்கியதும், அவர் எங்களை மீட்க, நடவடிக்கை எடுப்பதும் தெரிந்தது. சற்று நிம்மதி அடைந்தோம். தற்போது, சிறையில் இருந்து மீண்டு வந்தது, பெரிதும் மகிழ்ச்சியை அளிக்கிறது.

உமாசெல்வம், 40: ஈரான் கடற்படை, டிசம்பர், 14ம் தேதி எங்களை கைது செய்தது. தெரியாமல் செய்த தவறுக்காக, நாங்கள் சிறையில், நிறைய கஷ்டப்பட்டோம். சிறையில் சாப்பாடு மோசமாக இருந்தது.ஒரு நாளைக்கு, ஒரு ரொட்டியும், சிறிதளவு பேரிச்சம் பழங்களும், உணவாக தரப்பட்டது. தமிழக முதல்வரின் முயற்சியால், தற்போது மீட்கப்பட்டு, தாயகம் திரும்பி உள்ளோம்.

சாகிப், 30: எனக்கு குழந்தை பிறந்த செய்தி, சென்னை வந்த பிறகு தான் தெரிந்தது. ஈரான் சிறைவாசம், மிகவும் கொடுமையாக இருந்தது. சிறையில் அடைபட்ட பிறகு, வெளி உலகத்துடனான தொடர்பு முற்றிலும் துண்டிக்கப்பட்டது.சிறையில் இருந்த எங்களை, ஈரானில் உள்ள, இந்திய தூதரகத்துடன் பேச கூட அனுமதிக்கவில்லை. இன்னொரு முறை, அங்கு வேலை கிடைத்தாலும், செல்ல மாட்டேன்.

மீனவரின் உறவினர், ராசக்கிளி, 60: நாங்கள் ஐந்து லட்சம் ரூபாய் கடன் வாங்கி, என் மகன் விமல்ராஜை, வெளிநாட்டிற்கு வேலைக்கு அனுப்பி வைத்தோம். என் மகன் கைதான பிறகு, எங்கள் குடும்ப நிலை கேள்விக்குறியாக இருந்தது. முதல்வர் ஜெயலலிதா, ஒரு லட்சம் ரூபாய் வழங்கினார். தற்போது, எங்களது பிள்ளைகளையும் பத்திரமாக மீட்டுக் கொண்டு வந்துள்ளார்; அவருக்கு எங்களது நன்றி.இவ்வாறு, அவர்கள் கூறினர்.

உறவினர்கள் ஏக்கம்:

ஈரான் சிறையில் இருந்து விடுவிக்கப்பட்ட, 16 மீனவர்கள், நேற்று தலைமை செயலகத்தில், முதல்வர் ஜெயலலிதாவை சந்தித்து நன்றி கூறினர். அவர்களை பார்க்க, உறவினர்கள், அவர்களை விடுவிக்க போராடிய, தென்னிந்திய மீனவர் தோழமை அமைப்பு நிர்வாகிகள், தமிழக மீனவர் பேரவை நிர்வாகிகள் வந்திருந்தனர். அவர்கள் முதல்வரை சந்திக்க அனுமதிக்கப்படவில்லை. "நிதியுதவி வழங்கிய முதல்வரை, நேரில் சந்தித்து, நன்றி தெரிவிக்க ஆசைப்பட்டோம். அதிகாரிகள் அனுமதிக்கவில்லை' என, தலைமைச் செயலக வளாகத்தில் காத்திருந்த, மீனவர்களின் உறவினர்கள் தெரிவித்தனர்.