அரசின் போலி முகத்தை உடைத்தெறிவதற்கு தமிழ் மக்கள் அனைவரும் செயற்பட வேண்டும்

by **மாலதி** Sat Sep 07, 2013 7:44 am

எதிர்வரும் வடக்கு மாகாண சபைத் தேர்தலில் தமிழர் தரப்பினைத் தோற்கடித்து தமிழர் உரிமைப் போராட்டத்தின் நியாயத்தன்மையினை மழுங்கடித்து உரிமைப் போராட்டத்தின் மூலம் முன்வைக்கப்பட்ட கோரிக்கைகள் எந்தவகையிலும் மக்களால் ஏற்றுக்கொள்ளப்படவில்லை என்ற செய்தியை சர்வதேச சமூகத்திற்குப் பறைசாற்றுவதற்காக சிறிலங்கா அரசானது பல்வேறு முயற்சிகளை மேற்கொள்கிறது.

எனவே அரசின் இந்த போலி முகத்தை உடைத்தெறிவதற்கு தமிழ் மக்கள் அனைவரும் தமிழ்த் தேசியக் கூட்டமைப்புக்கே தமது ஆதரவை வழங்குமாறு யாழ். பல்கலைக்கழக ஆசிரியர் சங்கம் வேண்டுகோள் விடுத்துள்ளது.

இது தொடர்பாக ஆசிரியர் சங்கம் இன்று வெள்ளிக்கிழமை வெளியிட்டுள்ள அறிக்கையில் மேலும் தெரிவிக்கப்பட்டுள்ளதாவது,

1987ஆம் ஆண்டு எம்விருப்பத்திற்கு மாறாக எம்மீது திணிக்கப்பட்ட எந்தவொரு அதிகாரமுமற்ற மாகாணசபை முறைமையானது எம்மக்களின் அபிலாசைகளை எந்தவகையிலும் ப+ர்த்திசெய்யமாட்டாது என்பதை யாவரும் அறிவோம். வென்றெடுக்கப்படும் மாகாண ஆட்சியானது எந்தவகையிலும் எம் இழப்புகளுக்கு ஈடாகமாட்டாது என்பதை யாவரும் அறியவர். இதன் மூலம் எந்தவகையிலும் எம் உரிமைகளை வென்றெடுக்க முடியாது என்பதனையும் எம்மக்கள் அறிவர்.

இருந்தபோதிலும் நடைபெறவிருக்கும் தேர்தலானது எமக்கும் எம்மை உன்னிப்பாக அவதானித்துக்கொண்டிருக்கும் சர்வதேசத்திற்கும் எவ்வளவு முக்கியமானது என்பதை எம்மக்கள் தெளிவாக உணர்ந்துகொள்ளவேண்டும்.

இலங்கை அரசிடமிருந்து எதையும் பெறமுடியாது என உணர்ந்து இன்று சர்வதேச சமூகத்திடம் எம் உரிமைக்காக வாதாடிக்கொண்டிருக்கும் நாம் இத்தேர்தல் மூலம் பல்வேறு செய்திகளை, எம்மக்களின் விருப்பங்களை, எம் எதிர்பார்ப்புக்களை சர்வதேச சமூகத்திற்கு எடுத்துரைக்கும் ஓர் சந்தர்ப்பமாகப் பயன்படுத்தவேண்டிய கட்டாயத்திற்கு நாம் தள்ளப்பட்டுள்ளோம்.

அதேநேரம் எம்மை உன்னிப்பாக அவதானித்துக்கொண்டிருக்கும்சர்வதேச சமூகமானது இத்தேர்தல் மூலம் தன்னுடைய பல்வேறு வினாக்களுக்கும் சந்தேகங்களுக்கும் விடைதேடும் ஓர் சந்தர்ப்பமாக நோக்குகின்றது.
கடந்த 30வருடங்களிற்கு மேலாக தமிழர் தரப்பால் முன்வைக்கப்படும் அரசியல் அபிலாசைகள் தொடர்பான கோரிக்கைகள் எந்தளவு தூரம் நியாயத்தன்மை உள்ளவை என்பதை நாடிபிடித்துப்பார்க்கும் ஓர் நிகழ்வாக சர்வதேச சமூகம் இதனைப் பயன்படுத்தக்காத்திருக்கிறது.

இறுதி யுத்தத்தின்போது அநியாயமாகக் கொல்லப்பட்ட இலட்சக்கணக்கான எம்மக்களின் உயிர்களுக்கு சர்வதேசத்திடம் நியாயம் தேடிக்கொண்டிருக்கும் நாம் தெளிவான செய்திகளை சர்வதேசத்திற்கு வழங்கும் ஓர் களமாக இதனைப்பயன்படுத்த முன்வரவேண்டும்.

சுதந்திரமடைந்த காலத்திலிருந்து இலங்கை அரசினால் நடாத்தப்படும் தேர்தல்களில் நம்பிக்கை இழந்த நாம் இதனையும் அவ்வாறு நோக்காது யாவரும் ஒன்றுபட்டு தமிழ் மக்களின் அபிலாசைகளான தமிழர் தாயகம், தமிழ் தேசியம், சுயநிர்ணய உரிமையினை வென்றெடுப்பதற்காகப் போராடும் தமிழர் தரப்பினை வெல்லவைக்கவேண்டிய கடப்பாடு எம்மினத்திற்குக் காலமிட்டுள்ளது.

இந்தத் தேர்தலில் தமிழர் தரப்பினைத் தோற்கடித்து தமிழர் உரிமைப் போராட்டத்தின் நியாயத்தன்மையினை மழுங்கடித்து உரிமைப் போராட்டத்தின் மூலம் முன்வைக்கப்பட்ட கோரிக்கைகள் எந்தவகையிலும் மக்களால் ஏற்றுக்கொள்ளப்படவில்லை என்ற செய்தியை சர்வதேச சமூகத்திற்குப் பறைசாற்றுவதற்காக அரசானது பல்வேறு முயற்சிகளை மேற்கொள்கிறது. எம்மக்களையே பகடைக்காய்களாகப் பயன்படுத்தி தேர்தலில் போட்டியிட வைத்து எம்மிடையே பிளவை உண்டுபண்ணும் முயற்சியில் அரசதரப்பானது ஈடுபட்டு வருவதுடன் வாக்குகளை சிதறடித்து தமிழர் தரப்பைத் தோற்கடிக்கும் முயற்சியினை பெருமெடுப்பில் மேற்கொண்டுவருவதை நீங்கள் அறிவீர்கள். மேலும், பொய் வாக்குறுதிகள் மூலம் எம்மை ஏமாற்றும் முயற்சிகளிலும் ஈடுபடுகின்றது.

அண்மையில் இலங்கைக்கு விஜயம் செய்த ஐ.நா. மனித உரிமைகள் பேரவை உயர்ஸ்தானிகர் நவநீதம்பிள்ளை இலங்கை அரசு தொடர்பாக தெரிவித்த கருத்துக்கள் இலங்கை அரசின் போக்கின் உண்மைத் தன்மையினை சர்வதேச சமூகத்திற்கு எடுத்துக்காட்டியுள்ளது.

உண்மையான அபிவிருத்திக்கு என்றும் நாம் எதிரானவர்கள் அல்ல, அபிவிருத்தி ரீதியாக கடந்த 60வருடங்களிற்கு மேலாக திட்டமிட்டுப் புறக்கணிக்கப்பட்ட எம்தேசமானது இன்று இரவோடு இரவாக அபிவிருத்தி செய்யப்படும் உள்நோக்கை நாம் உன்னிப்பாகக் கவனித்துக்கொள்ளவேண்டும்.

சர்வதேச சமூகத்தினால் எம்தேச அபிவிருத்திக்கென வழங்கப்பட்ட நிதியுதவியானது அரச உதவியாக அரசினால் செய்யப்படும் அபிவிருத்தியாகக் காட்டப்படுகின்றது. இது ஓர் ஏமாற்று வித்தை. இன்று மேடை போட்டு ஆடிக்கொண்டிருக்கும் அரசின் கபட நாடகத்திற்கு சரியான பதிலை வழங்க முன்வரவேண்டும்.

உரிமைகளுக்காக போராடிய எம்மினம் சலுகைகளுக்காக விலைபோகாது என்பதை சர்வதேச சமூகத்திற்கும் அரசிற்கும் உணர்த்தவேண்டும். வடக்கில் வாழும் சகல மக்களும் அணி அணியாகத்திரண்டு, குடும்பம் குடும்பமாகச் சென்று வாக்களிக்கவேண்டிய கடப்பாடு இன்று எமக்கு ஏற்பட்டுள்ளது. எம்மிடையே என்னதான் முரண்பாடுகள் இருந்தாலும் அதனை இன்று பெரிதுபடுத்தாது தமிழர் தரப்பினை பெருவெற்றியடையச் செய்யவேண்டிய கடப்பாடு எங்கள் யாவருக்கும் உள்ளது என்பதை நாம் மறந்துவிடலாகாது.

எனவே அனைத்து மக்களையும் தமிழர் தரப்பினை ஆதரித்து வாக்களிக்குமாறு கேட்டுக்கொள்கின்றோம்.