தீக்கோழி நினைவுக் கருத்தியல் போன்ற சிங்களத்தின் படைத்துறை!

தனது தலையை மட்டும் மணலில் புதைத்துக்கொண்ட தீக்கோழி நினைக்குமாம்... அப்பாடா, இனித் தன்னை யாருமே கண்டுகொள்ள முடியாதென! அவ்வாறான தீக்கோழி நினைவுக் கருத்தியல் போல, நவிபிள்ளையின் வடக்குப் பயணத்தில் சிங்களத்தின் படைத்துறை நடந்துகொண்டாலும், இவ்வாறான தகிடுதத்தங்களையெல்லாம் அவதானித்தபடியே நவிபிள்ளை தனது வடக்கு நிகழ்ச்சிநிரலை முடித்துக்கொண்டு சென்றும் விட்டார். நவிபிள்ளை வடக்கிலிருந்து அகன்றதுமே பழைய குருடி கதவைத் திறவடி பாணியில் சிங்களப் படைத்துறை நடந்து கொண்டதன் மூலமாக, முள்ளிவாய்க்காலில் வைத்து நவிபிள்ளையிடம் மக்கள் கூறிய ஒரு உண்மையும் ஆதாரப்படுத்தப்பட்டுவிட்டது.

நவிபிள்ளையின் வடக்கு பயணத்தின்போது அவர் சென்ற இடங்களிலெல்லாம் மக்கள் ஒரு உண்மை நிலைமை அவருக்குக் கூறியிருந்தனர். அதாவது, ஐ.நா. மனித உரிமை ஆணையாளர் என்ற அவரது தகுதிநிலைப் பயணமானது வேறுவழியின்றி வடக்கிலுள்ள ஶ்ரீலங்கா படைத்துறை பிரசன்னத்தின் மீது ஒரு தற்காலிக கிரகண நிலையை ஏற்படுத்தி இருந்ததை மக்கள் தெளிவாகவே அவரிடம் எடுத்துரைத்திருந்தனர்.

நவிபிள்ளை பயணம் செய்த கிளிநொச்சி, முல்லைதீவு உள்ளிட்ட இடங்களில் இருந்த ஆனையிறவு சோதனைச் சாவடி உட்பட்ட காவலரண்களை படைத்துறை தற்காலிகமாக அகற்றியிருந்தது. இதேபோல வேறு சில காவலரண்களை பகிரங்கமாகக் காண முடியாதவாறு உருமறைப்பும் செய்திருந்தது. அதாவது, ஆகக்குறைந்தது நவிபிள்ளை பயணம் செய்யும் வீதிகளில் இராணுவப் பிரசன்ன தாழ்வு நிலையை அவர் காண வேண்டுமென்பது கொழும்பின் தந்திரம்! ஆனால் கொழும்பின் இந்தத் தந்திரத்தை மக்கள் நவிபிள்ளையிடம் நேரடியாகவே அம்பலப்படுத்தியமை அதற்குக் கிடைத்த ஒரு அடியாகவும் மாறிவிட்டது.

இப்போது நவிபிள்ளை சென்றவுடன் மீண்டும் தனது அரிதாரத்தைக் கலைத்துள்ள படைத்துறை, பழையபடி மீண்டும் வன்னியில் தனது இராணுவப் பிரசன்னத்தைக் கொண்டுவந்துள்ளது. ஏ9 ஆனையிறவு வீதிச் சோதனைச் சாவடி மீண்டும் திறக்கப்பட்டு ஶ்ரீலங்கா படைத்துறையின் பதிவுகள் இடம்பெறுகின்றன. எது எப்படியோ, நவிபிள்ளைக்காக உருமறைப்பு செய்யப்பட்ட சகல படைத்தறை தில்லாலங்கடிகளும் மீண்டும் களைகட்ட ஆரம்பித்துவிட்டதால் வடக்கு வீதிகளில் படைத்துறைப் பிரசன்னம் மீண்டும் வலுவாகிவிட்டது.

ஆனால் தமது தரப்பில் மேற்கொள்ளப்படும் இவ்வாறான அரிதாரப் பூச்சுக்கள் மற்றும் கலைப்புகள் குறித்து நவிபிள்ளை மேற்பார்த்த ஜெனிவா மனித உரிமை பொறிமுறை மிகத் துல்லியமாக உணர்ந்திருப்பது தான் இங்கு கொழும்பு உணரத்தவறிய ஒரு விடயமாகும்! ஐ.நா. மனித உரிமைப் பேரவை தனது வரலாற்றில் எத்தனை மனித உரிமை நாசகாரிகளின் தில்லாலங்கடித்தனங்களை ஏற்கனவே எடைபோட்டுள்ளது. கொழும்பு போன்ற 'கொசுறுகள்' இனியும் அதனை இவ்வாறான தந்திரங்களால் ஏமாற்ற முடியுமா என்பது சந்தேகமே!

எது எப்படியோ, நவிபிள்ளையின் பயணம் நிறைவடைந்தும்விட்ட நிலையில், இன்னுமொரு அசாதாரண விடயத்தையும் கண்டுகொள்ள முடிகிறது. அதாவது மகிந்த & co வின் மேர்வின் சில்வா மற்றும் உருமறைப்பு செய்யப்பட்ட ராவணா பலய அமைப்பு போன்ற அரைவேக்காடுகள் நவிபிள்ளை மீது தமது மூன்றாந்தரக் கருத்துக்களைக் கட்டவிழ்த்துவிட்டாலும், விமல் வீரவங்ச, சம்பிக்க ரணவக்க போன்ற வீராதி வீரர்களும் சூரர்களும் சற்று மௌனமாகவே இருந்தனர்.

தமது உடலங்களின் மீதுதான் நவிபிள்ளையின் பயணம் இடம்பெற வேண்டுமென வீரம் பேசியவர்கள் அடங்கிக்கிடக்க, நவிபிள்ளையின் இலங்கை நிகழ்ச்சி நிரல் இடம்பெற்றமைக்கு ஒரு முக்கிய காரணம், அவரது பயணம் நவிபிள்ளை என்ற தனிமனித விருப்பு வெறுப்பு சார்ந்தது அல்ல என்ற யதார்த்தமே! உலகின் மனித உரிமை ஒழுங்குக்குப் பொறுப்பான ஜெனிவா பொறிமுறை வழங்கிய பொறுப்பை நிறைவேற்றுவதற்காகவே ஆணையாளர் என்ற பொறுப்பில் அவர் இலங்கையின் சுற்றிச் சுழன்றதை மகிந்த & co உணர்ந்துள்ளது.

இதனால்தான் மகிந்த கூட பெலாரசில் வைத்து நவிபிள்ளை குறித்து எதுவித சாடல்களையும் மேற்கொள்ளாது மனித உரிமைப் பேரவை மீதே தனது காட்டமான அர்ச்சனையை வழங்கியிருந்தார். ஜெனிவாவில் வைத்து, நவிபிள்ளை இலங்கை விடயத்தில் நடந்துகொள்ளும் முறை சரியில்லை எனச் சாடிய சிங்களத்தின் மனித உரிமைகள் தொடர்பான மகிந்தவின் சிறப்புப் பிரதிநிதி மகிந்த சமரசிங்க, ஶ்ரீலங்கா வந்த நவிபிள்ளை சந்திக்க வேண்டிய நிலையும் உருவாகியது.

நவிபிள்ளையிடம் மறைக்க வேண்டிய அளவுக்கு தம்மிடம் ஒன்றுமில்லையென சமரசிங்க சமரசம் செய்ய முனைந்தாலும் நவிபிள்ளையின் தரப்பில் இருந்து நோக்கினால், கொழும்பு நிறைவேற்ற வேண்டிய கடப்பாடுகள் நிறையவே உள்ளன. இதனால்தான் ஆகக் குறைந்தது ஏற்கனவே உள்ள ஜெனிவா-கொழும்பு விரிசலை மேலும் விரிசலாக்கும் வகையில் நவிபிள்ளையின் பயணக் காலத்தில் தாம் நடந்துகொள்ளக் கூடாது என கொழும்பு சற்றுப் பம்மியது போலும்! குறிப்பாக அண்மையில் வெலிவேரியா துப்பாக்கிச் சூட்டுச் சம்பவம் என்ற கொள்ளியை எடுத்து மகிந்த & co தனது தலையில் சொறிந்து கொண்டதால் வேறுவழியின்றி நவிபிள்ளையின் பயணத்தில் சிங்கள வீராதிவீர சூராதி சூரயோக்கள் சற்று அடக்கம் பேணினர் போலும்!

[You must be registered and logged in to see this link.]

நீங்கள் கூறுவது முற்றிலும் உண்மைதான்