இது 120 வது படம் -இராம.நாராயணனின் வெற்றிப் பயணம்

தயாரிப்பாளருக்கு
மலர் வளையம் வச்சாலும் பரவாயில்லை. தனக்கு பூச்செண்டு வேணும் என்று
நினைக்கிற டைரக்டர்கள்தான் இப்போது அதிகம். ஒரு கோடி கூட பிசினஸ் ஆகாத
படத்திற்கெல்லாம் நான்கு கோடி ரூபாய் பட்ஜெட்டில் படம் எடுக்கிற இந்த
ஆர்வகோளாறு இயக்குனர்களுக்கு மத்தியில் தன்னை நம்பி வந்தவர்களை
காப்பாற்றி, கரையேற்றிய டைரக்டர்களில் முக்கியமானவர் இராம.நாராயணன். இவரது
120 வது படம் குட்டி பிசாசு. இதில் முக்கால்வாசி படங்கள் சில்வர் ஜுப்ளி
என்றால் நம்ப முடிகிறதா?

இந்த
வெற்றிப்பயணத்தை உள்ளன்போடு கொண்டாடினார்கள் திரையுலக பிரமுகர்கள். அதே
விழாவில் குட்டி பிசாசு படத்தின் ஆடியோ வெளியீட்டு விழாவும் நடந்தது. இந்த
விழாவில் இராம.நாராயணன் பேசிய விஷயங்கள் நிஜமாகவே பாராட்டப்பட வேண்டியவை,

"நான்
எப்போதுமே பெரிய நடிகர்-நடிகைகளை வைத்துப் படம் எடுத்ததில்லை. அவர்களின்
கால்ஷீட்டுக்காக காத்திருந்ததில்லை. அவர்களிடம், கால்ஷீட் கேட்டு, அவர்களை
சங்கடப்படுத்தியதும் இல்லை.அவர்களுக்கு தர்மசங்கடம் ஏற்படுத்துவதை
விரும்பாமல், மிருகங்களை வைத்து படம் எடுத்து வெற்றி பெற்றேன். இப்போது
மிருகவதை சட்டம் கொண்டுவரப்பட்டு கடுமையாக கடைப்பிடிக்கிறார்கள். அதனால்
மிருகங்களை வைத்து படம் எடுக்க முடியாத நிலை ஏற்பட்டுள்ளது. அதனால்தான்
குட்டிப்பிசாசு படத்தில், ஒரு காரை முக்கிய கதாபாத்திரமாக்கி படம் எடுத்து
இருக்கிறேன்.

காரை வைத்தும் படம்
எடுக்க கூடாது என்று சட்டம் கொண்டுவந்தால், சைக்கிளை வைத்தும் படம்
எடுப்பேன். காரணம் இந்த திரை துறையை விட்டு என்னால் வேறு எங்கும் செல்ல
முடியாது. இந்தப் படத்துக்காக, 18 அடி உயர கார் மனிதன் உருவாக்கப்பட்டு
இருக்கிறான். அவன் செய்யும் அட்டகாசங்கள் படத்தின் சிறப்பு அம்சமாக
இருக்கும். அதோடு மந்திர மனிதன், ராட்சஷ பாம்பு ஆகியவைகளையும்
கிராபிக்சில் உருவாக்கி இருக்கிறோம்.

தமிழ், தெலுங்கு, கன்னடம் ஆகிய 3 மொழிகளில் உருவாகியுள்ள இந்த படம் கோடை விடுமுறையில் வெளிவர இருக்கிறது..." என்றார்.