கச்சதீவைப் பற்றிப் பேசக் கூடாது: இந்தியப் பாராளுமன்றில் தடை

by **mmani** Fri Aug 30, 2013 8:03 am

இந்தியாவுக்கு இலங்கை நட்பு நாடாக இருப்பதால் கச்சதீவைப் பற்றி பாராளுமன்றில் விவாதம் நடத்துவதற்கு இந்திய வெளியுறவுத் துறை அமைச்சு தடை விதித்துள்ளதால் பெரும் பரபரப்பு ஏற்பட்டுள்ளது.

இந்தியாவுக்கும், இலங்கைக்கும் இடையே இராமேஸ்வரத்திற்கு அருகே கச்சதீவு உள்ளது. 1974ம் ஆண்டு இரு நாடுகளுக்கும் இடையே ஏற்படுத்தப்பட்ட ஒப்பந்தத்தின் படி கச்சதீவு, இலங்கைக்கு தாரை வார்க்கப்பட்டது.

அதையடுத்து, கச்சதீவுக்கருகில் தமிழக மீனவர்கள் மீன் பிடிக்கவோ, வலைகளை உலர்த்தவோ கூடாது என இலங்கை கடற்படை தடை விதித்து வருகிறது. அந்தப் பகுதிக்குச் செல்லும், நம் மீனவர்கள் தாக்குதலுக்கு ஆளாகின்றனர்.நீண்ட நெடுங்காலமாக கச்சதீவில் உள்ள கிறிஸ்தவ ஆலயத்தில் வழிபாடு நடத்தக் கூட, இலங்கை அரசிடம் அனுமதி பெற்றே செல்ல வேண்டிய நிலை ஏற்பட்டுள்ளது.

கச்சதீவு, இலங்கைக்கு வழங்கப்பட்டுள்ளதால், இராமேஸ்வரம் பகுதி மீனவர்களுக்கு பெரும் பாதிப்பாக உள்ளது. எனவே, அந்தத் தீவை, மீண்டும் இந்தியா வசம் கொண்டு வர வேண்டும் அதற்கான ஏற்பாடுகளை மத்திய அரசு மேற்கொள்ள வேண்டும் என, தமிழக மீனவர்கள் மற்றும் அரசியல் கட்சிகள் தரப்பில் தொடர்ந்து வலியுறுத்தப்படுகிறது.

எனினும், மத்திய அரசு மௌனம் சாதித்து வருகிறது.கச்சதீவு விவகாரம் குறித்து, இந்தியப் பாராளுமன்றில் சிறப்பு விவாதம் நடத்த வலியுறுத்தி, தி.மு.க., எம்.பி.,யான இளங்கோவன் மற்றும் இந்திய கம்யூனிஸ்ட் எம்.பி., லிங்கம் ஆகிய இருவரும், சபாநாயகரிடம் மனு அளித்துள்ளனர்.

நடப்பு மழைக்கால கூட்டத்தொடர் முடிவதற்குள், இதுகுறித்து விவாதம் நடத்த வேண்டுமென்று கோரிக்கை விடுத்திருந்தும், அதற்கான அறிகுறிகள் இதுவரை தென்படவில்லை.இந்த சூழ்நிலையில் தான், கச்சதீவு பற்றி பாராளுமன்றில் பேசுவதற்கு, வெளியுறவுத்துறை அமைச்சகம், முட்டுக்கட்டை போட்டுள்ள விவகாரம் அம்பலமாகியுள்ளது.

எம்.பி.க்கள் சார்பில், இதுபோன்ற கோரிக்கைகளுக்காக, “நோட்டீஸ்” அளிக்கப்பட்டால், சம்பந்தப்பட்ட துறைக்கு கடிதம் மூலம், சபாநாயகர் அலுவலகம் கருத்துக் கேட்பது வழக்கம். அது போல், கச்சதீவு நோட்டீஸ் குறித்து, வெளியுறவுத் துறை அமைச்சகத்திடம் கருத்து கேட்கப்பட்டிருந்தது.அதற்கு பதிலளித்து, கடந்த, 5ம் திகதி, வெளியுறவுத் துறை அமைச்சகத்தின், இணைச் செயலர் அந்தஸ்த்தில் உள்ள ஹர்ஷ் வர்தன் சிரிங்லா என்பவர், பாராளுமன்ற செயலகத்துக்கு கடிதம் எழுதியுள்ளார்.

அக்கடிதத்தில் குறிப்பிடப்பட்டுள்ளதாவது,

இந்தியாவுக்கும் இலங்கைக்கும் இடையிலான, கடல் எல்லைகள் எவை என்பது குறித்து, ஏற்கனவே வரையறுக்கப்பட்டு விட்டது. இதுகுறித்து, இரண்டு ஒப்பந்தங்களில், இரு நாடுகளும் கையெழுத்தும் இட்டுள்ளன. 1974 மற்றும் 1976ம் ஆண்டுகளில், இந்த ஒப்பந்தங்கள் கையெழுத்து ஆகியுள்ளன.

தன் கடல் எல்லைப் பரப்பில் எதையும் இந்தியா விட்டுக் கொடுக்கவில்லை. இருதரப்பும், ஒப்புக் கொண்ட படியே எல்லைகள் நிர்ணயிக்கப்பட்டு, முடிவு செய்யப்பட்டது. அவ்வாறு செய்ததில் கச்சதீவு, இலங்கை கடல் பரப்புக்குள் அமையும்படி ஆனது.

எனவே, கச்சதீவு இலங்கைக்கு சொந்தமான பகுதி இந்த விஷயம், முடிந்துபோன ஒன்று அதை திரும்பவும் பரிசீலனை செய்ய முடியாது.இலங்கை, இந்தியாவின் நட்பு நாடு நெருக்கமான நட்பு கொண்ட அண்டை நாடாக இலங்கை இருக்கும் போது, கச்சத்தீவு குறித்து பாராளுமன்றில் விவாதம் நடத்துவது, ஏற்புடையது அல்ல.

அவ்வாறு, விவாதம் நடத்தப்பட்டால், இருநாடுகளின் நட்புறவில் மிகப்பெரிய தர்மசங்கடத்தை, ஏற்படுத்தும். எனவே, எம்.பி.க்களின் கோரிக்கையை ஏற்க கூடாது. தவிர, இந்த தகவல்கள் எல்லாமே, வெளியுறவுத் துறை அமைச்சர் சல்மான் குர்ஷித்தின் ஒப்புதலின் படியே தெரிவிக்கப்படுகிறது.இவ்வாறு, அந்த கடிதத்தில், கூறப்பட்டுள்ளது.