தமிழினப் படுகொலையை ஞாபக மூட்டிய சிரியாவின் இரசாயனக் குண்டுத் தாக்குதல்கள்! photos

by **ஜனனி** Fri Aug 23, 2013 7:15 am

தமிழினப் படுகொலையை ஞாபக மூட்டிய சிரியாவின் இரசாயனக் குண்டுத் தாக்குதல்கள்!

சிரியாவின் தலைநகர் டமாஸ்கஸ் அருகே போராளிகளின் வசமிருந்த பகுதிகளில் நேற்றை தினம் (புதன்கிழமை) சிரியாவின் அரசுப்படையினர் இரசாயனக்குண்டுகளால் வீசித் தாக்குதல் நடத்தினர். இத்தாக்குதலில் பொதுமக்கள் 1300-க்கு மேற்பட்டவர்கள் கொல்லப்பட்டதாக அங்கிருந்துவரும் செய்திகள் கூறுகின்றன, இத்தாக்குதல் குறித்த வீடியோ ஆதாரங்களை போராளிகள் வெளியிட்டுள்ளனர். இதில் மூச்சுத்திணறி உயிருக்குப் போராடிக்கொண்டிருக்கும் சிறுவர்கள், பெரியவர்கள் எனப் பொதுமக்கள் மருத்துவமனைகளில் நிரம்பியிருக்கும் காட்சிகள் காட்டப்பட்டுள்ளன. உடனடியாகச் சம்பவப் பகுதிகளுக்குள் ஐ.நா. குழுவினர் விரைய வேண்டும் என்று பலரும் வலியுறுத்தியுள்ளனர்.

இந்த இரசாயனக் குண்டுத் தாக்குதல்கள் ஈழத்தில் இடம்பெற்ற தமிழினப் படுகொலையை கண்முன்னே நிறுத்துகிறது. ஈழத்தில் சிங்கள அரசு இந்திய அரசின் துணைகொண்டு பீரங்கித் தாக்குதல், விமானத் தாக்குதல், இரசாயனக் குண்டுகள் என்று தடைசெய்யப்பட்டவற்றைக் கொண்டு லட்சக்கணக்கான தமிழ் மக்களைக் குறிவைத்து அணு அணுவாய் துடிதுடிக்க அழித்தார்கள். அன்று எங்கள் தமிழ் மக்களை அழித்த போது இரசாயனக்குண்டுகள் மற்றும் தடைசெய்யப்பட்டவற்றைக் கொண்டு சிறீலங்கா அரசு அழிக்கிறது என்று கூறியதனை செவிமடுக்க மறுத்துவிட்டன சர்வதேச ஊடகங்கள். ஆனால் இன்று சிரியாவில் தங்களது கட்டுப்பாட்டுப் பகுதியில் இரசாயனக் குண்டுத் தாக்குதல்கள் நடத்தப்பட்டுள்ளன என்று அங்குள்ள போராளிகள் கூறியதனை செவிமடுத்து அதனை சர்வதேச ஊடகங்கள் தலைப்புச் செய்திகளாக வெளியிட்டுள்ளன. ஐ.நா. குழுவினர் உடனடியாக சம்பவப் பகுதிகளுக்குள் செல்லவேண்டும் என்று பல நாடுகளும் வலியுறுத்தியுள்ளன. சிரியாவில் உள்ள போராளிகளுக்கு அமெரிக்காவும் அதன் நட்பு நாடுகளும் ஆயுதங்களை வழங்கி அவர்களுக்கு ஆதரவாக இருப்பதனாலே தான் இரசாயனக் குண்டுத் தாக்குதல்கள் என்றும் செய்திகளை வெளியிட்டும் மேலும் மக்கள் கொல்லப்படுகிறார்கள் என்றும் முதலைக்கண்ணீர் வடிக்கிறார்கள்.

சிரியாவின் அரசானது அமெரிக்காவிற்கும் அதன் நட்பு நாட்டுகளுக்கும் ஆதரவாக இருந்திருந்தால், சிரியாவின் அரசு அங்குள்ள பயங்கரவாதத்தை அழிக்கப் போராடுகிறது, அதன் காரணமாக அங்கே சண்டைகள் நடைபெறுகின்றன அதன்போது மக்கள் சிக்கிக்கொண்டு இறந்துவிட்டார்கள் என்று செய்திகளை வெளியிட்டு இருப்பார்கள். உண்மையில் சிரியாவில் நேற்றைய தினம் இரசாயனக் குண்டுத் தாக்குதல்களினால் மக்கள் இறந்தார்கள் என்பது உண்மையே. அதனைப் போன்று இரசாயனக் குண்டுத் தாக்குதலினாலும் ஈழத்தில் தமிழ் மக்கள் அன்று கொல்லப்பட்டார்கள் என்பதற்குரிய ஆதரங்கள் உள்ளன. ஆனால் அவற்றை உலகம் தொடர்ந்து கண்டுகொள்ளாமல் இருக்கிறது.

காமன்வெல்த் கூட்டமைப்பில் இருந்து நீக்கவேண்டிய நாடு சிறீலங்கா, ஆனால் அதனை நீக்காமல் அந்த நாட்டிலேயே காமன்வெல்த் மாநாட்டினை நடத்தப்போகிறார்கள் கண் இருந்தும் குருடர்களைப் போன்று இருப்பவர்கள்.

இதனை விடக் கொடுமை ஈழத்தில் பீரங்கித் தாக்குதல், விமானத் தாக்குதல், இரசாயனக்குண்டுத் தாக்குதல்கள் என்று தடைசெய்யப்பட்டவற்றைக் கொண்டு லட்சக்கணக்கான தமிழ் மக்களைக் குறிவைத்து அணு அணுவாய் துடிதுடிக்க அழித்தும், அவர்களைப் புதைத்த பின்னர் புதைக்கப்பட்ட இடங்களில் புற்களும் முளைத்த பின்னர் நான்கு வருடங்களுக்குப் பிறகு ஐ. நா. மனித உரிமைகள் ஆணையாளர் சிறீலங்காவிற்கு விஜயம் மேற்கொள்ளப்போகிறாராம். இவர் விஜயம் மேற்கொள்ளப்போகிறார் என்பதை அறிந்த மஹிந்த லட்சக்கணக்கான தமிழ் மக்களை அழித்துப் புதைக்கப்பட்ட இடங்களில் முளைத்த புற்களை அகற்றிச் சுத்தமாக்கும் செயலில் இறங்கிவிட்டார்

ஐ. நா. மனித உரிமைகள் ஆணையாளர் சிறீலங்கா அரசிடம் நீங்கள் முள்ளிவாய்க்காலில் தமிழ் இனவழிப்பு மேற்கொண்ட தடயங்கள் அனைத்தையும் அழித்துவிட்டீர்களா? என்று சிறீலங்கா அரசிடம் கேட்டு அறிந்த பின்னர் சிறீலங்காவில் இனவழிப்பு நடந்து நான்கு வருடங்களுக்குப் பிறகு விஜயம் செய்கிறார் போல? ஐ. நாவிடம் கடத்தல் மன்னன் கோதபாய சவால் விடுகிறார் சிறீலங்காவில் மனிதவுரிமைகள் மீறப்பட்டதற்கு ஆதாரங்கள் இருந்தால் அதனைத் தங்களிடம் தாருங்கள் என்கிறார். இவர் நினைக்கிறார் அவர்கள் ஆதாரத்தை அளித்தால் சாட்சிகளையும் தனக்கு எதிராக யாராவது இருந்தால் அவர்களையும் கடத்திச் சென்று அழித்துவிடலாம் என்று திட்டம் தீட்டுகிறார்.

பீரங்கித் தாக்குதல், விமானத் தாக்குதல், இரசாயனக்குண்டுத் தாக்குதல்கள் என்று தடைசெய்யப்படவற்றை ஆயுங்களாகக் கொண்டு அழித்தவர்கள் இன்று உல்லாச வாழ்க்கை வாழ்ந்துகொண்டு சவால் விடுகிறார்கள், அநீதிகளுக்குத் துணை சென்றுகொண்டு இருக்கிறது உலகம். இதனால் அப்பாவி மக்கள் அழிந்துகொண்டே இருக்கிறார்கள். இதற்குக் காரணமானவர்கள் கூட்டாளிகளாக இருந்தால் தட்டிக் கேட்பதற்கு மறுக்கிறது சில உலகநாடுகள். எதிரியாக இருந்தால் அவர்களைத் தண்டிப்பதற்கு எதிரியின் களத்திலேயே இறங்கித் தண்டிக்கின்றன இந்த நாடுகள்.

இப்படம் ஒன்று ஈழத்தில் இரசாயனக் குண்டுத் தாக்குதலில் மாடுகள் பலியான புகைப்படம். அதனைப் போன்று நேற்றைய தினம் சிரியாவில் கால்நடைகள் இரசாயனக் குண்டுத் தாக்குதலில் மரணமடைந்த புகைப்படம்.

லிங்கேஸ்வரன் விஸ்வா