தனியார் மருத்துவ கல்லூரியில் கள்ளநோட்டை கல்விக் கட்டணமாக செலுத்திய பெற்றோர்!

புதுச்சேரி: புதுச்சேரியில் உள்ள தனியார் மருத்துவக் கல்லூரியில் கல்விக் கட்டணமான கள்ள நோட்டுகளை பெற்றோர் செலுத்திய சம்பவம் பெரும் பரபரப்பை ஏற்படுத்தியுள்ளது.
 
புதுச்சேரி மாநிலம் கிருமாம்பாக்கம் அருகே உள்ள பிள்ளையார்குப்பத்தில் தனியார் மருத்துவ கல்லூரி ஒன்று உள்ளது. இந்த கல்லூரியில் கடந்த சில நாட்களுக்கு முன்பு தின கூலியாக பணிபுரியும் ஊழியர்களுக்கு பணம் வழங்கப்பட்டது.

இந்த பணத்தை கொண்டு பொருட்களை வாங்கியபோது அதில் 500 ரூபாய் கள்ள நோட்டுகள் இருந்தது தெரிய வந்தது. இதனால் அதிர்ச்சி அடைந்த ஊழியர்கள் சிலர் இது பற்றி கல்லூரி நிர்வாகத்திடம் கூறினர். பின்னர் அந்த கள்ளநோட்டு ரூபாய்களை நிர்வாகத்திடம் ஒப்படைத்து விட்டு அதற்கு பதிலாக நல்ல ரூபாய் நோட்டுகளை வாங்கி சென்றனர். இது பற்றிய தகவல் கிருமாம்பாக்கம் போலீசாருக்கு தெரிய வந்தது.

இந்நிலையில் இது பற்றி கல்லூரியின் மக்கள் தொடர்பு அதிகாரி பாஸ்கரன் கிருமாம்பாக்கம் போலீசில் புகார் ஒன்று கொடுத்தார். அதில், "கல்லூரியில் படிக்கும் மாணவர்களின் பெற்றோர்களில் யாரோ ஒருவர் கல்வி கட்டணம் செலுத்தும்போது கள்ள 500 ரூபாய் நோட்டுகளை கொடுத்து உள்ளார். அது எங்களுக்கு தெரியவில்லை. இந்த பணத்தை ஊழியர்களுக்கு சம்பளம் பட்டுவாடாவின்போது கொடுத்து உள்ளோம். அவர்கள் புழக்கத்தில் விட்டபோது அதில் கள்ள நோட்டு இருந்தது தெரிய வந்தது. இந்த கள்ள நோட்டுகளை யார் கொடுத்தார்கள் என்று தெரியவில்லை. இது குறித்து விசாரணை நடத்தி அவர்கள் மீது நடவடிக்கை எடுக்க வேண்டும்" என்று புகாரில் கூறப்பட்டுள்ளது.

இது குறித்து கிராமப்புற போலீஸ் சூப்பிரண்டு தெய்வசிகாமணி கூறுகையில், இதுவரை மொத்தம் 115 ஐநூறு ரூபாய் கள்ள நோட்டுகளை கல்லூரி நிர்வாகம் மற்றும் ஊழியர்கள் ஒப்படைத்து உள்ளனர். இன்னும் எவ்வளவு கள்ளநோட்டுகள் இருக்கும் என்று தெரியவில்லை. சம்பளம் கொடுத்து 2 நாட்கள் ஆவதாலும், இடையில் தொடர் விடுமுறை என்பதாலும் பின்னரே அது பற்றிய விவரம் தெரியவரும் இந்த கள்ளநோட்டுகள் எப்படி வந்தது? எவ்வளவு பணம் வந்தது? யார் இந்த பணத்தை கொடுத்தார்கள்? என்பது குறித்து தீவிர விசாரணை நடத்தி வருகிறோம்" என்றார்