இலங்கையின் பிடிவாதம் தளா்ந்தது - ஐ.நாவின் விமானத்திலேயே நவிப்பிள்ளை வடக்கு கிழக்கிற்கு பறப்பார்!

அமெரிக்காவின் தேவைக்கமைய இலங்கை தொடர்பில் சர்வதேச விசாரணை ஒன்றை நடத்துவதற்கான விடயங்களை தேடுவதற்காகவே ஐக்கிய நாடுகள் மனித உரிமை ஆணையாளர் நவநீதம்பிள்ளை இலங்கை செல்வதாக ஜெனிவாவுக்கான இலங்கையின் முன்னாள் பிரதிநிதி தமரா குணநாயகம் தெரிவித்தார். அவர் மேலும் தெரிவிக்கையில்:
மனித உரிமை ஆணைக்குழுவின் நவநீதம்பிள்ளை சமர்பித்திருந்த யோசனையில் சர்வதேச விசாரணை ஒன்று அவசியம் என வலியுறுத்தியிருந்தார்.


எனினும் விசாரணையாளர் யார் என்பதை அவர் தனது யோசனையில் முன்வைக்கவில்லை. எனினும் அவரே அந்த விசாரணையாளர். அவரது இந்த செயற்பாடு தந்திரமானது. இது பற்றிய புரிதல் எமக்கில்லை. 2013ம் ஆண்டு செப்டம்பர் மாதம் 05ம் திகதி நடைபெறவுள்ள ஐக்கிய நாடுகள் மனித உரிமை ஆணைக்குழுவின் கூட்டத்தில் அறிக்கையொன்றை சமர்ப்பிக்க உள்ளனர். தமக்கு கட்டுப்பட்ட நாடாக இலங்கை இருக்க வேண்டும் என்பதே மேற்குலக நாடுகளில் தேவையாக இருக்கின்றது எனவும் அவர் தெரிவித்துள்ளார்.

....................................................

இலங்கையின் பிடிவாதம் தளா்ந்தது - ஐ.நாவின் விமானத்திலேயே நவிப்பிள்ளை வடக்கு கிழக்கிற்கு பறப்பார்!

இலங்கை வரும் ஐ.நா மனித உரிமைகள் ஆணையாளர் நவநீதம்பிள்ளையின் பயணத்துக்குத் தேவையான விமானத்தை ஒழுங்கு செய்து கொள்ளுமாறு இலங்கை அரசு ஐ.நா அதிகாரிகளுக்குத் தெரியப்படுத்தியுள்ளது. இந்த விடயத்தில் விடாப்பிடியாக இருந்த இலங்கை அரசு இப்போது தனது நிலைப்பாட்டை மாற்றிக்கொண்டுள்ளதாகத் தெரியவருகிறது. இந்த மாதம் 25ஆம் திகதி கொழும்பு வரும் நவநீதம்பிள்ளை, யாழ்ப்பாணம், திருகோணமலை, முல்லைத்தீவு, கிளிநொச்சி ஆகிய இடங்களுக்குச் சென்று நிலைமைகளை நேரில் பார்வையிடவுள்ளார்.


இந்தப் பயணங்களுக்கு, இலங்கை விமானப் படையினால் நடத்தப்படும், 'ஹெலி ருவர்ஸ்' விமானங்களைப் பயன்படுத்தும்படி, நவநீதம்பிள்ளையின் பயண ஒழுங்குகளைக் கவனிக்க அண்மையில் இலங்கை வந்த ஐ.நா மனித உரிமைகள் ஆணையாளர் பணியகத்தின் தலைமைப் பாதுகாப்பு ஆலோசகர் ஆப்ரஹாம் மதாயிடம், இலங்கை அரசு வலியுறுத்தியிருந்தது.

ஆயினும், இலங்கை விமானப்படை விமானங்களில் பயணம் செய்வதற்கு நவநீதம்பிள்ளையின் பாதுகாப்பு அதிகாரிகள் மறுத்துவிட்டனர்.இதனால் இருதரப்புக்கும் இடையில் இழுபறி நிலை ஏற்பட்டது. இந்தநிலையில், ஐ.நா மனித உரிமைகள் ஆணையாளர் பணியகம் விரும்பியவாறு, தனியார் விமானத்தையோ, அல்லது ஐ.நா விமானத்தையோ நவநீதம்பிள்ளை பயன்படுத்திக் கொள்ளலாம் என்று இலங்கை அரசு இப்போது ஜெனிவாவுக்குத் தெரியப்படுத்தியுள்ளது.

இது குறித்துக் கருத்து வெளியிட்டுள்ள, ஊடகத்துறை அமைச்சர் கெஹலிய ரம்புக்வெல, ஐ.நா மனித உரிமைகள் ஆணையாளர் நவநீதம்பிள்ளைக்கு இலங்கை விமானப்படை விமானங்கள் மீது நம்பிக்கை இல்லையாம். இனிமேல் நாம் என்ன செய்வது? அவர் ஐ.நா விமானத்திலேயே வந்து வடக்கு உள்ளிட்ட தேவையான அனைத்து இடங்களுக்கும் சென்று, எதிர்பார்க்கும் உண்மைகளைக் கண்டறிய அவருக்கு அரசு ஒத்துழைக்கும் என்று தெரிவித்துள்ளார்.