மறு குடியமர்த்தாமல் முகாமில் இன்னும் 80 ஆயிரம் தமிழர்கள்

by **மாலதி** Mon Apr 12, 2010 6:01 am

கொழும்பு
: 'இலங்கையில் உள்ள முகாம்களில் 80 ஆயிரம் தமிழர்கள் தங்கியுள்ளனர்.
இவர்கள், இன்னும் அவர்களது சொந்த ஊர்களில் மறு குடியமர்த்தப்படவில்லை'
என்ற தகவல் வெளியாகியுள்ளது.

இலங்கையில் உள் நாட்டுப் போர் முடிவடைந்து ஒரு
ஆண்டு ஆகப் போகிறது. வவுனியா உள்ளிட்ட இடங்களில் பல்வேறு முகாம்களில்
தங்கியிருந்த தமிழர்களில், ஒரு லட்சத்து 93 ஆயிரத்து 607 பேர், அவர்களது
சொந்த ஊர்களில் மறு குடியமர்த்தப்பட்டுள்ளனர்.மறு குடியமர்த்தும் பணிக்கு
முக்கியத்துவம் அளிப்பதாகவும், அதற்கான வேலைகள் முடுக்கி
விடப்பட்டுள்ளதாகவும் இலங்கை அரசு சார்பில் தொடர்ந்து செய்திகள்
வெளியாகின்றன. இருந்தாலும், வவுனியா, செட்டிகுளம் முகாம்களில் வசிக்கும்
80 ஆயிரத்து 500 தமிழர்கள், இன்னும் அவர்களது சொந்த ஊர்களில் மறு
குடியமர்த்தப்படவில்லை.மறு குடியமர்த்தும் பணி எப்போது முடிவுக்கு வரும்
என்பது குறித்து உறுதியான தகவல் எதுவும் இல்லை. அதே நேரத்தில்,
முகாம்களில் வசிக்கும் 28 ஆயிரம் பேருக்கு, அவர்களது உறவினர்களை சந்தித்து
வருவதற்கான அனுமதி கொடுக்கப்பட்டுள்ளது. இவர்கள் தங்களுக்கு தேவையான
பொருட்களை பெறுவதற்கும், முகாம்களை விட்டு வெளியில் செல்லலாம்.

இதற்கிடையே, விரைவில் சிங்கள, தமிழ்
புத்தாண்டுகள் வரவுள்ளதால், இதையொட்டி, பிரமாண்டமான கலை மற்றும் இசை
நிகழ்ச்சிகளுக்கு, வவுனியா முகாம்களில் ஏற்பாடு செய்யப்பட்டுள்ளதாக ராணுவ
அதிகாரிகள் தெரிவித்துள்ளனர்.

பார்லிமென்டில் பொன்சேகா:இலங்கை
பார்லிமென்ட் தேர்தலில் கொழும்பு தொகுதியில் போட்டியிட்ட ராணுவ முன்னாள்
தளபதி சரத் பொன்சேகா, 98 ஆயிரத்து 458 விருப்ப ஓட்டுகளை பெற்று வெற்றி
பெற்றுள்ளார். அவரையும் சேர்த்து, அவரது கூட்டணியைச் சேர்ந்த ஐந்து பேர்
வெற்றி பெற்றுள்ளனர். இந்த வெற்றியின் மூலம், பொன்சேகா முதல் முறையாக,
பார்லிமென்டுக்குள் அடி எடுத்து வருகிறார். இதுகுறித்து பொன்சேகாவின்
மனைவி அனோமா கூறுகையில், 'பார்லிமென்ட் தேர்தலில் என் கணவர் வெற்றி
பெற்றுள்ளது மகிழ்ச்சி அளிக்கிறது. தற்போது, ராணுவ காவலில் உள்ள அவரிடம்
இதை கூறியபோது, புன்னகைத்தார். கண்டிப்பாக, பார்லிமென்ட் கூட்டத் தொடரில்
அவர் பங்கேற்பார்.