5 ரூபாய்க்கு அரசு மருந்தை வாங்கி 100 ரூபாய்க்கு விற்ற மோசடி கும்பல்

by **மாலதி** Sat Apr 10, 2010 5:25 am

சென்னை
: அரசு மருத்துவமனையில் இருந்து மருந்துகளை திருடி விற்ற பெண்ணிடம் 5
ரூபாய்க்கு வாங்கி , ரூ. 100க்கு விற்ற மோசடி சம்பவம் தற்போது தெரிய
வந்துள்ளது. இதுதொடர்பாக சென்னை அரசு பொது மருத்துவமனை துப்புரவு பெண்
ஊழியரை, சி.பி.சி.ஐ.டி., போலீசார் கைது செய்தனர். அவரது வீட்டில் இருந்து,
மருந்துகளையும் பறிமுதல் செய்துள்ளனர்.

காலாவதி மருந்துகளை, விவரங்களை மாற்றி
மீண்டும் விற்பனைக்கு அனுப்பியது தொடர்பாக மோசடி கும்பல் தலைவன் மீனாட்சி
சுந்தரம் உள்ளிட்டவர்கள் கைது செய்யப்பட்டனர். சென்னை, கொடுங்கையூர்
போலீசார் இது தொடர்பாக போலீஸ் காவலில் எடுத்து விசாரணை நடத்தி வந்தனர்.
இந்நிலையில், இந்த வழக்கு சி.பி.சி.ஐ.டி., போலீசாரிடம் ஒப்படைக்கப்பட்டது.
தற்போது சி.பி.சி.ஐ.டி., போலீசார், காலாவதி வழக்கில் மீனாட்சி சுந்தரம்,
அவரது தம்பி மாணிக்கம், பிரதீப் சோர்டியா, ராஜேஷ் மேத்தா, சஞ்சய்குமார்,
சேகர் மற்றும் மணி செட்டியார் ஆகிய ஏழு பேரையும் கோர்ட் அனுமதி பெற்று
காவலில் எடுத்து விசாரித்து வருகின்றனர். மூன்று நாள் காவல் நேற்றுடன்
முடியும் நிலையில், கடந்த இரண்டு நாட்களாக ஏழு பேரிடமும் போலீசார் தீவிர
விசாரணை மேற்கொண்டனர். இதில், காலாவதி மருந்தை பெற்று அதில் உள்ள
விவரங்களை மாற்றிய சஞ்சய்குமாரிடம் நடத்தப்பட்ட விசாரணையில், தனக்கு
'சீல்'களை தயாரித்தளித்தவர் பற்றிய விவரங்களை கூறியுள்ளார்.

இதனடிப்படையில் நேற்று முன்தினம் இரவு,
சவுகார் பேட்டை, ஜெனரல் முத்தையா முதலி தெருவைச் சேர்ந்த ஜனார்த்தனன்
என்பவரது மகன் சுரேஷ்பாபு (41)வை கைது செய்ததுடன், அவரிடம் இருந்து போலி
சீல்கள் கைப்பற்றப்பட்டன. தொடர்ந்து, திருநின்றவூரைச் சேர்ந்த
மணிச்செட்டியாரிடம் நடத்தப்பட்ட விசாரணையில், அவருக்கு சென்னை அரசு பொது
மருத்துவமனையில் உள்ள பெண் ஊழியர் ஒருவர், அங்கிருந்து மருந்துகளை எடுத்து
வந்து கொடுத்தது மற்றும் அவர் பற்றிய விவரங்களை தெரிவித்தார். அவர்,
அளித்த தகவலின் அடிப்படையில் தலைமறைவாக இருந்த சென்னை அரசு பொது
மருத்துவமனையில் துப்புரவு பணியாளராக இருக்கும், மீஞ்சூர், கனியம்பாக்கம்
பகுதியைச் சேர்ந்த தீபன் என்பவரது மனைவி தனம் (எ) தனலட்சுமி (45)யை கைது
செய்தனர். இவர், அரசு பொது மருத்துவமனையில் இருந்து விலை உயர்ந்த
மருந்துகளை எடுத்து வந்து குறைந்த விலையில் அதாவது ஐந்து ரூபாய்க்கு மணி
செட்டியாரிடம் விற்றுள்ளார். மணி செட்டியார் இந்த மருந்துகளை
சஞ்சய்குமாரிடம் ஏழு ரூபாய்க்கு விற்றுள்ளார். இந்த மருந்துகள் தான்
பின்பு மீனாட்சிசுந்தரம் தரப்பினரால் கடைகளுக்கு 90 முதல் 100 ரூபாய் வரை
விற்பனை செய்யப் பட்டுள்ளது.

சி.பி.சி.ஐ.டி., போலீசார் தனலட்சுமியின்
வீட்டில் நடத்திய சோதனையில் அரசு மருத்துவமனைக்கு வழங்கப்பட்ட மருந்துகள்
இருந்தது கண்டுபிடிக்கப் பட்டு கைப்பற்றப் பட்டன. தனலட்சுமி கடந்த நான்கு
ஆண்டுகளாக இந்த மோசடியில் ஈடுபட்டு வருவது தெரிந்தது. கைது செய்யப்பட்ட
சுரேஷ் பாபு மற்றும் தனலட்சுமி ஆகிய இருவரும் நேற்று எழும்பூர் கோர்ட்டில்
ஆஜர்படுத்தப்பட்டு சிறையில் அடைக்கப்பட்டனர். சி.பி.சி.ஐ.டி., போலீசார்
நேற்று முன்தினம் சஞ்சய்குமாரிடம் தொடர்ந்து நடத்திய விசாரணையில், பல்வேறு
தகவல்கள் கிடைத்தன. தொடர்ந்து சி.பி.சி.ஐ.டி., அதிகாரிகள் சுப்புலட்சுமி,
பார்த்தசாரதி மற்றும் பரணிகுமார் தலைமையிலான தனிப்படையினர், அரும்
பாக்கத்தில் உள்ள சஞ்சய் குமாரின் ஜி.எச்., பார்மா, எழும்பூர், ஆராவமுதன்
தெருவில் உள்ள மருந்து குடோன்களில் சோதனை நடத்தினர். சோதனையில் இரண்டு
கோடி ரூபாய் மதிப்பிலான போலி மற்றும் காலாவதி மருந்துகள்
பதுக்கப்பட்டிருப்பது கண்டுபிடிக்கப்பட்டது. மேலும்,மருந்துகளின் காலாவதி
விவரங்களை மாற்றி பதிவு செய்வதற்கான, 'சீல்'கள், போலி லேபிள்கள், ரப்பர்
ஸ்டாம்ப்கள் மற்றும் அரசு மருத்துவமனையில் சப்ளை செய்யப்படும் மருந்துகள்
கைப்பற்றப்பட்டன.

தொடர்ந்து நேற்றும் இந்த மருந்து குடோன்கள்,
மீனாட்சி சுந்தரத்தின் மருந்து குடோன்களிலும் சி.பி.சி.ஐ.டி., போலீசார்
சோதனை நடத்தி வருகின்றனர். சோதனையின் போது மேலும் பல திடுக்கிடும்
தகவல்கள் கிடைக்கலாம் என கூறப்படுகிறது. காவலில் எடுக்கப் பட்ட ஏழு
பேரிடமும் தொடர் ந்து போலீசார் விசாரணை நடத்தி வருகின்றனர். இதில்,
காஞ்சிபுரத்தில் உள்ள முக்கிய பிரமுகருக்கு காலாவதி மற்றும் போலி மருந்து
விவகாரத்தில் தொடர்பிருப்பது தெரியவந்துள்ளது. எனவே, அந்த பிரமுகர்
விரைவில் கைது செய்யப்படலாம் என்றும் கூறப்படுகிறது.

மருந்து மோசடி கும்பல் மீது முட்டை வீச்சு!
காலாவதி மருந்து மோசடி கும்பலின் தலைவன் மீனாட்சி சுந்தரம், மாணிக்கம்,
பிரதீப் சோர்டியா, சஞ்சய்குமார் உள்ளிட்ட ஏழு பேரை போலீஸ் காவலில் எடுத்து
சி.பி.சி.ஐ.டி., போலீசார் விசாரித்து வந்தனர். போலீஸ் காவல் முடிந்து
நேற்று மாலை 6 மணியளவில் ஏழு பேரும் எழும்பூர் கோர்ட்டிற்கு
கொண்டுவரப்பட்டனர். இரண்டாவது பெருநகர மாஜிஸ்திரேட் முன்பு ஆஜர்படுத்தி
விட்டு புழல் சிறையில் அடைக்க, அனைவரும் கோர்ட்டை விட்டு வெளியில் கொண்டு
வரப்பட்டனர். அப்போது கோர்ட் வளாகத்தின் வெளியில் இருந்தவர்கள் முட்டை,
பேப்பர் கட்டு மற்றும் செருப்பை எடுத்து மீனாட்சி சுந்தரம் உள்ளிட்டோர்
மீது வீசினர். இதனால், கோர்ட் வளாகத்தில் பரபரப்பு ஏற்பட்டது. மீனாட்சி
சுந்தரம், மணிசெட்டியார் மீது இரண்டு முட்டைகள் வீசப்பட்டன. ஒரு முட்டை,
போலீசார் மீதும் விழுந்து உடைந்தது. தொடர்ந்து அனைவரையும் விரைவாக
வாகனத்தில் ஏற்றிக் கொண்டு சென்றனர். கோர்ட் வளாகத்தில் கடந்த முறை
மீனாட்சி சுந்தரம், சேகர் ஆகிய இருவர் மீதும் வக்கீல்கள் தாக்குதல்
நடத்தியது குறிப்பிடத்தக்கது.