இலங்கை பார்லிமென்ட் தேர்தலில் அதிபர் ராஜபக்ஷே அணி வெற்றி

கொழும்பு
: இலங்கையில் நடந்த பார்லிமென்ட் தேர்தலில், அதிபர் ராஜபக்ஷே தலைமையிலான
ஐக்கிய மக்கள் சுதந்திர கூட்டணி பெரும்பாலான இடங்களில் வெற்றி பெற்று,
மீண்டும் ஆட்சியை பிடித்துள்ளது. இலங்கையில் விடுதலைப் புலிகள் முற்றிலும்
தோற்கடிக்கப்பட்டவுடன், கடந்த சில மாதங்களுக்கு முன், அதிபர் தேர்தல்
நடந்தது. ராஜபக்ஷே மீண்டும் வெற்றி பெற்று, அதிபரானார். அவரை எதிர்த்து,
எதிர்க்கட்சி கூட்டணி சார்பில் போட்டியிட்ட இலங்கை ராணுவ முன்னாள் தளபதி
சரத் பொன்சேகா தோல்வி அடைந் தார்.

அதிபர் தேர்தலில் கிடைத்த வெற் றியை தக்க
வைத்துக் கொள்ளும் வகையில், பார்லிமென்ட் தேர்தலையும் நடத்த முடிவு செய்த
அதிபர் ராஜபக்ஷே, அதற்கான தேதியையும் அறிவித்தார். இதன்படி, இலங்கை
பார்லிமென்ட் தேர்தல் நேற்று முன்தினம் நடந்தது. இலங்கை பார்லிமென்ட் 225
உறுப்பினர்களைக் கொண்டது. இதில், 196 உறுப்பினர்கள், தேர்தல் மூலம்
நேரடியாக தேர்வு செய்யப்படுவர். மீதமுள்ள 29 உறுப்பினர்கள், கட்சிகள்
பெற்ற ஓட்டு சதவீதத்தின் அடிப்படையில் நியமனம் செய்யப் படுவர். இந்த
பார்லிமென்ட் தேர்தலில், அதிபர் ராஜபக்ஷே தலைமையிலான ஐக்கிய மக்கள்
சுதந்திர கூட் டணி, முன்னாள் பிரதமர் ரணில் விக்கிரமசிங்கே தலைமையிலான
ஐக்கிய தேசிய கட்சி, ராணுவ முன் னாள் தளபதி பொன்சேகா தலைமையிலான ஜனநாயக
தேசிய கூட்டணி ஆகியவற்றுக்கும் இடையே மும்முனை போட்டி நிலவியது.

ஓட்டுப் பதிவின் போது, பெரிய அளவில்
அசம்பாவிதம் எதுவும் நடக்கவில்லை. இருந்தாலும், 50 சதவீத ஓட்டுகளே
பதிவாயின. இது, கடந்த சில ஆண்டுகளில் நடந்த தேர்தல்களில் பதிவான ஓட்டுகளை
விட, மிகக் குறைந்த சதவீதமாகக் கருதப்படுகிறது. ஓட்டுப் பதிவு முடிந்த
அடுத்து சில மணி நேரங்களிலேயே, ஓட்டு எண்ணும் பணி துவங்கியது. விடிய,
விடிய ஓட்டுகள் எண்ணப்பட்டன. நேற்று அதிகாலை முதல், முடிவுகள் வெளிவரத்
துவங்கின. பெரும்பாலான இடங்களில் அதிபர் ராஜபக்ஷே தலைமையிலான ஐக்கிய
மக்கள் சுதந்திர கூட்டணியே வெற்றி பெற்றுள்ளது. நேற்று மாலை வரை
அறிவிக்கப் பட்ட முடிவுகளின்படி, ராஜபக்ஷே கட்சி 117 இடங்களில் வெற்றி
பெற் றுள்ளதாக அறிவிக்கப்பட்டுள்ளது. ரணில் விக்கிரமசிங்கேயின் ஐக்கிய
தேசிய கட்சிக்கு 46 இடங்கள் கிடைத்ததாக தெரிவிக்கப்பட்டது. தமிழ் தேசிய
கூட்டணிக்கு 12 இடங்களும், சரத் பொன்சேகா தலைமையிலான கூட்டணிக்கு ஐந்து
இடங்களும் கிடைத்துள்ளதாக, இலங்கை தேர்தல் கமிஷன் அதிகாரிகள்
அறிவித்துள்ளனர். இன்னும் சில தொகுதிகளுக்கான முடிவுகள்
அறிவிக்கப்படவில்லை.

ஒட்டு மொத்த அளவில் ராஜபக்ஷே கட்சிக்கு 63
சதவீத ஓட்டுகளும், ரணில் கட்சிக்கு 27 சதவீத ஓட்டுகளும், பொன்சேகா
தலைமையிலான கட்சிக்கு 5 சதவீத ஓட்டுகளும் கிடைத்துள்ளன. அதிபர் ராஜபக்ஷே
கட்சி பெரும்பாலான இடங்களில் வெற்றி பெற்று, மீண்டும் ஆட்சியை
பிடித்தாலும், அந்த கட்சிக்கு மூன்றில் இரண்டு பங்கு பெரும்பான்மை
பெறுவதற்கான வாய்ப்பு குறைவாகவே உள்ளதாக இலங்கை அரசியல் வட்டாரங்கள்
தெரிவிக்கின்றன. இதுகுறித்து இலங்கை போக்குவரத்து அமைச்சர் டல்லஸ்
கூறுகையில், 'மூன்றில் இரண்டு பங்கு பெரும்பான்மை பெறுவதற்கு, 12லிருந்து
13 இடங்கள் குறைவாகக் கிடைக்கும் என எதிர்பார்க்கிறோம். இது ஒரு பிரச்னை
அல்ல' என்றார். இலங்கை தேர்தல் முடிவு குறித்து அமெரிக்கா கூறுகையில்,
'உள் நாட்டு சண்டையால் பாதிக்கப்பட்ட மக்களின் நிவாரணப் பணிகளில் அதிபர்
ராஜபக்ஷே கவனம் செலுத்த வேண்டிய நேரம் வந்துவிட்டது. அந்த மக்களின்
வாழ்க்கையில் நம்பிக்கையை ஏற்படுத்த வேண்டிய வாய்ப்பு, ராஜபக்ஷேவுக்கு
கிடைத்துள்ளது' என தெரிவிக்கப்பட்டுள்ளது.

கிரிக்கெட் வீரர் ஜெயசூர்யா வெற்றி:
இலங்கை பார்லிமென்ட் தேர்தலில், ஆளும் கட்சி சார்பில் போட்டியிட்ட பிரபல
கிரிக்கெட் வீரர் ஜெயசூர்யா வெற்றி பெற்றுள்ளார். இலங்கை பார்லிமென்ட்
தேர்தலில் பதிவான ஓட்டுகள் எண்ணப்பட்டு, முடிவுகள் அறிவிக்கப்பட்டன.
இதில், அதிபர் ராஜபக்ஷேவின் ஐக்கிய மக்கள் சுதந்திர கூட்டணி சார்பில்,
மாத்தறை மாவட்டத்தில் பிரபல கிரிக்கெட் வீரர் ஜெயசூர்யா போட்டியிட்டார்.
ஓட்டு எண்ணிக்கையின் முடிவில், ஜெயசூர்யா வெற்றி பெற்றதாக
அறிவிக்கப்பட்டது. தற்போது, ஐ.பி.எல்., போட்டிகளில் விளையாடுவதற்காக
இந்தியா வந்துள்ள ஜெயசூர்யாவுக்கு, அவரது வெற்றி குறித்த தகவல்
தெரிவிக்கப்பட்டுள்ளது.