இளவரசன் பிரேத பரிசோதனை அறிக்கையில் பரபரப்பு தகவல்கள்

தர்மபுரி, ஜூலை 6-

தர்மபுரியில் காதல் கலப்பு திருமணம் செய்து கொண்ட நத்தம் காலனியை சேர்ந்த வாலிபர் இளவரசன் நேற்று முன்தினம் மதியம் தர்மபுரி அரசு கலைக்கல்லூரி பின்புறம் உள்ள ரெயில்வே தண்டவாளத்தில் மூளைச் சிதறி நிலையில் பிணமாக மீட்கப்பட்டார்.

இளவரசன் ரெயில் முன் பாய்ந்து தற்கொலை செய்து இருக்கலாம் என்று போலீசார் தெரிவித்தனர். ஆனால் அவரது உறவினர்கள், விடுதலை சிறுத்தைகள் கட்சியினர் அவர் கொலை செய்யப்பட்டு இருப்பதாக புகார் தெரிவித்தனர். இதனால் பரபரப்பு நீடித்தது.

இந்நிலையில் நேற்று காலை இளவரசனின் உடல் பிரேத பரிசோதனை செய்யப்பட்டது. 3 பேர் அடங்கிய டாக்டர்கள் குழுவினர் பிரேத பரிசோதனை செய்தனர். அப்போது இளவரசன் தரப்பில் வக்கீல் தமயந்தி, விடுதலை சிறுத்தைகள் கட்சியை சேர்ந்த நந்தன் ஆகியோர் இருந்தனர். மேலும் அவை வீடியோவிலும் பதிவு செய்யப்பட்டது.

இரவு 9.30 மணியளவில் இளவரசனின் பிரேத பரிசோதனை அறிக்கையை தர்மபுரி மாவட்ட போலீஸ் சூப்பிரண்டு அஸ்ராகர்க் வெளியிட்டார். அதில் கூறியிருப்பதாவது:-

இளவரசனின் கைகளில் எலும்பு முறிவு ஏற்பட்டுள்ளது. மேலும் கைகளிலும் அவர் அணிந்திருந்த உடைகளிலும் கிரீஸ் ஆயில் இருந்தது தெரியவந்தது. மேலும் உடலில் ஆங்காங்கே லேசான சிராய்ப்பு காயங்கள் இருப்பதும் தெரியவந்தது. இது மட்டுமில்லாமல் இளவரசனின் தலையில் பலத்த காயம் ஏற்பட்டு மூளை சிதறி உள்ளது. இது தான் அவரது இறப்புக்கு காரணமாக அமைந்துள்ளது என்று பிரேத பரிசோதனை அறிக்கையில் குறிப்பிடப்பட்டுள்ளது.