ஒரே நாளில் தேர்வு : தன்னாட்சி கல்லூரிகள் கலக்கம்

ஒரே
சமயத்தில் அனைத்து பல்கலை மற்றும் கல்லூரிகளில் தேர்வு நடத்தினால்,
மதிப்பீடு செய்வதற்கு ஆசிரியர்கள் இன்றி, ஏராளமான குளறுபடிகள் ஏற்படுமென
தன்னாட்சி கல்லூரி முதல்வர்கள் கருதுகின்றனர்.தமிழகத்தில் 15க்கும்
மேற்பட்ட பல்கலை வாயிலாக 550க்கும் மேற்பட்ட கலை மற்றும் அறிவியல்
கல்லூரிகள் செயல்படுகின்றன. அவற்றில், 10 சதவீதத்துக்கும் அதிகமான
கல்லூரிகள், 'அடானமஸ்' எனும் தன்னாட்சி அந்தஸ்தை பெற்றுள்ளன. அவை, இணைவு
பெற்ற பல்கலை பாடத்திட்டத்தை பின்பற்ற வேண்டிய அவசியம் இல்லை. தேர்வுகளும்
அவர்களாகவே நடத்திக் கொள்ள அனுமதிக்கப்பட்டுள்ளது. அதில் படிக்கும்
மாணவர்களுக்கு, பட்டச் சான்று மட்டுமே பல்கலை மூலம்
வழங்கப்படுகிறது.இதனால், ஒவ்வொரு பல்கலையும், ஒவ்வொரு தேதியில் தேர்வு
துவக்கி, தங்கள் வசதிக்கேற்ப தேர்வு முடிவுகளையும் வெளியிடுகின்றன.

பல்கலை தேர்வு துவங்கும் முன்னரே, தன்னாட்சிக்
கல்லூரிகள் தேர்வை துவக்கி, அனைத்துக்கும் முன்பாக தேர்வு முடிவுகளையும்
வெளியிடுகின்றன.கல்லூரி துவங்கும் நாள், விடுமுறை நாள் என, ஒவ்வொன்றிலும்,
ஒவ்வொரு பல்கலைக்கும் வித்தியாசம் காணப்படுகிறது. இவற்றை ஒருங்கிணைக்கும்
முயற்சியில் இரு ஆண்டுகளாக தமிழக அரசு ஈடுபட்டுள்ளது.முதல் முயற்சியாக,
அனைத்து பல்கலைகளும் ஒரே மாதிரியான பாடத்திட்டம் அமைக்க நடவடிக்கை
எடுக்கப்பட்டது. ஆனால், அதில் வரும் பிரச்னைகள் குறித்து எதிர்ப்பு
கிளம்பவே, அவை கைவிடப்பட்டது.

கடந்த வாரம் நடந்த துணைவேந்தர்கள் மற்றும்
தேர்வாணையர் கூட்டத்தில், அனைத்து பல்கலை மற்றும் இணைவு கல்லூரிகளில்
தேர்வு துவக்குவது, தேர்வு முடிவு வெளியிடுவது, வகுப்புகள் துவக்குவது
உள்ளிட்ட செயல்பாடுகள், ஒரே நாளில் அமையும்படி மாற்ற ஆலோசனை
நடத்தப்பட்டது.வரும் கல்வியாண்டில் இந்த மாற்றம் செயல்படுத்தப்படலாம் என
எதிர்பார்ப்பு எழுந்துள்ளது. தன்னாட்சிக் கல்லூரி முதல்வர் ஒருவர்
கூறியதாவது:பொதுவாக பல்கலை தேர்வு துவங்கும் முன்னரே, தன்னாட்சிக்
கல்லூரிகளில் தேர்வு முடித்து விடுவது வழக்கம். அதேபோல், பல்கலை
விடைத்தாள் மதிப்பீட்டுக்கு முன்பே தன்னாட்சிக் கல்லூரிகளில் விடைத்தாள்
மதிப்பீடும் செய்யப்பட்டு விடும்.இக்கல்லூரிகளில் மதிப்பீடு செய்யப்படும்
போது, கல்லூரிகளில் உள்ள 50 சதவீத ஆசிரியர்களும், வேறு கல்லூரிகளில்
இருந்து 50 சதவீத ஆசிரியர்களும் கலந்து கொள்வர். பல்கலை மதிப்பீடு
செய்யும் பணி துவங்கும் போது, கல்லூரி பணிகள் முடிவடைந்து விடுவதால்,
மதிப்பீடு செய்யும் ஆசிரியர்கள் பல்கலைக்கு செல்ல வசதியாக
இருக்கும்.பல்கலைகள் பலவற்றில், தேர்வு முடிவு வெளியாக தாமதம் ஏற்படக்
காரணமே, விடைத்தாள் மதிப்பீடு செய்ய, போதிய ஆசிரியர்கள் கிடைக்காததே.
சுயநிதி கல்லூரிகளில் ஆசிரியர்களை கல்லூரி நிர்வாகம், மதிப்பீடு செய்ய
சரியாக அனுப்பி வைப்பதில்லை.

அரசு கல்லூரிகளிலோ, ஏராளமான ஆசிரியர்
பணியிடங்கள் காலியாக உள்ளன.ஒரே சமயத்தில் அனைத்து பல்கலை மற்றும்
கல்லூரிகளில் தேர்வு நடத்தினால், மதிப்பீடு செய்வதற்கு ஆசிரியர்கள் இன்றி,
ஏராளமான குளறுபடிகள் ஏற்படும். ஒரே சமயத்திலும் தேர்வு முடிவுகளை வெளியிட
முடியாது. காரணம், மதிப்பீடு செய்யும் பணிக்கு ஆசிரியர்களை
கட்டாயப்படுத்துவதில்லை. அதிக டி.ஏ., கிடைக்கும் இடத்துக்கு மதிப்பீடு
செய்ய போய் விடுகின்றனர். உதாரணமாக, திருச்சியில் இருக்கும் ஒரு ஆசிரியர்,
திருச்சி பல்கலைக்கு மதிப்பீடு செய்ய சென்றால், 180 ரூபாய் டி.ஏ.,
கிடைக்கும்; ஆனால், அதே ஆசிரியர் சென்னை அல்லது சேலம் பல்கலைகளுக்கு
சென்றால் 1,500 ரூபாய் வரை கிடைக்கும்.அதே போல், தன்னாட்சிக்
கல்லூரிகளிலும் மதிப்பீடு செய்ய ஆசிரியர்கள் ஆர்வம் காட்டுவர்.

இப்போதிருக்கும் நிலையில், தமிழகம் முழுவதும்
ஒரே நாளில் தேர்வு முடிவை வெளியிடுவது சாத்தியமற்றது.மதிப்பீடு செய்யும்
பணியை கட்டாயப்படுத்துவது, காலியான ஆசிரியர் பணியிடங்களை நிரப்புவது
உள்ளிட்டவற்றை செய்து முடித்த பின், முயற்சி செய்தாலாவது ஓரளவு வெற்றி
கிடைக்கும். இவ்வாறு அவர் கூறினார்.-நமது சிறப்பு நிருபர்-