3 ஆண்டுகளில் காங்கிரசுக்கு ரூ.500 கோடி வருவாய்: எதிர்க்கட்சியான பா.ஜ.,வும் ரூ.425 கோடி திரட்டியுள்ளது

புதுடில்லி: கடந்த, 2009 முதல், 2011 வரையிலான, மூன்று
ஆண்டுகளில், நன்கொடைகள் மற்றும் டெபாசிட்களுக்கு வட்டி என, காங்கிரஸ்
கட்சி, 750 கோடி ரூபாய் வருவாய் பெற்றுள்ளது. அதேநேரத்தில்,
எதிர்க்கட்சியான, பா.ஜ.,வுக்கு 425 கோடி ரூபாய் வருமானம் கிடைத்துள்ளது.




எதிர்ப்பு:


"தகவல் அறியும் உரிமைச் சட்டம், அரசியல் கட்சிகளுக்கும் பொருந்தும்.
அதனால், கட்சிகளின் செலவுகள் மற்றும் வருமானம் குறித்து, பொதுமக்கள்
கேட்கும் தகவல்களை தர வேண்டும். இதற்கான சிறப்பு ஏற்பாடுகளை, கட்சிகள்
செய்ய வேண்டும்' என, சமீபத்தில், மத்திய தகவல் ஆணையம் உத்தரவிட்டது. இந்த
உத்தரவுக்கு, அரசியல் கட்சிகள் பலவும், கடும் எதிர்ப்புத் தெரிவித்துள்ளன.
இந்நிலையில், அரசியல் கட்சிகள் பல, ஏராளமான பணத்தை நன்கொடையாக
பெற்றுள்ளதும், ஆனால், அந்த நன்கொடை பணத்தை வழங்கியவர்கள் யார் யார் என்ற
விவரத்தை, வருமான வரித்துறைக்கு, முழுமையாக தெரிவிக்காததும், தற்போது
அம்பலமாகிஉள்ளது.
இதுதொடர்பாக, தகவல் உரிமை சட்டத்தின் கீழ்
பெறப்பட்டுள்ள விவரங்கள்: கடந்த, 2009 முதல், 2011 வரையிலான, மூன்று
ஆண்டுகளில், காங்கிரஸ், 750 கோடி ரூபாய் வருவாய் திரட்டியுள்ளது. இதில்,
112 கோடி ரூபாயை நன்கொடையாகப் பெற்றுள்ளது; 500 கோடி ரூபாயை, கட்சி
கூப்பன்கள் விற்பனை மூலம் திரட்டியுள்ளது. இதுதவிர, கட்சி சார்பில்
வங்கிகளில் செய்யப்பட்டுள்ள டெபாசிட்களுக்கு வட்டியாக, 44 கோடி ரூபாய்
பெற்றுள்ளது.


பெறவில்லை:

காங்கிரசுக்கு
நன்கொடை வழங்கியவர்களில், 12 சதவீதம் பேர், 20 ஆயிரம் ரூபாய்க்கு மேல்
வழங்கியுள்ளனர். இவர்களில், 80 முதல், 90 சதவீதம் பேரின் பெயர் விவரங்கள்,
வருமான வரித்துறைக்கு தெரிவிக்கப்படவில்லை. எதிர்க்கட்சியான, பா.ஜ., வோ,
இந்த மூன்று ஆண்டுகளில், தன்னார்வலர்கள் வழங்கிய நன்கொடைகள், 300 கோடி
ரூபாய் உட்பட, மொத்தம், 425 கோடி ரூபாய் வருவாய் திரட்டியுள்ளது. இந்தக்
கட்சிக்கு, 20 ஆயிரம் ரூபாய்க்கு மேல், நன்கொடை வழங்கியவர்கள், 22 சதவீதம்
பேர். அதே நேரத்தில், அ.தி.மு.க., சிரோன்மணி அகாலிதளம் மற்றும் பகுஜன்
சமாஜ் கட்சிகள், 20 ஆயிரம் ரூபாய்க்கு மேல், எந்த ஒரு தனி நபரிடம் இருந்து,
நன்கொடை பெறவில்லை.