ரூ.1.9 கோடியை திருப்பி கொடுத்த ஆட்டோ டிரைவர்

ஆமதாபாத்: தனக்கு சொந்தமில்லாத
நிலத்திற்கு அளிக்கப்பட்ட ரூ.1.9 கோடி பணத்தை, வழங்கியவர்களிடமே திருப்பி
கொடுத்திருக்கிறார் குஜராத் ஆட்டோ டிரைவர் ஒருவர்.


குஜராத் மாநிலம், சனாந்த் பகுதியில், டாடா நிறுவனம்
தொழிற்சாலை அமைப்பதற்காக, நிலம் கையகப்படுத்தும் பணியை, குஜராத் தொழில்
வளர்ச்சி கழகம் செய்து வருகிறது. அதன்படி கையகப்படுத்தபடும் ஒவ்வொரு 'பிகா'
(நில அளவை) நிலத்திற்கு குறிப்பிட்ட தொகையை டாடா நிறுவனம் வழங்கி
வருகிறது.

இந்நிலையில், இப்பகுதியைச் சேர்ந்த ஆட்டோ டிரைவர் ராஜூ பர்வாத்துக்கும்
ரூ.1.9 கோடிக்கான செக்கை டாடா நிறுவனம் அனுப்பி வைத்திருந்தது. ஆனால், அந்த
இடம் தனக்கு சொந்தமானது இல்லை எனக்கூறி பணத்தை திரும்ப
ஒப்படைத்திருக்கிறார் ராஜூ.


"எனது பெற்றோர் எனக்கு கற்பித்த சில விஷயங்களில் நேர்மையும் ஒன்று. எனது
முன்னோர்களே அந்த இடத்தை வேறு ஒருவருக்கு விற்று விட்டனர். தற்போது எனக்கு 4
பிகா நிலங்கள் உள்ளன. அது எனக்கும் எனது குடும்பத்தாரின் எதிர்கால
வாழ்விற்கும் போதும். இந்த பணம் எனக்கு தேவையில்லை" என்கிறார் ராஜூ.

ராஜூவின் இந்த செயல் அதிகாரிகளை திகைப்படைய செய்துள்ளது. 'தங்களது வாழ்வில்
இவ்வளவு பெரிய தொகை திரும்ப வந்துள்ளது இதுவே முதல் முறை' என்றும் அவர்கள்
தெரிவித்துள்ளனர்.

ரூ.6 ஆயிரம் சம்பளத்தில் ஆட்டோ டிரைவர் வேலை செய்து வாழ்க்கையை நடத்தும்
ராஜூவைப் பார்க்கும்போது, பொன்னுக்கும், பொருளுக்கும் ஆசைப்படாத
'மனிதர்கள்' இன்னும் இருக்கவே செய்கிறார்கள் என்றே எண்ண தோன்றுகிறது