நான்கு இந்திய போர்க்கப்பல்கள் மலேசியா துறைமுகத்தில்! வருவது வில்லங்க கடல் பாதை!!

மலேசிய கடற்படையுடனான உறவைப் பலப்படுத்தும் வகையில், கூட்டுப் பயிற்சியை
மேற்கொள்ள 4 இந்திய போர்க்கப்பல்கள் போர்ட்கிளாங் துறைமுகத்துக்கு வந்து
நங்கூரமிட்டுள்ளன.

இந்திய கடற்படையில் புதிதாக இணைக்கப்பட்ட ஐஎன்எஸ் சத்புரா, ஐஎன்எஸ்
ரன்விஜய், ஐஎன்எஸ் கிர்ச் மற்றும் ஐஎன்எஸ் சக்தி ஆகிய 4 போர்க்கப்பல்கள் 5
நாட்களுக்கு மலேசிய கடற்படையுடன் இணைந்து பயிற்சி மேற்கொள்ளும்.

ரியர் அட்மிரல் அஜித் குமார் தலைமையிலான 800 கடற்படை வீரர்கள் இந்தப்
பயிற்சியில் பங்கேற்கின்றனர். இந்த நான்கு கப்பல்களும் தென் சீன மற்றும்
மேற்கு பசிபிக் கடல் பகுதிகளில் பணியில் ஈடுபடுத்தப்பட்டுள்ளன என்று
தெரிவிக்கப்பட்டுள்ளது.

ரியர் அட்மிரல் அஜித் குமார் போர்ட்கிளாங் நகரில் நேற்று
(ஞாயிற்றுக்கிழமை) செய்தியாளர்களிடம் பேசியபோது, “மலேசிய ராணுவத்துடனான
உறவைப் பலப்படுத்த விரும்புகிறோம். இந்த பிராந்தியத்தில் அமைதியையும்,
பாதுகாப்பையும் நிலைநாட்டுவதற்கு இந்த பயிற்சிகள் பெரிதும் உதவும்”
என்றார்.

மலேசிய சுற்றுப் பயணம் முடிந்த பிறகு போர்க் கப்பல்கள் வியட்நாம்
மற்றும் பிலிப்பின்ஸ் ஆகிய நாடுகளுக்குச் செல்லும் என இந்திய கடற்படை
தெரிவித்துள்ளது.

மலேசிய, இந்திய கடற்படைகள் பயிற்சியில் ஈடுபட்டபின், இந்தியக் கப்பல்கள்
தொடர்ந்து செல்லவுள்ள இந்த தென் சீன கடல்பகுதி, கொஞ்சம் வில்லங்கமான இடம்.

தென்சீன கடல் பகுதியில் எண்ணெய் மற்றும் இயற்கை எரிவாயு உற்பத்தி
செய்வது தொடர்பாக ONGC (Oil and Natural Gas Corp)நிறுவனத்துக்கும்
வியட்நாம் நாட்டுக்கும் இடையே கடந்த ஆண்டு அக்டோபரில் ஒப்பந்தம் ஏற்பட்டது.
இதற்கு சீனா எதிர்ப்பு தெரிவித்தது. அந்த கடல்பகுதி முழுவதும் தமது
கட்டுப்பாட்டுக்குள் எப்போதும் இருக்க வேண்டும் என்பது சீனாவின்
நிலைப்பாடு.

அந்தக் கடல்பகுதியில்தான் இந்தியக் கப்பல்கள், மலேசிய கடற்படையுடன் இணைந்து பயிற்சி முடிந்தபின் செல்லவுள்ளன.

முன்பு என்றால், இது ஒன்றும் பெரிய விஷயம் கிடையாது. ஆனால், சீன ராணுவம்
இந்திய எல்லைக்குள் ஊடுருவி அட்டகாசம் செய்திருந்த நிலையில், இந்திய
கப்பல்கள் நான்கு தென்சீன கடல் பகுதியில் நடமாடுவது, கொஞ்சம் கவனிக்கப்பட
வேண்டிய விஷயம்