தமிழக பாஜகவில் அதிருப்தி

சென்னை,
மார்ச் 31: பாஜக தேசிய நிர்வாகிகள் பட்டியலில் தமிழகத்தைச் சேர்ந்த யாரும்
இடம் பெறாததால் தமிழக பாஜக நிர்வாகிகள் கடும் அதிருப்தி அடைந்துள்ளனர்.
கடந்த
மார்ச் 16}ம் தேதி பாஜக தேசிய நிர்வாகிகள், தேசிய செயற்குழு உறுப்பினர்கள்
மற்றும் நாடாளுமன்றக் கட்சி நிர்வாகிகளை கட்சியின் தலைவர் நிதின் கட்கரி
அறிவித்தார்.
இளைஞர்கள், பெண்கள், களப்பணியாளர்கள் மற்றும் மக்களிடம்
செல்வாக்கு மிக்கவர்களுக்கு அதிக வாய்ப்பு என்ற அடிப்படையில் நிர்வாகிகள்
நியமனம் செய்யப்பட்டிருப்பதாக நிதின் கட்கரி கூறியிருந்தார்.
அகில
இந்திய அளவில் 11 துணைத் தலைவர்கள், 11 பொதுச் செயலாளர்கள், 15
செயலாளர்கள், 6 செய்தித் தொடர்பாளர்கள், ஒரு பொருளாளர் நியமனம்
செய்யப்பட்டனர்.
இவர்களில் தமிழகத்தைச் சேர்ந்த யாரும் இடம்பெறவில்லை.
இதுவரை தமிழகத்தைச் சேர்ந்த யாராவது ஒருவருக்கு வாய்ப்பு அளிக்கப்பட்டு
வந்தது. ஜனா. கிருஷ்ணமூர்த்தி, இல. கணேசன், லலிதா குமாரமங்கலம், சுகுமாரன்
நம்பியார், திருநாவுக்கரசர் என்று பலர் அகில இந்திய அளவில் பொறுப்பு
வகித்துள்ளனர்.
ஆனால் இப்போது தமிழகம் முற்றிலும் புறக்கணிக்கப்பட்டிருப்பது பாஜக நிர்வாகிகளிடம் கடும் அதிருப்தியை ஏற்படுத்தியுள்ளது.
அடுத்த
ஆண்டு சட்டப்பேரவைத் தேர்தல் நடைபெறவுள்ள நிலையில் தமிழகம் முற்றிலும்
புறக்கணிக்கப்பட்டுள்ளது, தமிழகத்தில் பலவீனமாக உள்ள கட்சியை மேலும்
பலவீனப்படுத்தும் என்பது பெரும்பாலான நிர்வாகிகளின் கருத்தாக உள்ளது.
இல.
கணேசனுக்கு பதவி இல்லை: ஆர்.எஸ்.எஸ்.ஸில் 30 ஆண்டுகள் முழுநேர
ஊழியராகவும், பாஜகவுக்காக 20 ஆண்டுகள் உழைத்தவருமான இல. கணேசன் வயது
மற்றும் உடல் நலத்தை காரணம் காட்டி முற்றிலும் ஒரங்கட்டப்பட்டுள்ளார்.
மாநிலத்
தலைவர், அகில இந்திய துணைத் தலைவர், செயலாளர், ஆந்திரம், கேரளம் ஆகிய
மாநிலங்களின் பொறுப்பாளர் போன்ற முக்கிய பொறுப்புகளில் இருந்த அவர், தேசிய
செயற்குழு நிரந்த அழைப்பாளராக நியமிக்கப்பட்டுள்ளார். ஆண்டுக்கு ஒரு
முறையோ, இரண்டு முறையோ தேசிய செயற்குழு கூடும் போது அதில் பங்கேற்கலாம்
என்பதைத் தவிர இதனால் எவ்வித பலனும் இல்லை.
அதுபோல, தேசிய செயற்குழு
உறுப்பினராக இருந்த முன்னாள் மாநிலத் தலைவர் சி.பி. ராதாகிருஷ்ணனுக்கு
எந்தப் பொறுப்பும் அளிக்கப்படவில்லை. இது கோவை, ஈரோடு உள்ளிட்ட கொங்கு
மண்டலத்தில் உள்ள கட்சி நிர்வாகிகளை அதிருப்தி அடையச் செய்துள்ளது.
மாநில துணைத் தலைவராக உள்ள எச். ராஜா, லலிதா குமாரமங்கலம் ஆகியோர் தேசிய செயற்குழு உறுப்பினர்களாக நியமனம் செய்யப்பட்டுள்ளனர்.
தமிழகத்தை
பூர்விகமாகக் கொண்ட நிர்மலா சீதாராமன் ஆந்திர மாநில பாஜகவின்
பரிந்துரையின் பேரில் தேசிய செய்தித் தொடர்பாளராக நியமிக்கப்பட்டுள்ளார்.
÷அதுபோல யாரையும் தமிழக பாஜக பரிந்துரைக்கவில்லை என்கிற குற்றச்சாட்டு
எழுந்துள்ளது.
""கட்சி வளர்ச்சியில் அக்கறை காட்டாமல் தங்களைவிட யாரும்
வளர்ந்துவிடக் கூடாது என்பதிலேயே சிலர் அக்கறை காட்டிவருவதாக'' இப்போது
மாநில நிர்வாகியாக இருக்கும் ஒருவர் வேதனை தெரிவித்தார்.
கட்சியில்
பெண்களுக்கு 33 சதவீத ஒதுக்கீடு அளிக்கப்பட்டுள்ள நிலையில், டாக்டர்
தொழிலை விட்டுவிட்டு பாஜகவுக்கு வந்த தமிழிசை சௌந்திரராஜனுக்கு முக்கிய
பொறுப்பு அளிக்கப்படாதது கட்சித் தொண்டர்களிடம் அதிருப்தியை
உண்டாக்கியுள்ளது.
இந்நிலையில் ஏப்ரல் 10, 11-ல் சென்னை வரும் கட்சித்
தலைவர் நிதின் கட்கரியிடம் இது குறித்து முறையிட பாஜக நிர்வாகிகள் பலர்
முடிவு செய்துள்ளனர்.
""கட்சி மேலிடம் எங்கள் உணர்வுகளுக்கு
மதிப்பளிக்காவிடில் பாஜகவில் தொடர்ந்து நீடிப்பதில் எந்த அர்த்தமும்
இல்லை'' என்று முக்கிய நிர்வாகி ஒருவர் தெரிவித்தார்.
இதனால் நிதின் கட்கரி வரும்போது பிரச்னை வெடிக்கும் சூழ்நிலை ஏற்பட்டுள்ளது