நாகராஜசோழன் எம்ஏ எம்.எல்.ஏ ‘அமாவாசை’யை மிஞ்சவில்லை!:- கோடங்கி விமர்சனம்

by **mmani** Sat May 11, 2013 2:45 pm

கட்சித் தலைவர் பதவியையும், முதல்வர் பதவியையும் குறுக்கு வழியில்
பிடித்திருக்கும் பெண் பித்தன் ஒருவன்.அவனது தில்லு முல்லுகளை சிபிஐயிடம்
கொடுத்து முதல்வர் பதவியில் இருந்து இறக்கி, ஜெயிலுக்கு அனுப்பிய
‘செட்டப்’ அதாங்க சேத்துக்கிட்ட பெண்..!அப்படி ஜெயிலுக்கு போன அப்பாவை
காப்பாற்ற முயற்சிக்காமல் உடனடியா கட்சித் தலைவர் பதவியையும்… முதல்வர்
பதவியையும் ‘எதற்குமே உதவாதவன்னு’ பேர் வாங்கிய மகனே கைப்பற்றும் கதைதான்
‘நாகராஜசோழன் எம்ஏ எம்எல்ஏ’ படம்.!

இந்த கதை யாரையோ சொல்ற மாதிரி இருக்குன்னு சிலபேர்… அட அவரத்தான்
சொல்லியிருக்காங்கன்னு சிலபேர்… சே… சே… இது அவரோட செட்டப் சொல்லி வெளிய
வந்த கதைன்னு சிலபேர்… படம் இடைவேளை விட்டதுமே ஆளாளுக்கு ஒரு கருத்தை
சொல்லிகிட்டிருந்ததாதான் நான் சொல்லியிருக்கேன்…

ரொம்ப நாளைக்கு பிறகு இயக்குனர் மணிவண்ணன் தனது இயக்கத்தில் சத்யராஜூடன்
கூட்டணி போட்டிருந்ததால் படத்துக்கு பெரும் எதிர்பார்ப்பு
ஏற்பட்டிருந்தது.

முதல் படத்தில் ‘அமாவாசை’ கேரக்டரில் நடித்திருந்த சத்யராஜ் இந்த படத்தில்
முந்தைய ‘அமாவாசை’ கேரக்டரை முந்த முடியாமல் ரொம்பவே திக்கித்
திணறியிருக்கிறார்… மற்றபடி வழக்கமான அவரது நையாண்டி, நக்கல்
பேச்சுக்களுக்கு ஒரு குறையும் இல்லை… சில இடங்களில் ஓவராக பேசுவதும் ஒரு
குறையாக சிலருக்கு தெரியலாம்…

அரசியல் படமாக இருப்பதால் அரசியல் கிண்டல்களுக்கு படத்தில் பஞ்சமில்லை.
சில இடங்களில் இப்போதைய அரசியலையும் ‘நறுக்’கியிருக்கிறார் இயக்குனர்
மணிவண்ணன்.

17 எம்எல்ஏக்களுடன் கட்சி நடத்தி எதிர்க்கட்சித்தலைவராக இருக்கிற
எம்எஸ் பாஸ்கரை ‘கூத்தபெருமாள்’ ஆக்கி கட்சிய கலைச்சிட்டு ஆளுங்கட்சியில
சேர்ந்துட்டா கல்வி அமைச்சர் பதவி தர்றேன்னு ‘ஆசை’ காட்டும்
காட்சியாகட்டும்… ‘நாக்கை துறுத்திகிட்டு சட்டசபையில ஏன் பேசுனேன்னு’
கேட்க… தியேட்டர்ல படம் பார்க்கிற எல்லாரும் ‘யாரை’யோ மனசுல நினைச்சிகிட்டு
திடீர்னு குபீர் சிரிப்பை வரவழைப்பது புதுசு.

குடும்ப அரசியல்ல என்ன நடக்கும் அப்பனுக்கும் மகனுக்குமே பதவிச் சண்டை
நடக்குறது… மனைவியைவிட ‘சேத்துகிட்ட’வளுக்குத்தான் மவுசு அதிகம்னு காட்டுற
விஷயமாகட்டும் ‘யாரை’யோ குறிப்பிட்டு சொல்லாம தாக்கியிருக்கிற மாதிரி
ரசிகர்களை பேச வைக்கும்… அந்த விஷயத்துல இயக்குனர் மணிவண்ணன் தனி ரகம்…

போலீஸ் கேரக்டரில் வரும் சத்யராஜ் ரோல் பெருசாக எடுபடவில்லை. இயக்குனர் மணிவண்ணனை விட நடிகர் மணிவண்ணன் வழக்கம்போல மிஞ்சிவிடுகிறார்.

அரசியல் நக்கல் படத்தில் சீமான் நடிக்கும் சில காட்சிகள் தேவையில்லாமல்
திணித்திருக்கிறார்கள் போல…. அவரின் வீராவேச பேச்சுக்கள்… பாலியல்
துன்புறுத்தலுக்கு ஆளான மலைவாசி பெண்களையும், ஆண்களையும் ஆட்சியாளர்களுக்கு
எதிராக திருப்பும் காட்சிகள் எல்லாம் நாடகத்தனம்…இதை இயக்குனர்
தவிர்த்திருக்கலாம்.

இயற்கை வளமான காடுகளை அழிக்காதீர்கள் என்ற அருமையான செய்தியை சொல்ல முயற்சித்திருக்கிறார் இயக்குனர் மணிவண்ணன்.

ரொம்ப நாளைக்கு பிறகு மணிவண்ணன் மகன் ரகுவண்ணன் இந்த படத்தில் நடித்திருக்கிறார்.

ஜேம்ஸ்வசந்தன் இசையில் பாடல்கள் எதுவும் மனசில் நிற்கவில்லை.
இருந்தபோதும் பின்னணி இசை படத்துக்கு பெரும் பலம். சங்கரின் ஒளிப்பதிவு
பசுமையாக இருக்கிறது.

மொத்தத்தில் நாகராஜசோழன் எம்ஏ எம்எல்ஏ ‘அமாவாசை’யை மிஞ்சவில்லை என்பதுதான் உண்மை..!