மும்பையிடம் பெங்களூரு சரண்டர்

[You must be registered and logged in to see this image.]











மும்பை: டுவைன் ஸ்மித் "ஆல்-ரவுண்டராக' அசத்த, மும்பை அணி 58 ரன்கள்
வித்தியாசத்தில் சுலப வெற்றி பெற்றது. பவுலிங், பேட்டிங்கில் சொதப்பிய
பெங்களூரு அணி ஏமாற்றம் அளித்தது.

மும்பையில் நேற்று நடந்த பிரிமியர் கிரிக்கெட் தொடரின் லீக் போட்டியில்
பெங்களூரு, மும்பை அணிகள் மோதின. "டாஸ்' வென்ற மும்பை அணி கேப்டன் ரோகித்
சர்மா, "பேட்டிங்' தேர்வு செய்தார்.

நல்ல துவக்கம்:

மும்பை அணிக்கு டுவைன் ஸ்மித், சச்சின் சேர்ந்து வலுவான துவக்கம்
தந்தனர். ராம்பால் ஓவரில் "ஹாட்ரிக்' பவுண்டரி விளாசிய சச்சின்,
ஆர்.பி.சிங் பந்தில் 23 ரன்களுக்கு அவுட்டானார். வினய் குமார்
பந்துவீச்சில் ஸ்மித் இரண்டு பவுண்டரி அடித்தார். மறுமுனையில் தினேஷ்
கார்த்திக், ஒன்றிரண்டு ரன்களாக சேர்த்தார். தனது அதிரடியை தொடர்ந்த
ஸ்மித்(50), அரைசதம் எட்டிய நிலையில் அவுட்டானார். ரோகித் சர்மாவும் (10)
"ரன்-அவுட்டாக' மும்பை அணிக்கு சிக்கலானது.

பின் போலார்டின் அசத்தல் ஆட்டத்தால் மீண்டது. இவர் முகமது ஓவரில்,
இரண்டு இமாலய சிக்சர் விளாசினார். தன் பங்கிற்கு தினேஷ் கார்த்திக், வினய்
குமார் பந்தை பவுண்டரிக்கு விரட்டினார். மீண்டும் தனது ஆதிக்கத்தை துவங்கிய
போலார்டு, ஆர்.பி.சிங் பந்துவீச்சில் ஒரு சிக்சர், இரண்டு பவுண்டரி
அடித்தார்.

"ஹாட்ரிக்' விக்கெட்:

இந்த நேரத்தில் வினய் குமார் வீசிய போட்டியின் 18வது ஓவரில் தொடர்ந்து
மூன்று விக்கெட்டுகள் சரிந்தன. கோஹ்லியின் துல்லிய "த்ரோவில்' முதலில்
தினேஷ் கார்த்திக் (42) ரன் அவுட்டானார். தொடர்ந்து அம்பதி ராயுடுவும் (0)
கோஹ்லி "த்ரோவில்' ரன் அவுட்டானார். அடுத்த பந்தில் போலார்டு (34)
அவுட்டாக, பெங்களூரு அணி "ஹாட்ரிக்' விக்கெட் கைப்பற்றியது. ஹர்பஜன் 16
ரன்கள் எடுத்தார். மும்பை அணி 20 ஓவரில் 7 விக்கெட்டுக்கு 194 ரன்கள்
குவித்தது. ஜான்சன்(9) அவுட்டாகாமல் இருந்தார்.

கெய்ல் ஏமாற்றம்:

கடின இலக்கை விரட்டிய பெங்களூரு அணியின் "டாப்-ஆர்டர்' பேட்ஸ்மேன்கள்
சொதப்பினர். தவால் குல்கர்னி பந்தில் தில்ஷன்(13) வெளியேறினார். கடந்த
போட்டியில் அதிவேக சதம் அடித்த கெய்ல் இம்முறை நீடிக்கவில்லை. இவர்,
ஹர்பஜன் பந்தை தூக்கி அடிக்க...எல்லைக் கோடு அருகே அம்பதி ராயுடு துடிப்பாக
பிடிக்க, 18 ரன்களில் நடையை கட்டினார்.

குல்கர்னி மிரட்டல்:

குல்கர்னியின் அடுத்த ஓவரில் இரட்டை "அடி' விழுந்தது. 2வது பந்தில்
கேப்டன் கோஹ்லி(1) அவுட்டாக, பெங்களூரு அணியின் நம்பிக்கை தகர்ந்தது. 4வது
பந்தில் டிவிலியர்ஸ்(2) வீழ்ந்தார். இதையடுத்து 4 விக்கெட்டுக்கு 43 ரன்கள்
எடுத்து தத்தளித்தது.

தொடர்ந்து வந்தவர்களும் சோபிக்க தவறினர். ஹர்பஜன் "சுழலில்' அருண்
கார்த்திக்(12) சிக்கினார். டுவைன் ஸ்மித் ஓவரில் சவுரப் திவாரி(21), சயத்
முகமது(9) வெளியேறினர். பெங்களூரு அணி 20 ஓவரில் 7 விக்கெட்டுக்கு 136
ரன்கள் மட்டும் எடுத்து தோல்வி அடைந்தது. ராம்பால்(23), வினய் குமார்(26)
அவுட்டாகாமல் இருந்தனர்.

ஆட்ட நாயகன் விருதை டுவைன் ஸ்மித் வென்றார்.

ஹர்பஜன் "கங்னம்'

நேற்று கெய்ல் விக்கெட்டை கைப்பற்றியதும், அவரைப் போலவே "கங்னம்' பாடல்
"ஸ்டைலில்' ஆடி சரியான பதிலடி கொடுத்தார் மும்பை அணியின் ஹர்பஜன். இந்த
ஆட்டத்தில் பஞ்சாப் பங்ராவும் கலந்து இருந்ததால், பார்ப்பதற்கு மிகவும்
வேடிக்கையாக இருந்தது.