தமிழகத்தின் முதல் பெண் மரைன் இன்ஜினீயர் லட்சுமிபிரியா

[You must be registered and logged in to see this image.]

தமிழகத்தின் முதல் பெண் மரைன் இன்ஜினீயர் லட்சுமிபிரியா ‘ஒரு லட்ச ரூபாய்
தருகிறேன். மூன்று மாதங்கள் கடலுக்குள்ளேயே இரு’ என்று சொன்னால்
ஒப்புக்கொள்வீர்களா? நீங்கள் மட்டுமல்ல...
யாருமே ‘சரி’ என்று சொல்ல மாட்டார்கள். கரையிலிருந்து பார்க்கிறவர்களுக்கு
கடல் அதிசயம், அற்புதம், அழகு. அதிலேயே வாழவேண்டிய நிர்பந்தம்
உள்ளவர்களுக்கோ அது அபாயம், சித்திரவதை. ‘தரைக்கு எப்போது போவோம்’ என்கிற
தவிப்பு தணியாத தாகம் போல அரித்து எடுத்துவிடும். சாகசத்திலும் புதுவித
அனுபவங்களிலும் ஈடுபாடு கொண்டவர்களால்தான் கடலில் நாட்கணக்கில் வாழ
முடியும்.

லட்சுமிபிரியா... வருடத்தில் 8 மாதங்கள் கடலில்
மிதக்கிறார். 4 மாதங்கள் தரையில் வசிக்கிறார். அவர் பார்க்கிற வேலை
அப்படி.... மரைன் இன்ஜினீயர். அதுவும் தமிழகத்தின் முதல் பெண் மரைன்
இன்ஜினீயர்!

‘ஆம்பளைங்களாலயே கடல்லயும் கப்பல்லயும் குப்பை கொட்ட
முடியாது. பொம்பளைங்களால என்ன செய்ய முடியும்?’ என்று ஆரம்பக்
காலத்திலிருந்தே பெண்களுக்கு மறுக்கப்பட்ட, ஆபத்தான துறை என்று கருதப்பட்ட
மரைன் இன்ஜினீயரிங்கில் லட்சுமிபிரியாவுக்கு ஈடுபாடு வந்தது எப்படி?

“சொந்த ஊரு திருச்சி. சின்ன வயசுல இருந்தே கடல் மேலயும் அதுல மிதக்குற
கப்பல் மேலயும் எனக்கு அப்படி ஒரு ஆர்வம். டிவியில கப்பல் வர்ற சீன்
பார்க்கறப்போ எல்லாம் மனசுக்குள்ள ஜில்லுன்னு இருக்கும். ‘நாமளும் கப்பல்ல
போக மாட்டோமா’ன்னு ஏக்கமா இருக்கும். ‘டைட்டானிக்’ படம் பார்த்ததுல இருந்து
கப்பல் மேல எனக்கிருந்த ஆசை அதிகமாயிடுச்சு. ஸ்கூல்ல படிக்கிறப்பவே மரைன்
இன்ஜினீயரிங் சம்பந்தமான தகவல்களை கலெக்ட் பண்ண ஆரம்பிச்சுட்டேன். ப்ளஸ்
டூல 94 சதவிகிதம் மார்க் வாங்கினேன்.

தமிழ்நாட்டுல இருக்குற சில
கல்லூரிகளுக்கு அப்ளிகேஷன் போட்டேன். சீட் கிடைக்கலை. ‘இது ஆண்களுக்கான
கோர்ஸ். பெண்களுக்கு இடமில்லை’ன்னு சொல்லிட்டாங்க. ‘ஆசை, லட்சியமெல்லாம்
வெறும் கனவாப் போயிடுமோ’ன்னு துடிச்சுப் போயிட்டேன். அந்த நேரத்துலதான்
புனேவில் பிட்ஸ் பிலானி குழுமத்தில் இருக்குற ஒரு காலேஜுல வாய்ப்புக்
கிடைச்சுது. உடனடியா சேந்துட்டேன்!

இந்தத் துறைக்குப் படிக்க வர்ற
பெண்களோட எண்ணிக்கை ரொம்பக் குறைவு. இதுவரை 13 பெண்கள் மட்டும்தான் இந்தப்
படிப்பை முடிச்சிருக்காங்க. தமிழ்நாட்டுல இருந்து மரைன் இன்ஜினீயரிங்
படிக்கப் போன முதல் பெண் நான்தான். அதனால ரொம்ப சின்சியரா படிச்சேன். எல்லா
செமஸ்டர்லயும் ஃபர்ஸ்ட் கிளாஸ் மார்க் எடுத்தேன். 4 வருஷ படிப்பு.
கிட்டத்தட்ட 10 லட்சம் ரூபாய் செலவாச்சு.

ஃபைனல் இயர்
படிக்கிறப்போ கேம்பஸ் இன்டர்வியூலயே செலக்ட் ஆனேன். ‘ஆங்கிலோ ஈஸ்டர்ன் ஷிப்
மேனேஜ்மென்ட்’ கப்பல் நிறுவனத்துல வேலை கிடைச்சுது. இப்போ நான் வேலை
பாக்குறது கடலுக்குள்ளதான். உலகத்தின் பல நாடுகளையும் பாத்துட்டேன்.
உலகத்துலயே பிரமாண்டமான கப்பல்கள்ல டிராவல் பண்ணிட்டேன். வருஷத்துல 4 மாசம்
ரெஸ்ட். ஆனா, மறுபடியும் எப்படா கடலுக்குள்ள போவோ ம்னு இருக்கும்.
அந்தளவுக்கு இந்த வேலையை நான் நேசிக்க ஆரம்பிச்சுட்டேன். இது எனக்கு
மனசுக்குப் பிடிச்ச நிறைவான வேலை!’’ - மூச்சுவிடாமல் பேசி முடித்தார்
லட்சுமிபிரியா.

“கப்பல்ல வேலை பாக்குறது பயமா இல்லியா?” என்று கேட்டால் மென்மையாகச் சிரிக்கிறார்.

‘‘சூறாவளி, கடற்கொள்ளையர் பிரச்னை எல்லாம் பார்க்கும்போது மனசுக்குள்ள
சின்னதா ஒரு பயம் வந்து போகும். சோமாலிய நாட்டு கடல் பகுதியை தாண்டும்
போதெல்லாம் உயிரை கையில பிடிச்சுக்கிட்டுதான் போவோம். ஆனாலும், இந்தத்
துறையைவிட்டுப் போக மனசு மட்டும் வரலை. ஆண்களால மட்டும்தான் செய்ய
முடியும்னு எந்த வேலையும் இல்ல. இந்த கோர்ஸ்ல பெண்களுக்கு நல்ல ஓப்பனிங்ஸ்
இருக்கு. படிச்ச உடனே வேலை கிடைக்கும்கிற உத்தரவாதம். சாதிக்க விரும்புற
பெண்களுக்கு இது சவாலான துறை.

இதிலும் ஒரு வட்டத்துக்குள்ள என்னை
நான் அடைச்சுக்காம பாத்துக்கிட்டேன். அதனாலதான் எனக்குப் பிடிச்ச கப்பல்ல
என் பயணம் தொடர்ந்துகிட்டு இருக்கு. என்னை மாற்றியது நான் படிச்ச
படிப்புதான். விதவிதமான மனிதர்கள், நிறைய அனுபவங்கள் என லைஃப் ரொம்ப
கலர்ஃபுல்லா இருக்கு. இப்போதைக்கு என்னோட லட்சியம் கப்பலின் முதன்மை
இன்ஜினீயர் ஆகணும்!’’அவர் கப்பலின் முதன்மை இன்ஜினீயர் ஆவார் என்கிற
நம்பிக்கை, அவரைப் போலவே நமக்கும் இருக்கிறது!

மரைன் இன்ஜினீயர் ஆக என்ன செய்ய வேண்டும்

கடல் மற்றும் கடல் போக்குவரத்துத் துறை சார்ந்த படிப்புகள் மெர்ச்சன்ட்
நேவி எனப்படும். நாட்டிக்கல் சயின்ஸ், மரைன் இன்ஜினீயரிங் என இருவகைகளில்
கடல்துறை சார்ந்த படிப்புகள் வழங்கப்படுகின்றன. கப்பல் கேப்டன் ஆக
விரும்புபவர்கள் தேர்ந்தெடுத்துப் படிக்க வேண்டியது ‘நாட்டிக்கல் சயின்ஸ்.’
கப்பலின் மூளையாகச் செயல்படும் இயந்திரங்களை உருவாக்குதல் மற்றும்
பாதுகாத்தல் போன்றவற்றை விரும்புகிறவர்கள் ‘மரைன் இன்ஜினீயரிங்’
படிக்கலாம்.

பெண்களுக்கு மரைன் இன்ஜினீயரிங் படிப்பு சரியான
சாய்ஸ். பி.எஸ்சி., பி.டெக்., பி.இ., பட்டங்களில் இப்படிப்பு
வழங்கப்படுகிறது. ப்ளஸ் டூவில் கணிதம், இயற்பியல், வேதியியல் பயின்றவர்கள்
மட்டுமே இப்படிப்புக்குள் நுழைய முடியும். உடற்தகுதியும் அதிக
மதிப்பெண்களும் அவசியம். இது 4 வருட படிப்பு. வருடத்துக்கு ரூ.2 லட்சம் வரை
செலவாகும்.

வேலைவாய்ப்புக்குப் பிரமாதமான வாய்ப்பு உள்ள துறை
இது. படிப்பு காலம் முடியும் முன்பே பல ஷிப்பிங் கம்பெனிகள் இளம்
இன்ஜினீயர்களைத் தேர்வு செய்ய ஆர்வமாக இருப்பார்கள். நிறுவனத்தைப் பொறுத்து
ரூ.50 ஆயிரம் முதல் 70 ஆயிரம் வரை சம்பளம் கிடைக்கும். அரசு மற்றும்
தனியார் துறைகளிலும் ஷிப்பிங் வேலைகளுக்கு அதிகத் தேவை உள்ளது.


கடலுக்குள் செல்ல விரும்பாமல் ஷிப்பிங் தொடர்பான அலுவலக வேலைகள்
செய்வதற்கென எம்.பி.ஏ.(போர்ட் அண்ட் ஷிப்பிங் மேனேஜ்மெண்ட்) படிப்பு
இருக்கிறது. இதன் மூலம் துறைமுக அலுவலகத்தில் இருந்துகொண்டே ஏற்றுமதி,
இறக்குமதி வேலைகளைச் செய்யலாம்.