மதியாதார் தலைவாசல்....

2008
​ நவம்பர் 26-ம் தேதி மும்பையில் கடல்வழியாக நகருக்குள் நுழைந்த பத்து
பாகிஸ்தான் தீவிரவாதிகள்,​​ 6 அமெரிக்கர் உள்பட 166 பேரைக் கொன்ற
சம்பவத்தில் தொடர்புடையவரான டேவிட் கோல்மேன் ஹெட்லியிடம் விசாரணை
நடத்துவது குறித்து அமெரிக்க அரசுக்கு இந்திய அரசு கடிதம் எழுதவுள்ளது.இந்தக்
கடிதம் எழுதும் நிலைமை எதனால் ஏற்பட்டது என்றால்,​​ இந்தியாவில் உள்ள
அமெரிக்கத் தூதர் திமோத்தி ஜே.ரோமர்,​​ புது தில்லியில் வெளியிட்ட
அறிக்கையில்,​​ ஹெட்லியிடம் இந்தியா விசாரணை நடத்துவது பற்றி அமெரிக்கா
எந்த முடிவும் எடுக்கவில்லை.​ இனிமேல்தான் இதுகுறித்து அமெரிக்காவின்
நீதித்துறை முடிவு மேற்கொள்ளும் என்று தெரிவித்திருந்ததால்,​​ தற்போது
கடிதம் எழுத வேண்டிய நிலைமை ஏற்பட்டுள்ளது.அமெரிக்க நாட்டின்
அரசியல் சட்டப்படி,​​ இந்த வழக்கு நடைபெறும் சிகாகோ நகர
நீதிமன்றத்திடம்,​​ அமெரிக்க நீதித்துறை அனுமதி பெற்ற பிறகுதான் இந்திய
அதிகாரிகள் ஹெட்லியிடம் நேரடியாக விசாரிப்பது குறித்து முடிவுக்கு
வரமுடியும் என்கிறார்கள்.தற்போது அமெரிக்கச் சிறையில் இருக்கும்
ஹெட்லி,​​ தனக்கு மரண தண்டனை விதிக்க வேண்டாம் என்றும்,​​ தன் குற்றங்களை
ஒப்புக்கொள்வதாகவும்,​​ வேண்டுகோள் ஒப்பந்த மனுவை நீதிமன்றத்தில்
அளித்துள்ளார்.​ பாகிஸ்தானிய அமெரிக்கரான ஹெட்லி இந்த மனுவில்,​​ அமெரிக்க
நீதிமன்ற நடவடிக்கைகளுக்கு உள்பட்டு வெளிநாட்டவர்களின்
விசாரணைக்கு-எழுத்து மூலமாகவோ அல்லது விடியோ கான்பரன்ஸிங் மூலமோ அல்லது
நேரடியாக அங்கு கொண்டு செல்லப்பட்டோ விசாரிக்க-​ தான் ஒப்புக்கொள்வதாகத்
தெரிவித்துள்ளார்.அதனால்தான்,​​ இந்திய உள்துறை அமைச்சரும் மிகவும்
நம்பிக்கையுடன்,​​ ஹெட்லியிடம் விசாரணை நடத்த முடியும் என்று
தெரிவித்தார்.​ மேலும்,​​ தேசியப் புலானாய்வு முகமையும் 2008 நவம்பர்
மும்பைத் தாக்குதல் தொடர்பான வழக்கில் ஹெட்லி மீதான குற்றப்பத்திரிகையைத்
தயார் செய்துகொண்டிருக்கிறது.இந்நிலையில் இந்தியாவில் உள்ள
அமெரிக்கத் தூதர்,​​ ஹெட்லியிடம் இந்தியா விசாரிப்பது பற்றி இன்னும்
முடிவாகவில்லை என்று அறிவிக்க வேண்டிய அவசியம் என்ன?​ ஏன் இந்த அறிக்கை?​
ஏனென்றால்,​​ வாஷிங்டனில் அமெரிக்கா-​ பாகிஸ்தான் இடையிலான திட்டங்கள்
குறித்த அமர்வு நடைபெற்றுக் கொண்டிருக்கிறது.​ அணுசக்தி ஒப்பந்தம்,​​
ஆப்கானிஸ்தான் தீவிரவாதிகளை ​(அமெரிக்காவுக்கு எதிரான தாக்குதல்
மட்டும்?)​ கட்டுப்படுத்துவதில் பாகிஸ்தானின் பங்கு ஆகியவை உள்ளிட்ட
முக்கிய விஷயங்கள் பேசப்படும் நிலையில் பாகிஸ்தான் வெளியுறவு அமைச்சர்
குரேஷியின் மனம் குளிர்வதற்காக இத்தகைய அறிவிப்பை தில்லியில்
வெளியிடுகிறார்,​​ இந்தியாவின் அமெரிக்கத் தூதர்.​ ​அமெரிக்காவும்
தன் பங்குக்கு,​​ காஷ்மீர் விவகாரத்தில் இந்தியாவும் பாகிஸ்தானும்
இருதரப்பாகத் தீர்வுகாண வேண்டும்;​ இரு தரப்பும் அழைத்தால் மட்டுமே
அமெரிக்கா இதில் தலையிடும் என்றும் சொல்கிறது.​ அதாவது,​​ பாகிஸ்தான் மனம்
குளிர வேண்டும் என்றால் எப்படி வேண்டுமானாலும் அமெரிக்கா பேசும்,​​
எப்படிவேண்டுமானாலும் அறிக்கை வெளியிடச் செய்யும் என்கிற நீண்டநாள்
சந்தேகம் மேலும் வலுக்கிறதே...6 அமெரிக்கர் உள்பட 166 பேர்
கொல்லப்பட்ட இந்தத் தீவிரவாதச் செயலில் 12 குற்றச்சாட்டுகளை ஹெட்லி
ஒப்புக்கொண்டாகிவிட்டது.​ தீவிரவாத அமைப்பான லஷ்கர்-இ-தொய்பாவுடன்
ஹெட்லியின் தொடர்பு,​​ மும்பைத் தாக்குதல் குறித்த சதித்திட்டம்,​​
தீவிரவாதப் பயிற்சி முகாம்களில் பங்குகொண்டது,​​ கடல்வழியாக தீவிரவாதிகளை
அனுப்பியது உள்ளிட்ட அனைத்து விவரங்களையும் ஹெட்லி ஒப்புக்கொண்ட
நிலையில்,​​ அமெரிக்காவுக்கு இந்தியா மீது உண்மையிலேயே அக்கறை
இருக்குமானால்,​​ இவரிடம் விசாரணை நடத்த வாருங்கள் என்றல்லவா அழைத்திருக்க
வேண்டும்.​ உங்கள் விருப்பம் என்ன?​ என்றல்லவா இந்தியாவிடம் கேட்டிருக்க
வேண்டும்?மரண தண்டனைக்குரிய குற்றங்களைச் செய்திருக்கும் ஹெட்லி,​​
இத்தகைய வேண்டுகோள் ஒப்பந்தத்தை அளித்ததன் காரணமே,​​ அமெரிக்க உளவுத்
துறைக்கு வேண்டிய பல்வேறு தகவல்களை அவர் அளித்துள்ளதால்தான் என்றும்,​​
ஆகவே அவர் அளித்த தகவல்களுக்குப் பிரதிபலனாக அவரை மரண தண்டனையிலிருந்து
காப்பாற்ற அவர்கள் செய்துள்ள ஏற்பாடுதான் நீதிமன்றத்தில் ஹெட்லி
அளித்துள்ள மனுவுக்குக் காரணம் என்றும் ஒருசில தரப்பில் சந்தேகம்
எழுப்பப்பட்டுள்ளது.இந்தச் சந்தேகம் உண்மை என்கிறபட்சத்தில்,​​
இந்தியா என்னதான் வழக்குத் ​ தொடுத்தாலும்,​​ நேரிலோ,​​ விடியோ
கான்பரன்ஸிங் மூலமோ பல ஆண்டுகளுக்கு வழக்கை நடத்தினாலும்,​​ ஹெட்லிக்கு
மரண தண்டனை கிடைக்காது.​ அமெரிக்கச் ​ சட்டத்தின்படி அவருக்கு சிறை தண்டனை
கிடைக்கலாம்.​ இந்தியா மீது தாக்குதல் நடத்த லஷ்கர்-இ-தொய்பாவின்
சதித்திட்டம் பற்றி அளித்த தகவல் ஹெட்லி கொடுத்ததுதான்,​​ ஹெட்லி ஒரு
டபுள் ஏஜன்ட் ​(இருவருக்கும் உளவாளி)​ என்று நல்ல பெயர் கிடைத்தாலும்
ஆச்சரியப்படுவதற்கில்லை.ஹெட்லியிடம் இந்திய அதிகாரிகள் விசாரணை
நடத்த அனுமதிக்கும் என்றும்,​​ ​ ​ பதிலுக்கு மும்பைத் தாக்குதலில்
இந்தியாவில் சிக்கிய பாகிஸ்தான் தீவிரவாதியிடம் விசாரணை நடத்த அமெரிக்கா ​
இந்திய அரசிடம் அனுமதி கோரும் என்றும் ஒரு எதிர்பார்ப்பு இருக்கிறது.​
ஆனால்,​​ அமெரிக்காவுக்கு கஸôப் போன்ற நபர்கள் ஒரு பொருட்டே அல்ல.​
மும்பைத் தாக்குதல் தொடர்பான கூடுதல் தகவல்களை வேண்டுமானால்,​​ போனால்
போகட்டும் என்று தருவார்களே தவிர,​​ ஹெட்லியை நேரடியாக விசாரிக்க
அனுமதிப்பார்கள் என்று தோன்றவில்லை.​ அனுமதித்தாலும் அதில் பயன்
இருக்கப்போவதில்லை.அமெரிக்காவைப் பொறுத்தவரை இந்தியா நட்பு நாடு,​​
பாகிஸ்தான் நட்புக்கும் மேலான நாடு!​ இதை நமது ஆட்சியாளர்கள் புரிந்தும்
புரியாததுபோல இருப்பதுதான் புதிராக இருக்கிறது.பலவீனமாக
இருப்பதைவிட நாம் பலவீனமானவர்கள் என்று நாமே நம்மைப் பலவீனப்படுத்திக்
கொள்வதுதான் இந்திய வெளிவிவகாரத்துறையின் மிகப்பெரிய பலவீனம்!