அடித்து சித்திரவதை! விடியும் வரை முட்டிக்கால்! இலங்கை கடற்படையினரால் தமிழக மீனவர்களுக்கு நடந்த கொடூரம்!!

by **ஜனனி** Sun Mar 17, 2013 7:24 am

இலங்கைக் கடற்படையால் கைதுசெய்யப்பட்ட தூத்துக்குடி மீனவர்கள்
16 பேரும் பல்வேறு போராட்டங்களுக்குப் பிறகு, விடுதலை செய்யப்பட்டுள்ளனர்.
விடுதலை செய்யப்பட்ட மீனவர்கள் தங்களது சொந்த ஊரான தருவைகுளத்துக்குத்
திரும்பிய பிறகும் அதிர்ச்சியில் இருந்து மீளவில்லை.

விடுதலை
ஆனவர்களில் ஒருவரான ரொபினைச் சந்தித்தோம். ''இராத்திரி ஒரு மணி இருக்கும்.
மீன்பிடிக்க வசதியா ஒரு இடம் பார்த்துக் காத்திருந்தோம்.

திடீர்னு
எங்க படகுக்குப் பக்கத்துல இன்னொரு படகு வந்து நின்னுச்சு. அதுல
இருந்தவங்க கொழும்பு நேவியைச் சேர்ந்தவங்க. டார்ச் லைட் அடிச்சிட்டே எங்க
படகுல இறங்கினாங்க.

நாங்க விரிச்சிருந்த வலையை வெட்டி கடல்ல
வீசினாங்க. எங்ககிட்ட இருந்த செல்போனைப் பிடுங்கிட்டாங்க. அவங்க படகில்
எங்க படகைக் கட்டி இழுத்தாங்க.

எதுக்கு இப்படி செய்றீங்கன்னு கேட்டதுக்கு எங்களை அடிச்சு, உதைச்சாங்க. விடியும் வரை படகுலயே எங்களை முட்டிக்கால் போடவெச்சாங்க.

படகு ஆடும்போது நாங்க பட்ட அவஸ்தையைப் பார்த்து அவங்க கைதட்டிச்
சிரிச்சாங்க. இராத்திரி கிளம்பிய படகு, மறுநாள் மதியம் ரெண்டு மணிக்கு
கல்பிட்டி என்ற இடத்துக்குப் போய்ச் சேர்ந்தது.

அங்கே இருந்த
பொலிஸ்கிட்ட எங்களை ஒப்படைச்சாங்க. அடுத்த நாள், கல்பிட்டி கோர்ட்டுக்கு
எங்களைக் கொண்டுபோனாங்க. அங்கே இருந்த பெண் நீதிபதி 15 நாள் காவலுக்கு
உத்தரவு போட்டாங்க.

நீர்கொழும்பு ஜெயிலில் அடைக்கப்பட்டோம். அங்கே
நம்ம நாட்டுத் தூதரக அதிகாரிகள் வந்து பார்த்தாங்க. 'பயப்படாதீங்க...
ஒண்ணும் ஆகாது. நாங்கப் பார்த்துக்கிறோம்’னு சொல்லிட்டுப் போனாங்க.

தினமும் காலையில் ஏழு மணிக்கு எங்களுக்குச் சாப்பாடு கொடுப்பாங்க. சோறும்
தேங்காய்த் துவையலும் இருக்கும். ஏதோ பேருக்காக சாப்பிட்டோம்'' என்றார்
மிரட்சியுடன்.

மரியசெல்வராஜன் என்ற மீனவரிடம் பேசினோம். ''நடு
இராத்திரியில காற்று அடிக்கும்போது காற்று தள்ளுகிற வழியில் படகும் போகும்.
எங்களால் காற்றை எதிர்த்துப் படகைச் செலுத்த முடியாது. நம்ம கடற்படை
அதிகாரிங்க இலங்கை அதிகாரிகளைவிட மோசமா இருக்காங்க.

நாங்க
வெச்சிருக்கிற மீனைக்கூட பிடுங்கிட்டுப் போயிடுறாங்க. எங்ககிட்டதான்
ஏகப்பட்ட கெடுபிடி பண்றாங்க. இவங்க நினைச்சா, இலங்கைக் கடற்படையை நம்ம
ஏரியாவுக்குள் வரவிடாமல் தடுக்கலாம்.

ஆனால், இவங்க அதைச் செய்றது
இல்லை. இதுக்கெல்லாம் நம்ம அரசாங்கம் தீவிர நடவடிக்கை எடுக்கணும். ஒரு
சின்ன நாட்டுக்கிட்ட தன்னோட தன்மானத்தை இழக்கக் கூடாது.
கடல் குறிப்பிட்டவர்களுக்கு மட்டும் சொந்தம் கிடையாது.

எங்கிருந்தோ வந்து இந்தியா பக்கத்துல இருக்கிறவங்களைப் பிடிச்சிட்டுப்
போவாங்க. அதைப் பார்த்துட்டு நம்ம அரசாங்கம் சும்மாவே இருக்கணுமா?''
என்றார் வேதனையுடன்.

மீண்டு வந்திருக்கும் இன்னொரு மீனவரான
மேன்ட்லி, ''இலங்கைச் சிறையில் இருந்தபோது அங்கிருந்த குழாயில் குளித்தோம்.
அதைப் பார்த்த ஜெயில் காவலர்கள் எங்களை அடி அடின்னு அடிச்சிட்டாங்க.

அவங்க பேசுறது எங்களுக்கும் நாங்க பேசுறது அவங்களுக்கும் புரியலை. அதனால,
அவங்க எதுக்கு அடிச்சாங்கன்னே கடைசி வரை தெரியலே. அதுக்குப் பிறகு நாங்க
யாரும் குளிக்கவே இல்லை.

பல லட்சம் மதிப்புள்ள வலை போச்சு. ஒன்றரை
லட்சம் மதிப்புள்ள மீன் போச்சு. அரசாங்கம் எங்களுக்கு ஏதாவது பண உதவி
செய்தால் மட்டும்தான் தொடர்ந்து இந்தத் தொழில் செய்ய முடியும்'' என்று
தங்களின் நிலைமையைச் சொன்னார்.

மீன்வளத் துறை அதிகாரி ஒருவரிடம் பேசினோம்.

''வரையறுக்கப்பட்ட எல்லை, நம் நாட்டு மீனவர்களுக்கு மீன் பிடிக்கப்
போதுமானதாக இல்லை. கச்சதீவு வரை மீன் பிடிக்கலாம் என இருக்கிற இரு நாட்டு
ஒப்பந்தத்தைப் பின்பற்றினால், ஓரளவு பிரச்னை ஓயும்.

விடுதலைப்
புலிகளைக் காரணம் காட்டி அந்த ஒப்பந்தத்தை இலங்கை அரசு மீறி வருகிறது.
அதனால், நம் நாட்டு மீனவர்கள் மிகவும் கவனத்துடன் இருக்கிறார்கள்.

அதில் இருந்து சற்று தவறும் பட்சத்தில் இதுபோன்ற பாதிப்புகள் ஏற்படுகின்றன.

கச்சதீவு அருகே மீன் பிடிக்க அனுமதி வாங்குவதே இதற்குத் தீர்வு'' என்றார்.

மீனவர் கண்ணீருக்கு எப்போது விடிவு?